ހުޅުމާލޭގައި އެކްސިޑެންޓުވެ ޒަހަމްވި ދެބަފައިންގެ ތެރެއިން ބައްޕަ ނިޔާވެއްޖެ

އިސްމާއިލް ރިޒާ

16 ސެޕްޓެމްބަރ 2026 - 10:35

0 comments

ހުޅުމާލޭ ދެވަނަ ފިޔަވަހީގައި މިދިޔަ އޮގަސްޓު 31ގައި ހިނގި ނުރައްކާތެރި އެކްސިޑެންޓުގައި ސީރިއަސް އަނިޔާތަކެއް ލިބި، ޓްރީ ޓޮޕް ހޮސްޕިޓަލުގެ އައިސީޔޫގެ ވެންޓިލޭޓަރުގައި ފަރުވާ ދެމުންދިޔަ 62 އަހަރުގެ ފިރިހެންމީހާ މަރުވެއްޖެ އެވެ.

އެ މީހާ އެކްސިޑެންޓްވި ހާދިސާ ހިނގީ މިދިޔަ މަހުގެ 31 ވަނަ ދުވަހު ހުޅުމާލެ ފޭސް ދޭއްގެ ހީނާމާ ހިނގުމާއި ދުނބުރިގަސް މަގު ގުޅުނު ހަތަރު އަނގޮޅީގައި ކާރަކާއި ސައިކަލެއް ޖެހިގެންނެވެ.

އެ އެކްސިޑެންޓްގައި އަނިޔާވެ ފަރުވާ ދެމުން ދިޔައީ ސައިކަލްގައި ތިބި މީހުންނަށެވެ. އެއީ އުމުރުން 62 އަހަރުގެ ފިރިހެނަކާއި އޭނަގެ 24 އަހަރުގެ ދަރިފުޅެވެ. އެކްސިޑެންޓްގައި ސީރިއަސް ގެއްލުންތަކެއް ލިބުނު ޅ. ކުރެންދު އަށް ނިސްބަތްބާ މުހައްމަދު އަފީފް ނިޔާވީ އައިސީޔޫގައި ފަރުވާ ދެމުން ދަނިކޮށް ރޭގެ ވަގުތެއްގަ އެވެ.

އޭނަގެ ކަށު ނަމާދު އޮންނާނީ މިއަދު މެންދުރު ނަމާދަށްފަހު ހުޅުމާލެ ސަހަރާ މިސްކިތުގަ އެވެ.

އަފީފަކީ އެކި ސްކޫލްތަކުގައި، ގިނަ ދުވަސްތަކެއް ވަންދެން ކިޔަވައިދެއްވި ޓީޗަރެކެވެ.

އުމުރުން އެންމެ ޒުވާން ދުވަސްވަރުގައި އަމަލީ މައިދާނަށް ނިކުންނަވައި، ދިވެހިބަހާއި ދީނިއްޔާތު އަދި ތިމާވެށީގެ އިލްމު، ޕްރައިމަރީ އަދި ސެކަންޑްރީ ގްރޭޑްތަކަށް މާލޭގެ އެކި ސުކޫލުތަކުގައި 32 އަހަރު އޭނާ ކިޔަވައިދެއްވި އެވެ.

އޭނާ ވަނީ ދިވެހި މުދައްރިސުކަން ޖަމާލުއްދީން ސުކޫލާއި އަހުމަދިއްޔާ ސުކޫލާއި އަމީނިއްޔާ ސުކޫލާއި ޅ. އަތޮޅު މަދަރުސާ އާއި ފަރީދިއްޔާ ސުކޫލުގެ އިތުރުން ޣާޒީ ސުކޫލުގައި ވެސް އަދާކުރައްވާފަ އެވެ.

މީއީ ހުޅުމާލޭގައި މިދިޔަ މަހެއްހާ ދުވަހުގެ ތެރޭގައި އެކްސިޑެންޓްވެ ފަރުވާ ދެމުން ދަނިކޮށް ނިޔާވި ދެ ވަނަ މީހާ އެވެ. ހުޅުމާލޭ ވިނަރެސް ފްލެޓްތައް ކައިރީ ހިނގި އެކްސިޑެންޓެއްގައި އަނިޔާވެގެން ފަރުވާ ދެމުން ދަނިކޮށް މަރުވީ 9 އަހަރުގެ އަންހެން ކުއްޖެކެވެ.