ގައުމީ ޑްރަގް ޕޮލިސީ އަންނަ މަހަށް ނިންމަނީ

އަލީ ރާޒީ

06 އޮކްޓޫބަރ 2025 - 14:20

0 comments

މަސްތުވާތަކެއްޗާ ގުޅުންހުރި ގައުމީ ޑްރަގް ޕޮލިސީ - ގައުމީ ސިޔާސަތު އެކުލަވާލުމުގެ މަސައްކަތް އަންނަ މަހުގެ ނިޔަލަށް ނިންމުމަށް މަސައްކަތް ކުރަމުންދާ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހްސާން ވިދާޅުވެއްޖެ އެވެ.

މިނިސްޓަރު މިގޮތަށް ވިދާޅުވީ މިދިޔަ އަހަރުގެ ޖޫން މަހު ބޭއްވި ނެޝަނަލް ޑްރަގް ކޮންޓްރޯލް ކައުންސިލްގެ ބައްދަލުވުމުގައި މަސްތުވާތަކެއްޗާ ގުޅުން ހުރި ގައުމީ ސިޔާސަތު އެކުލަވާލުމުގެ މަސައްކަތް ކުރުމަށް ނިންމާފައިވާއިރު އެ މަސައްކަތް ކުރިއަށްދާ ގޮތާ ގުޅޭގޮތުން މަޖިލީހުގެ ގަލޮޅު އުތުރު ދާއިރާގެ އެމްޑީޕީގެ މެންބަރު މުހައްމަދު އިބްރާހީމް (ކުޑޫ) ކުރެއްވި ސުވާލަށް ލިއުމުން މަޖިލީހުގެ މިއަދުހެ ޖަލްސާ އަށް ފޮނުއްވި ޖަވާބުގަ އެވެ.

އިހުސާން ވިދާޅުވީ މަސްތުވާތަކެއްޗާ ގުޅުންހުރި ޤައުމީ ސިޔާސަތު އެކުލަވާލުމަށް އެކުވެރި ދައުލަތް، އދ. އާއެކު މަސައްކަތް ކުރެވި އިނީޝިއަލް ޑްރާފްޓެއް މިހާރު އެކުލަވާލާފައިވާ ކަމަށެވެ. އެ ޑްރާފްޓަކީ ބައިނަލްއަގުވާމީ މިންގަނޑުތަކަށް އެކަނި ބަލައިގެން އެކުލަވާލާފައިވާ ޑްރާފްޓެއް ކަމަށްވާތީ މިހާރު ކުރިއަށްދަނީ ރާއްޖޭގައި މަސްތުވާތަކެތީގެ މައްސަލަ އޮތް ހާލަތާއި ބޭނުންކުރާ ބާވަތްތަކަށް ރިއާޔަތްކޮށް އެ ޕޮލިސީއަށް ގެންނަންޖެހޭ ބަދަލުތައް ގެނައުމުގެ މަސައްކަތް ކަމަށް އިހްސާން ވިދާޅުވި އެވެ.

އެ ގޮތުން ރަށްރަށުގައި ހުރި ފުލުހުންގެ މަރުކަޒުތަކުން އެކަމަށް ބޭނުންވާ މައުލޫމާތު ހޯދަމުންދާ ކަމަށާއި ނޮވެމްބަރު 30 ގެ ކުރިން ނެޝަނަލް ޑްރަގް ޕްލިސީ ފައިނަލް ކުރުމަށް ޓާގެޓްކޮށްފައިވާ ކަމަށް ވަޒީރު ވިދާޅުވި އެވެ.