އިންވެސްޓަރުންނަށް ގެއްލުން، ހޯރަފުށީ ޓުއަރިޒަމް ޒޯންގައި ކަރަންޓެއް ނެތް!

ހަސަން ހަލީމް

23 ޖުލައި 2025 - 11:16

1 comments

ހޯރަފުށީ ޓޫރިޒަމް ޒޯންގައި ހުރި ގެސްޓް ހައުސްއެއް: މި ތަނުގައި ވެސް ބޭނުން ކުރަނީ ވަގުތީ ކަރަންޓެއް

އުތުރުގައި ޓޫރިޒަމް ސިނާއަތް ފުޅާވެގެންދާއިރު، ހއ.ހޯރަފުށި ޓޫރިޒަމްގެ ހަބަކަށް ވުމަށް އެ ރަށުގައި ޓޫރިޒަމަށް ހާއްސަކޮށްފައިވާ "ޓުއަރިޒަމް ޒޯން" ގައި ދާއިމީ ކަރަންޓާއި ފެނާ ނަރުދަމާ ގެ ހިދުމަތް ލިބެން ނެތުމުން އެތަނަށް އިންވެސްޓްކޮށްގެން ތިބި އިންވެސްޓަރުން ކަންބޮޑުވުން ފާޅުކޮށްފި އެވެ.

"ހޯރަ" އަށް މައުލޫމާތު ދެމުން މިހާރުވެސް ހޯރަފުށީ "ޓުއަރިޒަމް ޒޯން" އިން ބިން ލިބިފައިވާ މީހަކު ބުނީ މަސައްކަތް ނުފެށި ލަސްވަނީ ކަރަންޓެއް ފެނެއް އެ ސަރަހައްދުގައި ލިބެން ނެތުމުން ކަމަށާއި އެކަމަށް ދާއިމީ ހައްލެއް ލިބޭނެ ދުވަހެއް ވެސް ނޭގޭ ކަމަށެވެ.

މިކަމާއި ގުޅިގެން ހޯރަފުށީ ކައުންސިލްގެ ރައީސް މުހައްމަދު ވަހީދު "އެކްސް" ކުރެއްވި ޕޯސްޓެއްގައި ވިދާޅުވީ ގެސްޓް ހައުސް ޒޯންއަށް ދާއިމީ ކަރަންޓާއި ނަރުދަމާ ލައިދިނުމުގެ ހެޔޮ ނިޔަތެއް ފެނަކައިގަވެސް ސަރުކާރުގެވެސް ނެތް ކަމަށެވެ.

ސަރުކާރުން އަދި ފެނަކައިން ވިދާޅު ވަނީ ވާނޭ ކުރާނަމޭ ފަށާނަމޭ އެހެން ކިޔާތާވެސް މިހާރު އަހަރު ދެ އަހަރުވަނީ ކަމުގައި ވަހީދު ވިދާޅުވި އެވެ.

"އިންވެސްޓަރުންގެ ޝައުގުވެރިކަން ގެއްލި ރައްޔިތުންގެ އުއްމީދުތައް ފެނަށް" ވަހީދު ޕޯސްޓްގައި ލިޔުއްވައިފާ ވެއެވެ.

ގެސްޓްހައުސް ތަރައްގީކުރަން ކައުންސިލުން ހުޅުވާލުމުން ގިނަ އަދަދެއްގެ ބަޔަކު މިހާރު ވެސް ޝައުގުވެރިކަން ފާޅުކުރަމުން އަންނަ ކަމަށް ހޯރަފުށީ ކައުންސިލުން މައުލޫމާތުދެ އެވެ. ނަމަވެސް ޓޫރިޒަމް ޒޯންގައި ދާއިމީ ކަރަންޓާއި ފެން ލިބެން ނެތުމުގެ ސަބަބުން އެ އިންވެސްޓަރުންނަށް ވަރަށް ބޮޑެތި ގޮންޖެހުން ކުރިމަތިވަމުން އަންނަ ކަމަށެވެ.

