މެދުއިރުމަތީގެ ހަމަނުޖެހުންތަކާ ގުޅިގެން އުމްރާވެރިން ސަމާލުވާން އެދެފި

އިބްރާހިމް އިމާދު

01 މާޗް 2026 - 15:59

0 comments

ދިވެހީން އުމްރާއަށް ފުރުން: - ފޮޓޯ: މޯލްޑިވިއަން

ހަނގުރާމައާ ގުޅިގެން މެދުއިރުމަތީގެ މަޝްރަހު ގޯސްވެފައިވާތީ، މިދުވަސްވަރު އުމްރާއަށް ދާ މީހުންނާއި އަޅުކަމުގައި ސައުދީ އަރަބިއްޔާގައި ތިބި މީހުން ސަމާލުވުމަށް އިސްލާމިކް މިނިސްޓްރީން ބުނެފި އެވެ.

އީރާނަށް އިޒްރޭލާއި އެމެރިކާއިން އިއްޔެ ދޭން ފެށި ހަމަލާތަކުގެ ރައްދުގައި އީރާނުން ވަނީ މެދުއިރުމަތީގައި ހުރި އެމެރިކާގެ އަސްކަރީ އެތައް މަރުކަޒުތަކަށް ހަމަލާދޭން ފަށައިފަ އެވެ. އެހެންވެ، ގިނަ ގައުމުތަކުގެ ވައިގެ ސަރަހައްދު ބަންދު ކުރުމުން، ރާއްޖެއަށް ދަތުރުކުރާ ގިނަ އެއާލައިންތަކުގެ ފްލައިޓްތައް ކެންސަލްވެ ވެލާނާ އިންޓަނޭޝަނަލް އެއާޕޯޓުގައި ވެސް ގިނަ ޓޫރިސްޓުންތަކެއް ވަނީ ނުފުރި ތާށިވެފަ އެވެ.

އެ ހަމަލާތަކުގައި އީރާންގެ ލީޑަރު އާޔަތުﷲ އަލީ ހާމަނާއީ ވެސް ވަނީ އަވަހާރަކޮށްލައިފަ އެވެ.

އިސްލާމިކް މިނިސްޓްރީން ބުނީ އުމްރާވެރިންނަށް ހާއްސަކޮށްގެން، މައުލޫމާތު ދިނުމަށް ހާއްސަ ހޮޓްލައިން ނަމްބަރެއް މިނިސްޓްރީގައި ގާއިމުކުރުމުގެ މަސައްކަތް މިހާރު ކުރަމުން އަންނަ ކަމަށެވެ. އަދި އެކަން ނިމުމާއެކު، އާއްމުކުރާނެ ކަމަށް ބުންޏެވެ.

"އަދި ދަންނަވަމެވެ. އުމްރާ ދަތުރުތަކުގެ އެންމެ ފަހުގެ މައުލޫމާތު ހޯދުމާއެކު ކަމާގުޅުންހުރި ރަސްމީ ފަރާތްތަކުންނާއި ސައުދީ އަރަބިއްޔާގެ ސަރުކާރުން ފޯރުކޮށްދެއްވާ އިރުޝާދުތަކާއި އެންގެވުންތަކަށް އެންމެހާ ފަރާތްތަކުން ސަމާލުކަން ދެއްވުމަށް ނަސޭހަތްތެރިވަމެވެ،" އިސްލާމިކް މިނިސްޓްރީން ނެރުނު ބަޔާނެއްގައި ބުންޏެވެ.

އަދި ހާއްސަ ކަމެއް މެދުވެރިވެއްޖެ ހާލަތެއްގައި ސައުދީ އަރަބިއްޔާގެ ރިޔާޟުގައި ހުންނަ ދިވެހިރާއްޖޭގެ އެމްބަސީގެ ހޮޓްލައިން ނަންބަރު +966506894477 އާއި ސައުދީ އަރަބިއްޔާގެ ޖިއްދާގައި ގާއިމުކޮށްފައިވާ ދިވެހިރާއްޖޭގެ ކޮންސިއުލޭޓުގެ ހޮޓްލައިން ނަންބަރު +966530838329 އަށް ވީ އެންމެ އަވަހަކަށް އެންގުމަށް ވެސް އެ މިނިސްޓްރީން ވަނީ އެދިފަ އެވެ.

ހަމަލާތަކާއި ގުޅިގެން ރިޔާޟްގެ ކިންގް ހާލިދު އިންޓަނޭޝަނަލް އެއާޕޯޓާއި، ޖިއްދާގެ ކިންގް ޢަބްދުލްޢަޒީޒް އިންޓަނޭޝަނަލް އެއާޕޯޓް ފަދަ މައި އެއާޕޯޓްތަކުން ވެސް ވަނީ ދަތުރުވެރިންނަށް ސަމާލުވުމަށް އަންގާފަ އެވެ.

އޮތޯރިޓީން އިރުޝާދު ދީފައިވަނީ:

ދަތުރުކުރާ އެއާލައިނުގެ ރަސްމީ މައުލޫމާތު ފޯރުކޮށްދޭ ވަސީލަތްތައް މެދުވެރިކޮށް އެންމެ ފަހުގެ ޚަބަރު ހޯދުން.
ފްލައިޓް ލަސްވެއްޖެނަމަ ނުވަތަ ކެންސަލްވެއްޖެނަމަ އަމަލުކުރަންޖެހޭ ގޮތްތައް ދުރާލައި އޮޅުންފިލުވުން.
އެއާޕޯޓަށް ދިއުމުގައި އިތުރު ވަގުތު ހޭދަވެދާނެ ކަމަށް ބަލައި، ދުރާލައި ތައްޔާރުވުން

މި ދަނޑިވަޅުގައި އޮތޯރިޓީން ދޭ އިރުޝާދުތަކަށް ފުރިހަމައަށް ބޯލެނބުމަށާއި، ކެތްތެރިކަމާއެކު އަމަލުކުރުމަށް ކަމާބެހޭ ފަރާތްތަކުން ވަނީ އެދިވަޑައިގެންފަ އެވެ. ސަރަހައްދީ މަސްރަހު ފިނިވަންދެން މިފަދަ ބުރޫތައް އެރުމަކީ އެކަށީގެންވާ ކަމެއް ކަމަށް ތަޖުރިބާކާރުން ލަފާކުރައްވަ އެވެ.