ސްޓޫޑެންޓް ލޯނު ދައްކަނީ އެންމެ 40 ޕަސެންޓު: ހައިދަރު

މަރިޔަމް އަނާ

13 މެއި 2025 - 10:54

0 comments

ލޯނުގެ އެހީގައި މަތީ ތައުލީމަށް ރާއްޖޭގައި ބޭރުގައި ކިޔެވުމަ ށްފަހު "ސްޓޫޑަންޓް ލޯން" އަނބުރާ ގިނަ ދަރިވަރުން ނުދައްކާ ކަމަށް ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ފުވައްމުލަކު ދެކުނު ދާއިރާ ޕީއެންސީ މެންބަރު އިބްރާހީމް ހުސައިން ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ހައިދަރު ވިދާޅުވީ ބައެއް ދަރިވަރުން ބަރާބަރަށް ލޯނު ދައްކަމުން ނުދާ ކަމަށެވެ.

"އަނބުރާ ދެއްކުމުގައި އެބަހުރޭ ވަރަށް ބޮޑެތި މައްސަލަތައް. ހަމައަށް ބަރާބަރަށް ނުދައްކާ. 40 ޕަސެންޓްވަރު އަނބުރާ ދައްކަނީ،" ހައިދަރު ވިދާޅުވި އެވެ.

އެއީ ދައުލަތަށް ލިބެންޖެހޭ ފައިސާކަން މިނިސްޓަރު ހައިދަރު ފާހަގަކުރެއްވި އެވެ.

ސްޓޫޑެންޓް ލޯނުގައި އެކަނި ވެސް 1،650 ދަރިވަރުން ރާއްޖެ އިން ބޭރުގެ އެކި ގައުމުތަކުގައި މި ވަގުތު ވެސް ކިޔަވަމުން އެބަދެ އެވެ.

މިނިސްޓަރު ވިދާޅުވި ގޮތުގައި މިއަހަރުގެ ޖެނުއަރީ އިން ފެށިގެން އޭޕްރީލް މަހުގެ ނިޔަލަށް ސްޓޫޑަންޓު ލޯނުގެ ގޮތުގައި 157 މިލިއަން ރުފިޔާ ދޫކޮށްފައިވެ އެވެ.

އެ ފައިސާ ހަމަޖައްސައިދިނުމުގައި މަރުހަލާތަކެއް އޮންނައިރު، ކުރިޔަށްވުރެން އެ މަރުހަލާތަކަށް ހޭދަވާ މުއްދަތު މިހާރު ކުރުވާނެ ކަމަށް މިނިސްޓްރީން ބުނެއެވެ. އަދި ސްޓޫޑެންޓު ލޯނުގެ ފައިސާ ލަސްނުވެ ހަމަޖައްސައިދިނުމަށް ޓަކައި ހަޔާ އެޑިއުކޭޝަން މިނިސްޓްރީގެ ބޭރުން ހޯދަން ޖެހޭ އެހީތެރިކަމެއް ވިޔަސް ހޯދާނެ ކަމަށް ބުނެފައިވެއެވެ.