ރަސްމާލެ މެރީނާ މަޝްރޫއު ހިންގަން އާ ގާނޫނަކާއި އިތުރު އެއްބަސްވުންތައް ހަދާނެ: އުޝާމް

ޔޫނުސް އިބްރާހިމް

29 ސެޕްޓެމްބަރ 2026 - 19:44

0 comments

ރަސްމާލޭގައި ހިންގުމަށް ހަމަޖެހިފައިވާ މަޝްރޫއު ކުރިއަށް ގެންދާނީ އާ ގާނޫނެއްގެ ދަށުން ކަމަށް އެޓާނީ ޖެނެރަލް އަހުމަދު އުޝާމް ވިދާޅުވެއްޖެއެވެ.

އެ މަޝްރޫއު ހިންގަން ޔުނައިޓެޑް އަރަބް އެމިރޭޓްސް (ޔޫއޭއީ)ގެ އީގަލް ހިލްސްއަށް ރަސްމާލެއިން 500 ހެކްޓަރުގެ ބިން 99 އަހަރަށް ކުއްޔަށް ދިނުމަކީ އެ ބިން ވިއްކާލުން ކަމަށް ކުރީގެ ރައީސް އަބްދުﷲ ޔާމީނު ރޭ ސިފަކުރެއްވި އެވެ.

ޔާމީންގެ އެ ތުހުމަތަށް ރައްދު ދެއްވައި، އެކްސްގައި ކުރެއްވި ޕޯސްޓެއްގައި އުޝާމް ވިދާޅުވީ ރަސްމާލެ މަޝްރޫއު ފެށުމުގެ ކުރިން "ޑެފިނިޓިވް އެގްރިމެންޓްތަކެއް" ގައި ސޮއިކުރަން ޖެހޭނެ ކަމަށާއި އޭގެ ކުރިން އެކަމާ ގުޅޭ ގާނޫނުތައް ރައްޔިތުންގެ މަޖިލީހުން ފާސްކުރަން ޖެހޭނެ ކަމަށެވެ.

"ރަސްމާލޭގައި ހިންގުމަށް ރާވާފައިވާ މަޝްރޫއު ގަވަން ކުރާނީ މިހާރު އެކުލަވާލަމުން އަންނަ ރިއަލް އެސްޓޭޓް ގާނޫނުގެ ދަށުން. މި މަޝްރޫއާ ގުޅިގެން މިހާތަނަށް ސޮއިކޮށްފައިވަނީ ހަަމައެކަނި ލެޓާ އޮފް އިންޓެންޓް (ކޮމާޝަލް ޓަރމްސް އެގްރީމެންޓް) އެއްގައި. މަޝްރޫއު ފެށުމުގެ ކުރިން މި އެގްރީމެންޓްގައިވާ ޓާމްސްތަކުގެ މައްޗަށް ބިނާކޮށް އިތުރަށް މަޝްވަރާ ކޮށްގެން އެކުލަވާލާ ޑެފިނިޓިވް އެގްރީމެންޓްތަކެއްގައި ސޮއިކުރުމުގެ އިތުރުން މިކަމާ ގުޅުން ހުރި ގާނޫނުތައް މަޖިލީހުން ފާސްކުރަންޖެހޭނެ،" އެ ޕޯސްޓްގައި އޭޖީ ވިދާޅުވި އެވެ.

ރަސްމާލޭގައި ހިންގަން އުޅޭ މަޝްރޫއުއާ ވަރަށް ބޮޑަށް ދެކޮޅު ހައްދަވަމުން ގެންދަވާ ޔާމީން ވަނީ އެއީ ގައުމު "ވިއްކާލުން" ކަމަށް ސިފަކުރައްވައި އެކަމާ ގުޅިގެން އެޓާނީ އުޝާމަށާއި ހައުސިން މިނިސްޓަރު ޑރ. އަބްދުﷲ މުއްތަލިބަށް ގާނޫނީ ފިޔަވަޅު އެޅޭނެ ކަމަށް ވިދާޅުވެ އިންޒާރު ދެއްވައިފި އެވެ.

މި މަޝްރޫއާ ގުޅިގެން ސަރުކާރުން ވެފައިވާ އެއްބަސްވުމަކީ ގާނޫނުއަސާސީގެ 250 ވަނަ މާއްދާއާ ހިލާފު އެއްބަސްވުމެއް ކަމަށް ބުނެ އެ އެއްބަސްވުން ބާތިލުކުރަން ސުޕްރީމް ކޯޓަށް ދުސްތޫރީ މައްސަލައެއް ވެސް މިހާރު ވަނީ ހުށަހަޅާފަ އެވެ.