ބިމު ކުއްޔާއި ޓެކްސް ދައްކަން ނުޖެހޭ ގޮތަށް އައްޑޫ ވިޔަފާރި ހަބަކަށް ހަދަނީ

ހަސަން ހަލީމް

05 ފެބުރުއަރީ 2026 - 11:24

1 comments

އައްޑުއަކީ ރާއްޖޭގެ ފުރަތަމަ ވިޔަފާރި ހަބަށް ހެދުމަށްޓަކައި، ދައުލަތަށް ދައްކަންޖެހޭ ބިމު ކުއްޔާއި އިންކަމް ޓެކްސް ނުނަގާ ގޮތަށް، އެ ސަރަހައްދުގައި އިންވެސްޓުކުރާ ވިޔަފާރިތަކަށް ލުއިދީ، އިންވެސްޓުކުރުމުގެ ފުރުސަތު ކުދި އަދި މެދު ފަންތީގެ ވިޔަފާރިތަކަށް ހުޅުވާލަން ރައީސް މުހައްމަދު މުއިއްޒު ނިންމަވައިފި އެވެ.

އެ މަނިކުފާނުގެ މިއަދު ރައްޔިތުންގެ މަޖިލީހުގައި ދެއްވަމުން ގެންދަވާ ރިޔާސީ ބަޔާނުގައި ވިދާޅުވީ އައްޑޫ ހުޅުދު އާއި މީދޫ އަދި ޖުމްލަކޮށް މުޅި އައްޑު އަކީ ކުދި އަދި މެދު ފަންތީގެ ހާއްސަ ސަރަހައްދަކަށް ހަދައި، އެކަމަށް ބޭނުންވާ އެތައް ކަމެއް ފަހިކޮށް ދޭން ނިންމާފައިވާ ކަމަށެވެ.

އެގޮތުން މި ގެންނަ ބަދަލު ޖެނުއަރީ 1، 2027 އިން ފެށިގެން ތަންފީޒުވާން ފަށާނެ ކަމަށާއި އެކަމަށް ގާނޫނީ ގޮތުންނާއި ފަންނީ ގޮތުންނާއި ޓެކްނިކަލް ގޮތުން ކުރަން ޖެހޭ ކަންކަން މި އަހަރުގެ ތެރޭގައި ހަމަޖައްސައި ނިންމާނެ ކަމަށް ރައީސް ވިދާޅުވި އެވެ.

ރައީސް ވިދާޅުވީ އައްޑު އަށް މި ފަހިކޮށްދޭ ފުރުސަތާ އެކު އައްޑޫ އައިޓީ ހަބަކަށްވެ އެތައް ވަޒީފާތަކަކާއި ފުރުސަތުތަކެއް ހުޅުވި އިގުތިސާދީ ގޮތުން އެތައް ކުރިއެރުމެއް އަންނާނެ ކަމަށެވެ.

"މިފުރުސަތުގެ ބޭނުންކޮށް އައްޑޫ އަތޮޅަކީ ރާއްޖޭގެ އައިޓީ ހަބްގެ ގޮތުގައި ހެދުމަށް އެކަމަށް ޝައުގުވެރިކަން ހުރި އެންމެހާ ފަރާތްތަކަށް ސަރުކާރުން ދައުވަތުދެން،" ރައީސް ވިދާޅުވި އެވެ.

ސަރުކާރުން ރާއްޖޭގެ ވިޔަފާރިތަކުން ހޯދި ޚިދުމަތްތަކުގެ ބިލްތަކަށް މިދިޔަ އަހަރު 6.3 ބިލިއަން ރުފިޔާ ދެއްކި ކަމަށާއި، އަދި ސަރުކާރު ހިއްސާވާ ކުންފުނިތަކުގައި ގިނަ އަހަރުވެފައިވާ 882 މިލިއަން ރުފިޔާގެ ބިލްތަކަށް، މިހާތަނަށް 469 މިލިއަން ރުފިޔާ ދައްކައިފައިވާ ކަމަށް ވެސް ރައީސް ވިދާޅުވި އެވެ.

އެސްއެމްއީތައް ކުރިއަރުވަން އޮތް އެންމެ ބޮޑު ގޮންޖެހުމަކީ އޮންލައިން ޕޭމެންޓް ސިސްޓަމެއް ނެތުން ކަމަށާއި، އެކަމަށް ހައްލު ގެނައުމަށްޓަކައި ރާއްޖެއަށް ތައާރަފު ކުރާ ޕޭޕަލްގެ ޚިދުމަތް ލިބޭނެ ކަމަށް ރައީސް ވިދާޅުވި އެވެ. އަދި ދިވެހި އުފެއްދުމެއް ކަމަށްވާ ސްވިފްޓް ވެސް މިހާރު، ބައިނަލްއަގުވާމީ ޕޭމެންޓް ނިޒާމެއްގެ ގޮތުގައި ތައާރަފުކޮށްފައިވާކަން އެ މަނިކުފާނު ފާހަގަކުރެއްވި އެވެ.