ބަންގްލަދޭޝްގެ އާ ސަރުކާރު ހުވާކުރާ ރަސްމިއްޔާތަށް ރައީސް ފުރާވަޑައިގެންފި

އަލީ ރާޒީ

17 ފެބުރުއަރީ 2026 - 00:14

0 comments

ބަންގްލަދޭޝްގެ އިންތިހާބީ ބޮޑުވަޒީރު، ތާރިގް ރަހްމާން މަގާމުގެ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު އެ ގައުމަށް މިރޭ ފުރާވަޑައިގެންފި އެވެ.

ރައީސް މުއިއްޒު މި ރަސްމިޔާތަށް ވަޑައިގަންނަވަނީ، ބޮޑުވަޒީރު ޝެއިހް ހަސީނާގެ ވެރިކަން ވައްޓާލުމަށް ފަހު އެ ގައުމުގައި އެކުލަވާލި ވަގުތީ ސަރުކާރުގެ ޗީފް އެޑްވައިޒަރު، ޑރ. މުހައްމަދު ޔޫނުސްގެ ދައުވަތަކަށެވެ. މި ރަސްމިޔާތަށް 13 ގައުމެއްގެ ވެރިންނަށް ދައުވަތު ދީފައިވެ އެވެ.

ހުވާ ކުރެއްވުމުގެ ރަސްމިއްޔާތު އޮންނާނީ މާދަމާ، ބަންގްލަދޭޝްގެ ވެރިރަށް ޑާކާގަ އެވެ.

ރައީސް އޮފީހުން ބުނީ އަންނަ ބުދަދުވަހުގެ ނިޔަލަށް ރައީސް އެކޮޅުގައި މަޑުކުރައްވާނެ ކަމަށެވެ.

މިދިޔަ ބުރާސްފަތިދުވަހު ބޭއްވި އާންމު އިންތިހާބު ކާމިޔާބުކުރީ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) އެވެ. މަޖިލީހުގެ 300 ގޮނޑީގެ ތެރެއިން، ބީއެންޕީ ހިމެނޭ ކޯލިޝަނަށް 209 ގޮނޑި ކާމިޔާބުވެފައިވާކަން ނަތީޖާތަކުން ދައްކަ އެވެ.

މިއީ 2024ގައި އޭރުގެ ބޮޑުވަޒީރު ޝެއިހް ހަސީނާގެ ވެރިކަން ވައްޓާލި ފަހުން އެ ގައުމުގައި ބޭއްވި ފުރަތަމަ އިންތިހާބެވެ.