ހައްޖު ކޯޓާ ބޭނުން ކުރަނީ އުސޫލާ އެއްގޮތަށް: ޑރ. ޝަހީމް

އަލީ ރާޒީ

12 އޯގަސްޓް 2025 - 11:16

0 comments

ހައްޖަށް ދިއުމުގެ ފުރުސަތު ދިނުމުގައި ލިސްޓު ތަރުތީބު އޮޅުވާލައި ވައްކަން ކުރަމުން ގެންދާކަމަށް ދެކެވޭ ވާހަކައަކީ ހަގީގަތާ ހިލާފަށް ދެކެވޭ ވާހަކައެއް ކަމަށް އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާ އަށް މިނިސްޓަރު ހާޒިރު ކުރުމުން ޙައްޖު ކޯޓާއާ ގުޅޭ ގޮތުން މެންބަރުން ކުރެއްވި ސުވާލުތަކަށް ޖަވާބުދެއްވަމުން ޝަހީމު ވިދާޅުވީ ޙައްޖު ކޯޕަރޭޝަނަކީ ހެޔޮ އަގުގައި ޙައްޖާއި އުމްރާގެ ޚިދުމަތް ދިނުމަށް އުފައްދާފައިވާ މުއައްސަސާއެއް ކަމަށާއި އެ މުއައްސަސާ ތަރައްގީކޮށް ޒަމާނަށް ފެތޭ ޚިދުމަތްތަކެއް ފޯރުކޮށް ދިނުމަކީ ރައީސް ޑރ. މުޙައްމަދު މުޢިއްޒުގެ ތަސައްވުރެއް ކަމަށެވެ.

އެގޮތުން ސަޢުދީ އަރަބިއްޔާ އިން ރާއްޖެ އަށް ދެމުން އަންނަ 1،000 ކޯޓާގެ ދަށުން މި އަހަރު ވެސް ޙައްޖަށް މީހުން ގެންދިއުމުގައި ފުރުސަތު ދީފައި ވަނީ އުސޫލުތަކާ އެއްގޮތަށް ކަމަށް ވިދާޅުވި އެވެ.

ރުތީބު ލިސްޓުން ބޭރުން ޖާގަ ދީފައި ހުންނާނީ އެހީތެރިންގެ ގޮތުގައި ގެންދެވޭ މީހުންނަށް ކަމަށް ދޭހަވާ ގޮތަށް ޝަހީމު ވިދާޅުވީ އެ ފުރުސަތު ދެނީ ވެސް އާންމުކޮށް އިއުލާނުކޮށްގެން ކުރިމަތިލާ މީހުންނާ އިންޓަވިއުކޮށްގެން ކަމަށެވެ. އެހީތެރިންގެ ގޮތުގައި ގެންދާނީ ހަށިގަނޑުގައި ވަރުހުރި ގަދަފަދަ މީހުން ކަމަށެވެ. އަދި އެހީތެރިންގެ ގޮތުގައި ގެންދާނޭ މީހުން ކަނޑައަޅާފައިވަނީ ހައްޖު ކޯޕަރޭޝަނުން އެކަމަށް ކަނޑައަޅާފައިވާ އުސޫލުތަކުގެ ތެރެއިން ކަމަށް ވެސް ޝަހީމު ވިދާޅުވި އެވެ.

ވިހި ވަނަ ރައްޔިތުންގެ މަޖިލީހުގެ މެންބަރުންގެ ތެރެއިން ބައެއް މެންބަރުން މިއަހަރު ހައްޖަށް ވަޑައިގެންނެވި އެވެ. އެ މެންބަރުންނަށް ފުރުސަތު ލިބުނު ގޮތަކާމެދު ކުރެވޭ ސުވާލުތަކަށް ހައްޖު ކޯޕަރޭޝަނުންނާއި އިސްލާމިކް މިނިސްޓްރީން ވެސް މިހާތަނަށް ޖަވާބެއް ދީފައެއް ނުވެ އެވެ.

މިނިސްޓަރު ވިދާޅުވީ އިންސާފުވެރިކަމާ އެކު ކޯޓާގެ ކަންކަން ތަރުތީބު ކުރުމަށްޓަކައި ރައީސް ޑރ. މުހައްމަދު މުއިއްޒުގެ ރިޔާސަތުގައި ވަނީ އުސޫލުތަކެއް ކަނޑައަޅުއްވާފައި ކަމަށެވެ. އެގޮތުން މިނިސްޓަރު ފާހަގަކުރެއްވި ކަންކަމަކީ:

- އަލަށް ހައްޖަށް ދާ ފަރާތްތަކަށް އިސްކަން ދިނުން

- ކޮންމެ ފަސް އަހަރަކުން ނޫނީ ތަކުރާރުކޮށް ކޯޓާ ނުދިނުން

- އުމުރުން 65 އަހަރުން މަތީ މީހުންނަށް ވަކި ޕަސެންޓެއް ކޮންމެ އަހަރަކު ކަނޑައެޅުން

- ހައްޖުގެ އާމިލުންނާއި ހިދުމަތްތެރީންނާއި ސިއްހީ މާހިރުން މިކަންކަމުން އިސްތިސްނާވުން.

މި ކަންކަން ތަންފީޒުކޮށް ފުރިހަމަވާނީ 1447 ވަނަ އަހަރުގެ ހައްޖުގަ އެވެ. މި ބަދަލުގެ ސަބަބުން ކިއު ތަރުތީބު ކުރުމުގައި އުމުރުން އެންމެ ދުވަސްވީ މީހުންނާއި އަލަށް ހައްޖަށް ދާ މީހުންނަށް އަބަދުވެސް އިސްކަން ދެވޭނެ ކަމަށް މިނިސްޓަރު ވިދާޅުވި އެވެ.