މިހާރު ހޯރަފުށީ ޓޫރިޒަމް ޒޯނަށް ކަރަންޓް ދެނީ ވަގުތީ ކަރަންޓް ކޮޅެއް ބޭނުން ކޮށްގެން ނެވެ. އަދި ނަރުދަމާ އަށް ހިންދަނީ އަމިއްލަ ޖަންގްޝަނެއް ބޭނުން ކޮށްގެންނެވެ. އެކަމުގެ ސަބަބުން ޓޫރިސްޓުންގެ ރައްކާތެރިކަމާއި އެމީހުންގެ ސިއްހީ ރައްކާތެރިކަމުގެ ކަންބޮޑުވުން އެބައޮތެވެ.

ހޯރަފުށީގެ ކަރަންޓްގެ ހިދުމަތް ދެމުން އަންނަ ފެނަކަ ކުންފުނީގެ މާލީ ފުދުންތެރިކަން ނެތުމުގެ ސަބަބުން ހޯރަފުށީގެ އަލަށް މީހުން އާބާދުވާ ގިނަ ސަރައްހައްދުތަކުގައި ވެސް ދާއިމީ ކަރަންޓް ދިނުމުގައި އޮތީ ހުރަސް އެޅިފަ އެވެ. އަދި މިކަން ކަމަށް އަވަސް ހައްލަކަށް އެދި ކައުންސިލުން އެތައް ފަހަރަކު ފެނަކަ ކުންފުނީގެ އިސްވެރިންނާއި ވަނީ ބައްދަލުކޮށްފަ އެވެ. ނަަމަވެސް އަދި ވެސް އެކަށީގެންވާ ހައްލެއް މި މައްސަލައަށް ހޯދިފަ އެއް ނުވެ އެވެ.

ހޯރަފުށީގައި މިހާރު ވަނީ ޒަމާނީ ފެންވަރުގެ ދެތިން ހަތަރު ގެސްޓުހައުސްއެއް ހުޅުވާފަ އެވެ. އަދި އެރަށުގެ އެއާޕޯޓު މިދިޔަ ސަރުކާރުން ހުޅުވާފައިވާއިރު، ލޯކަލް ޓޫރިޒަމް އެރަށުގައި ތަރައްގީކުރުމަށް ގިނަ ފުރުސަތުތަކެއް ހުރިކަން އެރަށު ކައުންސިލުން ފާހަގަކުރެ އެވެ.

ފާއިތުވި ސަރުކާރުތަކުން ހޯރަފުށީގެ ތަރައްގީއަށް ގިނަ މަޝްރޫއުތަކެއް ކުރިއަށް ގެންދިޔަ ނަމަވެސް މިފަހުން ހޯރަފުށީގެ ތަރައްގީގެ ދުވެލި މަޑުވެއްޖެ ކަމުގެ އަޑު ވަނީ ގަދަވެފަ އެވެ.

މި ސަރުކާރުގެ ފަސް އަހަރު ނިމިގެންދާއިރު ހޯރަފުށީ ދާއިރާގެ އުމްރާނީ ތަރައްގީގެ ކުރިމަގާއިމެދު ޖަވާބު ބޭނުން ގިނަ ސުވާލުތަކެއް މިހާރު ވަނީ އުފެދިފަ އެވެ. ހާއްސަކޮށް "ހޯރަފުށީ ދާއިރާގައި އިގްތިޞާދީ ހަރަކާތްތައް ހުއްޓި، ވަޒީފާގެ ފުރުސަތު ބަންދުވެފައި..! އޮތުމުން ނެވެ.

އަދި އެއް ވާހަކަ އެވެ.

މުޅި ހޯރަފުށީ ދާއިރާގެ ރައްޔިތުން ހާއްސަކޮށް ޒުވާނުންގެ މިއަދުގެ ގޮވާލުމަކީ ސިޔާސީ ބޮޑުންގެ ގޭ ދޮށުގައި މުގޯލި އަޅަން ނުޖެހި "ވަޒީފާގެ ފުރުސަތު" ރަށުން ތަނަވަސް ކޮށްދިނުމެވެ.