އަލްއަބްރާރު އުމްރާ ގްރޫޕްގެ ހުއްދަ ހިފަހައްޓައިފި

އިބްރާހިމް އިމާދު

05 މާޗް 2026 - 12:01

0 comments

އަލް-އަބްރާރު ހައްޖު އެންޑް އުމްރާ ކުންފުނިން ފަހު ވަގުތު 100 އަށްވުރެ ގިނަ މީހުންގެ އުމްރާ ދަތުރު ކެންސަލް ކުރި މައްސަލައިގައި އެ ކުންފުނީގެ ލައިސަންސް ހިފަހައްޓައިފި އެވެ.

މިނިސްޓްރީން ނެރުނު ބަޔާނެއްގައި ބުނީ ޢުމުރާ އަށް މީހުން ގެންދިއުމަށް އ ކުންފުންޏަށް ދޫކޮށްފައިވާ ހުއްދަ ވަގުތީ ގޮތުން ހިފަހައްޓައި މައްސަލަ ބަލަމުން އަންނަ ކަމަށެވެ. މިނިސްޓްރީން ބުނީ އެކަމާ ގުޅޭގޮތުން އިތުރަށް ސާފު ކުރަން ޖެހޭ މަޢުލޫމާތުތަކާއި، ބަލަންޖެހޭ ކަންކަން ބެލުމަށްފަހު، އުސޫލުގެ ތެރެއިން އަޅަންޖެހޭ ފިޔަވަޅުތައް ކުންފުންޏާ ދެކޮޅަށް އަޅާނެ ކަމަށެވެ.

އަ ލްއަބްރާރު" ކުންފުނީގެ ހަވާލުގައި އުމްރާ އަށް ދާން ފައިސާ ދެއްކި 110 މީހެއްގެ ފުރުން އެންމެ ފަހު ވަގުތު ކެންސަލްކުރުމާ ގުޅިގެން އެ މީހުން އުމްރާ ގެންދަން އެހީވެފައި ވަނީ ހައްޖު ކޯޕަރޭޝަންގެ ފަރާތުންނެވެ.

މިކަމުގެ ޝަކުވާ މިނިސްޓްރީ އަށް ލިބުމާ ގުޅިގެން މިހާތަނަށް ސާފުކުރި މަޢުލޫމާތައް ބަލާއިރު، ޢުމްރާ ދަތުރު ކެންސަލްކޮށްފައިވަނީ ޤަބޫލުކުރެވޭ އެއްވެސް ސަބަބެއް ނެތި އަދި ރާއްޖެއިން ޢުމްރާއަށް މީހުން ގެންދިއުމާ ބެހޭ އުސޫލާ ޚިލާފަށް ކަމަށް މިނިސްޓްރީން ބުންޏެވެ.

މަޢުލޫމާތު ލިބިފައިވާ ގޮތުގައި އަލްއަބްރާރު ގްރޫޕާއެކު ރަމަޟާން ޢުމްރާއަށް ދިއުމަށް 120 މީހަކު ފައިސާ ދައްކާފައިވެއެވެ. އެމީހުންނަށް ދަތުރު ކެންސަލްވިކަން އެންގީ ދަތުރަށް ފުރަން އޮތް ދުވަހު، ހުރިހާ ކަމެއް ތައްޔާރުކޮށްފައިވަނިކޮށެވެ.

މިގްރޫޕާއެކު އުމުރާއަށް ދިއުމަށް ފައިސާ ދެއްކި މީހުންނާއި މީގެއިތުރުންވެސް އެކި ސަބަބުތަކާ ހުރެ ރަމަޟާން ޢުމްރާއަށް ނުފުރި ތިބި މީހުންނަށް އެހީވުމުގެ ގޮތުން، އިސްލާމިކް މިނިސްޓްރީއާއި ހައްޖު ކޯޕަރޭޝަނާއި، މޯލްޑިވިއަން ގުޅިގެން އެ ފުރުޞަތު ފަހިކޮށްދިނުމުގެ މަސައްކަތް ވަނީ ފަށާފަ އެވެ.