މީޑިއާ ބިލްގައި މައްސަލަތައް އެބަހުރި، އިސްލާހުކުރަން ވަގުތު ދޭންޖެހޭ: ބާ ކައުންސިލް

ހަސަން ހަލީމް

16 ސެޕްޓެމްބަރ 2025 - 09:28

0 comments

ބާ ކައުންސިލްގެ ރައީސް ހުސެއިން ސިރާޖް - ފޮޓޯ/މިހާރު

ނޫސްވެރިކަމުގެ މިނިވަން ކަމަށް ހުރަސް އެޅޭ ގޮތަށް އެކުލަވާލައި މިއަދު ރައްޔިތުންގެ މަޖިލީހުގެ ކޮމެޓީން ފާސްކުރި މީޑިއާ ބިލުގައި ބަދަލު ގެންނަން ޖެހޭ ކަންކަން ހުރި ކަމަށް ބާ ކައުންސިލުން ބުނެފި އެވެ.

އެކްސްގައި ރޭ ކުރި ޕޯސްޓެއްގައި ބާ ކައުންސިލުން ބުނީ މީޑިއާ ރެގިއުލޭޓުކުރާ ބިލްގައި ހުރި މައްސަލަތަކާ ގުޅިގެން އެ ކައުންސިލުން ރައްޔިތުންގެ މަޖިލީހަށް ހުށަހެޅުންތަކެއް ހުށަހަޅާފައިވާނެ ކަމަށެވެ.

ބާ ކައުންސިލުން ބުނީ މީޑިއާ ބިލަކީ ގާނޫނުއަސާސީއާއި ބައިނަލްއަގުވާމީ އުސޫލުތަކާ އެއްގޮތްވާ ގޮތަށް ބޮޑެތި އިސްލާހުތަކެއް ގެންނަންޖެހޭ ބިލެއް ކަމަށެވެ.

މީޑިއާ ބިލް ގާނޫނަކަށް ހެދުމުގެ ކުރިން ރައްޔިތުންގެ މަޖިލީހުން އެ ބިލްގެ މަސްލަހަތު ހުރި މީހުންނާ މަޝްވަރާކޮށް އާންމުންގެ ހިޔާލު ހޯދުމަށް އެކަށީގެންވާ ވަގުތު ދޭން ޖެހޭނެ ކަމަށެވެ.

ނޫސްވެރިންނާއި ބައިނަލްއަގުވާމީ ޖަމިއްޔާތަކުން ބިލު ބޭރުކުރަން ގޮވާލަމުން ދަނިކޮށް، ބިލަށް ކުދިކުދި އިސްލާހުތަކެއް ގެނެސް ކޮމިޓީން އިއްޔެ ފާސްކުރިއިރު، އެ ބިލަށް އަަލަށް ހުށަހަޅާފައިވާ އިސްލާހުތަކުގައި އޮތީ ބިލާ މެދު އިތުރަށް ކަންބޮޑުވާން ޖެހޭ ގޮތަށެވެ.

އޭގެ ތެރޭގައި، މި ބިލުގެ ދަށުން އުފައްދާ "މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން"ގެ މެންބަރުން އައްޔަންކުރަން ރައީސްއަށް ބާރުދީފައި އޮތް އޮތުން އުނިކުރުމަށް ފަހު، އެ ބާރު މަޖިލީހަށް ލިބޭ ގޮތަށް އިސްލާހު ގެނެސްފައިވެ އެވެ.