މޯލްޑިވިއަންގެ ފަސިންޖަރުންނަށް އަނަންތަޕޫރީ ހޮސްޕިޓަލުން ޑިސްކައުންޓް ދެނީ

ހުނައިދާ ޔާސިރު

07 މާޗް 2026 - 13:03

0 comments

ގައުމީ އެއާލައިން، މޯލްޑިވިއަންގެ ފަސިންޖަރުންގެ ތެރެއިން، އިންޑިއާގެ ޓްރިވަންޑްރަމްގައި ހުންނަ އަނަންތަޕޫރީ ހޮސްޕިޓަލްސް އެންޑް ރިސާޗް އިންސްޓިޓިއުޓުން ޑޮކްޓަރަށް ދައްކާ މީހުންނަށް ޑިސްކައުންޓް ލިބޭ ގޮތަށް އެމްއޯޔޫއެއްގައި ސޮއިކޮށްފި އެވެ.

އިންޑިއާއަކީ ދިވެހީން ސިއްހީ ފަރުވާ ހޯދުމަށް އާންމުކޮށް ދަތުރުކުރާ ގައުމެކެވެ. އެގޮތުން ރާއްޖެއާ ކައިރިވުމާއި، ޒަމާނީ ސިއްހީ ޚިދުމަތްތައް ލިބެން ހުރުމުން، ގިނަ އަދަދެއްގެ ދިވެހީން ޓްރިވެންޑްރަމްއަށް ދަތުރުކުރެއެވެ.

މޯލްޑިވިއަންއިން ބުނި ގޮތުގައި، އަނަންތަޕޫރީ ހޮސްޕިޓަލާއެކު ހަދައިފައިވާ އެއްބަސްވުމުގެ މައިގަނޑު މަގުސަދަކީ އެ އެއާލައިނުން ދަތުރުކުރާ ދިވެހީންނަށް ސިއްހީ ޚިދުމަތްތައް ހޯދުމުގައި ލުއިފަސޭހަގޮތްތަކެއް ފަހިކޮށްދިނުމެވެ.

އެ އެއްބަސްވުމުގެ ދަށުން، މޯލްޑިވިއަންއިން ދަތުރުކުރާ މީހުންނަށް އަނަންތަޕޫރީ ހޮސްޕިޓަލުން ލިބޭ ޑިސްކައުންޓްތަކުގެ ތެރޭގައި:

އެޑްމިޓްކޮށްގެންދޭ ފަރުވާއާއި އެޑްމިޓްނުކޮށްދޭ ފަރުވާތަކުން ހާއްސަ ޑިސްކައުންޓްތަކެއް ލިބުން
ހެލްތު ޗެކަޕް ޕެކޭޖްތަކުން 15 ޕަސެންޓްގެ ޑިސްކައުންޓް
ލެބޯޓަރީ ޓެސްޓްތަކާއި ރޭޑިއޮލޮޖީގެ ޚިދުމަތްތަކުން 10 ޕަސެންޓްގެ ޑިސްކައުންޓް
ތުރިވަނަންތަޕޫރަމް އިންޓަނޭޝަނަލް އެއާޕޯޓުން ހޮސްޕިޓަލަށް ދިއުމަށް ހިލޭ އެމްބިއުލާންސްގެ ޚިދުމަތް

އައިލެންޑް އެވިއޭޝަނުން ބުނީ ބަލިމީހުންނަށް ބޭނުންވާ އެޕޮއިންޓްމެންޓްތައް ހަމަޖެއްސުމާއި، ހޮސްޕިޓަލުގެ އެހެނިހެން ހިދުމަތްތައް ހޯދުމުގައި އެހީތެރިކަން ފޯރުކޮށްދޭނެ ކަމަށެވެ.

ވަކިން ހާއްސަކޮށް، އުމުރުން ދުވަސްވީ ފަސިންޖަރުންނަށް އެހީތެރިވުމަށްޓަކައި، އިނގިރޭސި ބަހުގެ އިތުރުން ދިވެހި ބަހުން ވާހަކަދައްކަން އެނގޭ މުވައްޒަފުން އެސިސްޓެންޓުންގެ ގޮތުގައި ތިބޭނެކަމަށް އައިލެންޑް އެވިއޭޝަނުން ބުންޏެވެ.

އެ އެމްއޯޔޫގެ ފައިދާ މޯލްޑިވިއަންގައި ޓްރިވަންޑްރަމަށް ދަތުރުކުރާ ހުރިހާ ފަސިންޖަރުންނަށް ވެސް ލިބޭނެ އެވެ. އެ ހިދުމަތާ ގުޅޭ އިތުރު މައުލޫމާތު މޯލްޑިވިއަން ނުވަތަ އަނަންތަޕޫރީ ހޮސްޕިޓަލު މެދުވެރިކޮށް ލިބޭނެ ކަމަށް ވެސް މޯލްޑިވިއަނުން ބުންޏެވެ.