ސީރިއާގެ ހަނގުރާމައަށް ދިޔަ ދެމައިން ތުރުކީގައި ތާށިވެފައި ތިއްބައި ރާއްޖެ ގެނެސްފި

އަހުމަދު ނަޖީބު

05 މާޗް 2026 - 13:10

0 comments

ސީރިއާ: އެތަނުގެ ހަނގުރާމައަށް ގޮސް ހާލުގައި ޖެހިފަ ދިވެހިން އަދިވެސް ތިބިކަމަށް ވޭ

ހަނގުރާމައިގައި ބައިވެރިވުމަށް ސީރިއާއަށް ދިއުމަށްފަހު ފަހުން ތުރުކީއަށް ހިޖުރަކޮށް، ހާލުގައި ޖެހިފައި ތިބި ދިވެހި ދެމައިން ރާއްޖެ ގެނެސް ރިހެބިލިޓޭޓް ކުރުމުގެ މަސައްކަތް ކުރަމުންދާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު އިހުސާން ވިދާޅުވީ ހަނގުރާވެރި އެކި ސަރަހައްދުތަަކަށް ގޮސް ތާށިވެ އަނބުރާ ރާއްޖެ ނާދެވިފައި ގިނަ ބަޔަކު އެބަ ތިބި ކަމަށެވެ. އަދި ހަނގުރާމައިގައި ބައިވެރިވެފައިވާ ފަރާތްތަކާއި ބައިވެރިވުމަށް އެކުގައި ގެންދިޔަ އާއިލާ މެންބަރުން ހަނގުރާމަވެރި ސަރަހައްދުގައި ތާށިވެފައި ތިބި ތިބުން ނިނުމަކަށް ރައީސް މުއިއްޒު ވަނީ އަންގަވައި އެ މީހުން ވީހާވެސް އަވަހަށް ރާއްޖެއަށް ގެނައުމަށް އަންގަވާފައިވާ ކަމަށެވެ.

އެ މީހުން ރާއްޖޭގެ މުޖްތަމައުއަށް ނެރުމަށް ގެންނަންޖެހޭ ހުރިހާ ތަމްރީންތަކާއި ޕްރޮގްރާމްތައް ފުރިހަމަކުރުމަށްފަހު ރީ އިންޓްރޭޓްކުރަން ޖެހޭ ފަރާތްތައް ކުރުމަށް އަންގާފައިވާ ކަމަށެވެ.

އިހުސާން އިތުރަށް ވިދާޅުވީ ތުރުކީގައި ތިން މީހަކު ހާލުގައި ޖެހިފައި ތިބި ކަމުގެ މައުލޫމާތު ލިބިގެން އެކި މުއައްސަސާތަކާ ގުޅިގެން 14 އަހަރުގެ އަންހެން ކުއްޖަކާއި އެކުއްޖާގެ މަންމަ ރާއްޖެ ގެނެސްފައިވާ ކަމަށެވެ. އަދި ދެމައިންނަށް ނޭޝަނަލް ރީއިންޓެގްރޭޝަން ސެންޓަރުގައި ފަރުވާ ދެމުންދާ ކަމަށްވެސް ވިދާޅުވި އެވެ.

މިނިސްޓަރު ވިދާޅުވީ ޖިހާދުގެ ނަމުގައި ހަނގުރާމައަށް ގޮސް ހާލުގައި ޖެހިފައި ތިބޭ މީހުން އަނބުރާ ރާއްޖެ ގެނައުމުގެ މަސައްކަތުގެ ތެރެއިން 23 މީހަކު ރީއިންޓެގްރޭޓް ކޮށްފައިވާ ކަމަށެވެ. މިގޮތަށް ގެންނަ މީހުން ފުރަތަމަ ގެންދަނީ ކ. ހިންމަފުށީގައި ހުންނަ ނެޝަނަލް އިންޓަގްރޭޝަން ސެންޓަރަށެވެ.

ޓެރަރިޒަމް މަނާ ކުރުމުގެ ގާނޫނުގެ ދަށުން ހަރުކަށި ފިކުރުގެ ވިސްނުން ގެންގުޅުމާއި ހިތްވަރު ދިނުމާއި، ހަނގުރާމައިގައި ބައިވެރިވުމުގެ ނިޔަތުގައި އެފަދަ ތަންތަނަށް ދިއުމާއި އަދި ހަނގުރާމައިގައި ބައިވެރިވުމަކީ ކުށެކެވެ.