އީދު ދުވަހާ ގުޅިގެން އިތުރު ބަންދެއް ނުލިބޭނެ: ސަރުކާރު

އިސްމާއިލް ރިޒާ

28 މެއި 2025 - 12:06

0 comments

މި އަހަރުގެ އަޟްހާ އީދާ ގުޅިގެން ކަލަންޑަރުގައި ބަންދުކުރަން ނިންމާފައިވާ ދުވަސްތަކުގެ އިތުރުން އެއްވެސް ދުވަހެއް ބަންދު ނުކުރަން ސަރުކާރުން ނިންމައިފި އެވެ.

"މި އަހަރުގެ ހައްޖު ދުވަސް ދިމާވަނީ، 5 ޖޫން ވާ ބުރާސްފަތި ދުވަހާ ކަމުގައި ސައޫދީ އަރަބިއްޔާއިން ކަނޑައެޅުއްވުމާ ގުޅިގެން ދަންނަވަމެވެ. ހައްޖު ދުވަހާއި އަޟްހާ އީދާ ގުޅިގެން ބަންދުވާނީ، މިހާރުވެސް ކަލަންޑަރުގައި ބަންދު ކަމަށް ކަނޑައަޅާފައިވާ ދުވަސްތަކެވެ." ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވި އެވެ.

އެހެންކަމުން އީދު ބަންދު ނިމޭ ހަފްތާގެ އަންގާރަ، ބުދަ އަދި ބުރާސްފަތި ދުވަސް ސަރުކާރު ހުޅުވާނެ އެވެ.

މީގެ ކުރީގައި މިފަދަ ބަންދަކާ ދިމާކޮށް އެއް ދުވަސް ނުވަތަ ދެ ދުވަސް ސަރުކާރު ބަންދު ނޫން ކަމަށް ކަލަންޑަރުގައި އިން ނަމަވެސް ސަރުކާރުން ބަންދު ކޮށްދެ އެވެ. އެހެންވެ، މިފަހަރު ވެސް ގިނަ ބަޔަކު ތިބީ އެގޮތަށް ބަންދު ކޮށްދޭނެ ކަމަށެވެ. ނަމަވެސް ކަންދިމާކުރި ގޮތުން މިފަހަރު ބޮޑު އީދު ދުވަސް ދިމާވަނީ ހުކުރު ދުވަހަކާ އެވެ.