ސިއްހީ ދާއިރާއަށް ހިދުމަތް ކުރެއްވުމުގެ އެންމެ މަތީ ޝަރަފު މޫސާ އަންވަރަށް

އަލީ ރާޒީ

11 ނޮވެމްބަރ 2025 - 10:59

0 comments

ރައީސް ޑރ. މުއިއްޒު، ސިއްހީ ދާއިރާއިން ޝަރަފުވެރިކަމުގެ އިނާމު ހާސިލްކުރެއްވި މޫސާ އަންވަރަށް އެރުވުން

ސިއްހީ ދާއިރާއަށް ހިދުމަތްކުރުމުގެ ޝަރަފުވެރިކަމުގެ ގައުމީ އިނާމު، ދައުލަތުގައި ގިނަ އަހަރުތަކެއް ވަންދެން މަސައްކަތްކުރެއްވި މޫސާ އަންވަރަށް މިއަދު އަރުވައިފި އެވެ.

އައްޑޫ މީދުއަށް އުފަން މޫސާ އަންވަރަށް، ސިއްހީ ދާއިރާއިން ހިދުމަތްކުރުމުގެ ޝަރަފުވެރިކަމުގެ އިނާމު އެރުވީ، މި އަހަރުގެ ޖުމްހޫރީ ދުވަހުގެ ރަސްމީ ޖަލްސާގައި ރައީސް ޑރ. މުހައްމަދު މުއިއްޒެވެ.

މޫސާ އަންވަރު މަސައްކަތްކުރައްވަން ފެއްޓެވީ އައްޑޫ ގަމުގައި އިނގިރޭސީން އުޅުނު ދުވަސްވަރު، ރޯޔަލް އެއާ ފޯސްގެ ރީޖަނަލް ސެންޓަރުގަ އެވެ. އުމުރުން 16 އަހަރުގައި މަސައްކަތްކުރައްވަން ފުރުސަތު ލިބިވަޑައިގަތީ އިނގިރޭސި ބަސް ރަނގަޅަށް އެނގިވަޑައިގަންނަވާތީ އެވެ.

މޫސާ އަންވަރު ދައުލަތުގެ ހިދުމަތް ފެއްޓެވީ 1977 ވަނަ އަހަރު މާލެއަށް ބަދަލުވެވަޑައިގެން 'އެލައިޑް ހެލްތު ސާވިސް ސެންޓަރު'ގެ ޕްރެކްޓިކަލް ނާސް ޓީޗަރުގެ ވަޒީފާއިންނެވެ.

އޭގެ ފަހުން:

އެ ސެންޓަރުގައި ހިދުމަތް ކުރެއްވިއިރު ނަރުހުން ވެސް ހިމެނޭހެން ސިއްހީ ދާއިރާގެ އެކިއެކި ދާއިރާތަކުގެ ގިނަ އަދަދެއްގެ މުވައްޒަފުން ތަމްރީން ކުރެއްވި
އޭރު ހިދުމަތުގައި ތިއްބެވި ފޫޅުމައިންނަށް ވެސް ތަމްރީންތައް ދެއްވި
ހެލްތު މިނިސްޓްރީގައި ވެސް މަސައްކަތް ކުރެއްވި
އެ މިނިސްޓްރީގައި މަސައްކަތްކުރެއްވިއިރު ރާއްޖޭގެ އެކި ރަށްރަށުގައި ހޮސްޕިޓަލުުތައް ބިނާކުރެއްވުމުގައި އަދި އައިޖީއެމްއެޗުގެ ހިދުމަތް ފެށުމަށް އޭރުގެ ސަރުކާރުން ކުރެއްވި މަސައްކަތްތަކުގައި އަމަލީ ގޮތުން ބައިވެރިވެވަޑައިގެންނެވި
އެންމެ ފަހުން މަސައްކަތްކުރެއްވީ ފުޑްސް އެންޑް ޑްރަގު އޮތޯރިޓީ (އެފްޑީއޭ)ގައި

ރައީސް ޑރ. މުހައްމަދު މުއިއްޒު، މޫސާ އަންވަރަށް އިއްޒަތް އެރުވުމަށް ނިންމެވީ ރާއްޖޭގެ ސިއްހީ ދައިރާ ކުރިއެރުވުމަށް ކުރެއްވި މަސައްކަތާއި ރައްޔިތުން ހޭލުންތެރިކުރުވުމަށް ކުރެއްވި މަސައްކަތް ފާހަގަކޮށް އެކަމުގެ އަގުވަޒަންކުރެއްވުމުގެ ގޮތުންނެވެ.