ހުޅުމާލެ ހޮސްޕިޓަލުގައި އެންމެ ފަހުގެ ކާޑިއޯވެސްކިއުލާ ސްކޭން ސިސްޓަމް ބޭނުންކުރަން ފަށައިފި

އަހުމަދު ނަޖީބު

02 މާޗް 2026 - 13:38

0 comments

އެސްޓީއޯ ހެލްތުކެއާގެ ފަރާތުން ސިއްހީ ހިދުމަތްދޭ ތަންތަނުގައި ޒަމާނީ ޑައިގްނޯސްޓިކް އިކުއިޕްމަންޓް ފޯރުކޮށްދީ ހާއްސަ ބަލިތަކަށް ދެވޭ ފަރުވާގެ ފެންވަރު ރަނގަޅު ކުރުމަށް ކުރަމުންދާ މަސައްކަތުގެ ދަށުން އެންމެ ފަހުގެ ކާޑިއޯވަސްކިއުލާ އަލްޓްރާސައުންޑް ސިސްޓަމެއް ހުޅުމާލޭ ހޮސްޕިޓަލަށް ފޯރުކޮށްދީފި އެވެ.

ސިއްހީ ހިދުމަތްދޭ ތަންތަނުގައި ޒަމާނީ ޑައިގްނޯސްޓިކް ސާމާނު ފޯރުކޮށްދީ، ހާއްސަ ބަލިތަކަށް ދޭ ފަރުވާގެ ފެންވަރު ރަނގަޅު ކުރަން، ޖީއީ ހެލްތްކެއާ ބްރޭންޑުގެ ވިވިޑް E95ގެ އެންމެ ފަހުގެ ކާޑިއޯވެސްކިއުލާ އަލްޓްރާސައުންޑު ސިސްޓަމް ފޯރުކޮށްދިނީ އެސްޓީއޯ މެޑިކަލްސް އިންނެވެ.

އެއީ، މެޑިކަލް އިމޭޖިން އަދި ހެލްތުކެއާ ޓެކްނޮލޮޖީގައި ދުނިޔޭގެ ކުރިއަރާފައިވާ ކުންފުންޏެއް ކަމަށްވާ ޖީއީ ހެލްތުކެއާއާ އެކު، ވެފައިވާ ޕާޓްނަޝިޕްގެ ދަށުން ފޯރުކޮށްދިން ސިސްޓަމެއް ކަމަށް އެސްޓީއޯ އިން ބުންޏެވެ.

އެ މެޝިން ބޭނުންކުރަން ފެށީ ހުޅުމާލެ ހޮސްޕިޓަލުގައި މިދިޔަ މަހުގެ 22 ގައި ބޭއްވި އެޕްލިކޭޝަން ޓްރެއިނިން ސެޝަނަކާ އެއްކޮށެވެ.

އެސްޓީއޯއިން ބުނީ ޖީއީ ވިވިޑް E95އަކީ ހިތުގެ ބަލިތަކާއި މަސައްކަތްކުރާ ގޮތް އަދި ލޭ ދައުރުވާ ގޮތް ވަރަށް ސާފުކޮށް ފެންނާނެ ހައި-ރިޒޮލިއުޝަން ކާޑިއެކް އިމޭޖިން ސިސްޓަމެއް ކަމަށެވެ.

ހުޅުމާލެ ހޮސްޕިޓަލުގައި ޖީއީ ވިވިޑް އީ95 ސިސްޓަމް ގާއިމުކޮށް ހިދުމަތް ދޭން ފެށުމަކީ ރާއްޖޭގެ ޑައިގްނޯސްޓިކް ހިދުމަތްތައް ތަރައްގީކޮށް ފެންވަރު ރަނގަޅު ސިއްހީ ހިދުމަތެއް ފޯރުކޮށްދިނުމަށް އެސްޓީއޯ ހެލްތުކެއާއި ސިއްހީ ހިދުމަތްދޭ ތަންތަނާއި ގުޅިގެންކުރަމުންދާ މަސައްކަތަށް ލިބުނު އިތުރު ކުރިއެރުމެއް ކަމަށް އެސްޓީއޯއިން ބުނެފައިވެ އެވެ. އަދި މިއީ ކާޑިއެކް، ޕީޑިއަޓްރިކް އަދި ނިއޯނޭޓަލް ޑައިގްނޯސްޓިކް ހިދުމަތްތައް އިތުރަށް ހަރުދަނާކުރުމަށްޓަކައި އެޅިގެންދިޔަ މުހިއްމު ފިޔަވަޅެއް ކަމަށް އެސްޓީއޯ އިން ބުންޏެވެ.