މިއީ ހަރަދުތައް ކުޑަކޮށް ފިޔަވަޅުތައް އަޅަންޖެހޭ ވަގުތު: ފައިސަލް

މައިރާ އަހުމަދު

01 މާޗް 2026 - 13:10

0 comments

މެދުއިރުމަތީގައި ފެށުނު ހަނގުރާމައިގެ ސަބަބުން މިއީ ހަރަދުތައް ކުޑަކޮށް ފިޔަވަޅުތައް އަޅަންޖެހޭ ވަގުތު ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.

ފައިސަލް މިހެން ވިދާޅުވީ މެދުއިރުމަތީގައި ހަނގުރާމައިގެ ބޮޑު ވިލާގަޑެއް ފެތުރެމުން އަންނަ ވަގުތެއްގައި އެވެ.

މެދުއިރުމަތީގެ ހާލަތު ކުއްލިއަކަށް ގޯސްވެފައިވާއިރު، އިއްޔެ ހެނދުނު އެމެރިކާ އާއި އިޒްރޭލުން ވަނީ ޕްރެޒިޑެންޝަލް ކޮމްޕްލެކްސް އަދި އިންޓެލްޖިންސް ހެޑްކުއާޓާސްއަށް ބޮން އަޅާފަ އެވެ.

އިރާނުގެ މީޑިއާތަކުން ބުނާ ގޮތުގައި އެ ގައުމުގެ ރޫހާނީ ލީޑަރު ޚާމަނާއީގެ އިތުރުން އޭނާގެ ދަރިކަނބަލުންނާއި، ދަނބިދަރިފުޅާއި، ކާފަ ދަރިފުޅުވެސް ވަނީ މި ހަމަލާތަކުގައި މަރުވެފަ އެވެ.

ރައްދުގައި އިރާނުން ދިން ގިނަ ހަމަލާތައް އަމާޒުކުރީ އަރަބި ގައުމުތަކުގައި ހުންނަ އެމެރިކާގެ އަސްކަރީ މަރުކަޒުތަކަށެވެ.އިސްރާއީލުން އީރާނަށް ހަމަލާ ދިނުމުގެ ސަބަބުން މެދުއިރުމަތީގެ މަސްރަހު ހޫނުވެ، ސަރަހައްދީ ވައިގެ ދަތުރުފަތުރަށް ވަނީ ބޮޑެތި ބުރޫތަކެއް އަރައިފައެވެ. އެގޮތުން މެދުއިރުމަތީގެ ބައެއް ގައުމުތަކުގެ ވައިގެ ސަރަހައްދު ވަނީ ވަގުތީ ގޮތުން ބަންދުކޮށްފަ އެވެ. މީގެ ސަބަބުން ސައޫދީ ހިމެނޭހެން އެ ސަރަހައްދުގެ ގިނަ ގައުމުތަކެއްގެ ވައިގެ ދަތުރުތަކަށް ވަނީ ބަދަލުތަކެއް ގެންނަން ޖެހިފަ އެވެ.

މިކަންކަމާއި ގުޅުވާ އެކްސްގައި ކުރެއްވި ޕޯސްޓެއްގައި ފައިސަލް ވިދާޅުވީ މެދުއިރުމަތީގައި މިފެށުނު ހަނގުރާމައިގެ ސަބަބުން، ސީދާ ގޮތުން ރާއްޖެއަށް އަސަރުކުރާނެ ކަމަށާއި އެހެން ކަމުން މިއީ ހަރަދުތައް ކުޑަކޮށް ވިސްނުންތެރިކަމާއި އެކު އިޤުތިޞާދު ހިފެހެއްޓުމަށް ފިޔަވަޅުތައް އަޅަންޖެހޭ ވަގުތެއް ކަމަށެވެ. އަދި އާއްމު ރައްޔިތުންގެ ދިރިއުޅުމަށް ސީދާ އަދި ނުސީދާ ގޮތުން ކޮށްފާނެ އަސަރަކަށް ސަރުކާރުން ތައްޔާރުވެ އޮތީ ކިހާ މިންވަރަކަށްތޯ ސުވާލުކޮށްލަންޖެހޭ ކަމަށާއި މި ހަނގުރާމަ ފެށެން އުޅޭކަމުގެ ސިގްނަލްތައް ދުރާލައި އައީ ލިބެމުން ކަމަށް ފައިސަލް ވިދާޅުވި އެވެ.

ރާއްޖެއަކީ ފަތުރުވެރިކަމަށް ބަރޯސާވެފައިވާ ގައުމަކަށް ވުމާއި އެކު ހަނގުރާމައިގެ ފުރަތަމަ ވަގުތުން ފެށިގެން ފްލައިޓްތައް ކެންސަލްކޮށް ޤައުމުތަކުގެ ވައިގެ ސަރަހައްދު ބަންދު ކުރުމާއިއެކު، ރާއްޖޭގެ ފަތުރުވެރިކަމުގެ ސިނާޢަތަށް ލޮޅުން އަރާފައިވާ ކަމަށް ފައިސަލް ވިދާޅުވި އެވެ.

އެ ހަމަނުޖެހުންތަކާ ގުޅިގެން ދިވެހިންނަށް ކުރިމަތިވެދާނެ ދަތިތަކާއި ކުރިމަތިވާ ކަންކަން ހައްލު ގުޅިގެން ފިޔަވަޅުތައް އެޅުމަށް ރައީސް ޑރ. މުހައްމަދު މުއިއްޒު ރޭ ވަނީ ނުވަ މިނިސްޓަރުން ހިމަނައިގެން ހާއްސަ ކޮމިޓީއެއް ވެސް އެކުލަވާލައްވައިފަ އެވެ.