އަވަށްޓެރި ގައުމުތަކަށް ދެން ހަމަލާއެއް ނުދޭނަން: އީރާން

އިބްރާހިމް އިމާދު

07 މާޗް 2026 - 14:01

0 comments

އީރާނުގެ ރައްދު ހަމަލާއެއް އޮމާނުގެ ބަނދަރަކާއި ތެޔޮ ޓޭންކަރަކަށް ވެސް ދިން

އިރާނުން އަވައްޓެރި ގައުމުތަކަށް ދެމުންދާ ހަމަލާތައް ހުއްޓާލަން ނިންމާފައިވާ އެ ގައުމުގެ ރައީސް މަސްއޫދު ޕެޒެޝްކިއަން ދާދި ދެންމެއަކު އިއުލާންކުރައްވައިފި އެވެ.

ދައުލަތުގެ ޓީވީ މެދުވެރިކޮށް ދެއްވި ބަޔާނެއްގައި، އަވަށްޓެރި ގައުމުތަކަށް އިރާނުން ދިން ހަމަލާތަކަށް ރައީސް ޕެޒެޝްކިއަން ވަނީ މައާފަށް އެދިވަޑައިގެންފަ އެވެ. އަދި އެފަދަ ހަމަލާތައް ހުއްޓާލާނެ ކަމަށް ވިދާޅުވެ، އެއީ އަސްކަރިއްޔާގެ ތެރޭގައި މުއާސަލާތީ ގޮތުން އެރި އޮޅުމެއްގެ ސަބަބުން ހިނގި ކަމެއް ކަމަށް ފާހަގަކުރެއްވި އެވެ.

މި ބަޔާން ދެއްވާފައިވަނީ ރޭ ފަތިހު ބަހްރޭން، ސައުދީ އަރަބިއްޔާ އަދި ޔުނައިޓެޑް އަރަބް އެމިރޭޓްސް ހިމެނޭހެން ގަލްފުގެ ބައެއް ގައުމުތަކަށް އިރާނުން މިސައިލް ހަމަލާތަކެއް ދީފައިވާ ދަނޑިވަޅެއްގަ އެވެ. ހަމަ އެއާ އެކު، އެމެރިކާ އާއި އިޒްރޭލުން ގެންދަނީ އިރާނުގެ އެކި އަމާޒުތަކަށް ވައިގެ މަގުން ހަމަލާދެމުންނެވެ.

ހަމަލާ ދޭން ގަސްތު ނުކުރާ ކަން އިއުލާން ކުރި ނަމަވެސް ކުރިއަށް އޮތް ތަނުގައި ވެސް އިރާނަށް މިސައިލެއް ފޮނުވަން އަރަބި ގައުމެއް ބޭނުންކޮށްފި ނަމަ، އެ ގައުމަކަށް ހަމަލާ ދޭނެ ކަމަށް ވިދާޅުވެ ޕެޒެޝްކިއަން ވަނީ އިންޒާރު ދެއްވާފަ އެވެ.

މިއީ އެމެރިކާ އާއި އިޒްރޭލުން އިސްވެ އިރާނަށް ދޭން ފެށި ހަމަލާތަކާ ގުޅިގެން، ނުރައްކަލުގެ ތެރެއަށް ވެއްޓިފައިވާ ގަލްފުގެ ގައުމުތަކަށް އުފާވެރި ހަބަރެކެވެ.

މި ހަމަލާތަކާ ގުޅިގެން މި ސަރަހައްދުގެ ގައުމުތަކުގެ ވައިގެ ސަރަހައްދު ބަންދުކޮށް، ތެލާއި ގޭސް އުފެއްދުން މަދުކުރަން މަޖުބޫރުވެފަ އެވެ. މިއާ ގުޅިގެން އެ ގައުމުތަކަށް ލިބުނު އިގުތިސޯދީ ގެއްލުމުގެ މިންވަރު ގުނަމުން އަންނަނީ ބިލިއަން ޑޮލަރުންނެވެ.

މިދިޔަ ހޮނިހިރު ދުވަހު އީރާނަށް ހަމަލާދޭން ފަށައި އެ ގައުމުގެ ރޫހީ ލީޑަރު އާޔަތުﷲ އަލީ ޚާމަނާއީ އާއި އިސް އެތައް ބަޔަކު ވަނީ އަވަހާރަކޮށްލައިފަ އެވެ. އީރާންގެ އަސްކަރީ އެކި މަގާމުތަކާއި އަސްކަރީ މަނަވަރުތަކަށް ކެނޑިނޭޅި ހަމަލާދެމުން ދާއިރު މަރުވި މީހުންގެ އަދަދު ވަނީ ހާހަކަށް ވުރެ އިތުރުވެފަ އެވެ.