ރަސްމާލެ މަޝްރޫއުއިން 11 ބިލިއަން ޑޮލަރުގެ އާމްދަނީއެއް ލިބޭނެ: މިނިސްޓަރު

އަބްދުﷲ މައުރޫފް

30 ސެޕްޓެމްބަރ 2026 - 22:52

0 comments

ރަސްމާލޭގައި ހިންގުމަށް ހަމަޖެހިފައިވާ ބިޔަ މަޝްރޫއު އިން ދައުލަތަށް 11 ބިލިއަން ޑޮލަރު ލިބޭނެ ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެ އެވެ.

"މޯލްޑިވްސް ވޯޓާފްރޮންޓް އެންޑް މެރީނާ" ގެ ނަމުގައި ރަސްމާލޭގައި ބޮޑު މަޝްރޫއެއް ހިންގަން ޔޫއޭއީގެ ރިއަލް އެސްޓޭޓްގެ އެންމެ ބޮޑު އެއް ކުންފުނި ކަމަށްވާ އީގަލް ހިލްސްއާ އެކު ސަރުކާރުން ވަނީ ކޮމާޝަލް ޓާމްސް އެއްބަސްވުމެއްގައި ސޮއިކޮށްފަ އެވެ.

އެކަމާ ގުޅިގެން ކުރެއްވި ޕޯސްޓެއްގައި ޒަރީރު ވިދާޅުވި ގޮތުގައި އެއީ 500 ހެކްޓަރުގެ ސަރަޙައްދެއްގައި 20 ބިލިއަން ޑޮލަރުގެ "ވޯޓަ ފްރަންޓް އެންޑް މެރީނާ" މަޝްރޫއެއް 10 އަހަރު ދުވަހުގެ މުއްދަތަށް ބަހާލައިގެން ތަރައްގީކުރުމަށް ވެފައިވާ އެއްބަސްވުމެކެވެ. އަދި އެ މަޝްރޫއުގެ ދަށުން ދިރިއުޅޭނެ ގެދޮރާއި ހޮޓާތަކާއި ރިސޯޓުތަކާއި މެރީނާގެ އިތުރުން ފިހާރަތަކާއި އޮފީސްތަކާއި ތައުލީމީ އަދި ސިއްހީ ހިދުމަތްދޭ މަރުކަޒުތައް ގާއިމުކުރުމަށް ވަނީ ޕްލޭންކޮށްފަ އެވެ.

މަޝްރޫއާ ގުޅޭ ގޮތުން މިނިސްޓަރު ހަސަން ޒަރީރު ވިދާޅުވީ "މޯލްޑިވްސް ވޯޓާ ފްރަންޓް އެންޑް މެރީނާ" މަޝްރޫއުގެ 10 އަހަރުގެ މުއްދަތުގެ ތެރޭގައި ދައުލަތަށް އާމްދަނީގެ ގޮތުގައި 11 ބިލިއަން އެމެރިކާ ޑޮލަރަށްވުރެ ބޮޑު އާމްދަނީއެއް ލިބޭނެ ކަމަށާއި މިއީ އަހަރަކު އެވްރެޖްކޮށް 1.1 ބިލިއަން އެމެރިކާ ޑޮލަރު ކަމަށެވެ.

މި މަޝްރޫއުން އަހަރަކު ލިބޭނެ ކަމަށް އަންދާޒާކުރާ އާމްދަނީއަކީ، ރާއްޖޭގައި މިހާރު ހިންގަމުންދާ 179 ރިސޯޓާއި، 16 ހޮޓަލާއި، 920 ގެސްޓްހައުސް އަދި 165 ސަފާރީ އުޅަނދުން ޖުމްލަކޮށް އަހަރަކު ދައުލަތަށް ލިބޭ އާމްދަނީއަށްވުރެ އިތުރު އަދަދެެއް ކަމަށް ޒަރީރު ވިދާޅުވި އެވެ.

މި މަޝްރޫއުގެ އެއްބަސްވުމުގެ ކަނޑައެޅިފައިވާ ރޭޓުގައި ޓީޖީއެސްޓީ ލިބޭނެ ކަމަށާއި ޕްރޮޕަޓީތައް ފުރަތަމަ ފަހަރަށް ވިއްކައިގެން އަދި ކުއްޔަށް ދީގެން ޑިވެލޮޕަރަށް ލިބޭ އާމްދަނީގެ 10 ޕަސެންޓް ދައުލަތަށް ލިބޭނެ ކަމަށް މިނިސްޓަރު ވިދާޅުވި އެވެ. މީގެ އިތުރުން، ފުރަތަމަ ފަހަރަށް މިލްކުވެރިކަން ހޯދާ ފަރާތްތަކާއި، އޭގެ ފަހުން މިލްކުވެރިކަން ބަދަލުވާ ކޮންމެ ފަހަރަކު އަގުގެ ހަތަރު އިންސައްތަ ދައުލަތަށް ދައްކަންޖެހޭކަން މިނިސްޓަރު ފާހަގަކުރެއްވި އެވެ.

މިނިސްޓަރު ހަސަން ޒަރީރު ވިދާޅުވީ މި އެއްބަސްވުމުގެ ދަށުން ޓެކްސް އަދި ޑިއުޓީ މާފު ނުވާނެ ކަމަށާއި މި މަޝްރޫއު ތަރައްގީ ކުރުމަށް ސަރުކާރުން އެއްވެސް ލޯނެއް ނުނަގާނެ ކަމަށެވެ. އަދި ސޮވެރިން ގެރެންޓީ އެއްވެސް ނުދޭނެ ކަމަށް ވިދާޅުވި އެވެ.

މިނިސްޓަރު ވިދާޅުވި ގޮތުގައި މިއީ ރާއްޖޭގެ ފަތުރުވެރިކަމުގެ ސިނާއަތް އިތުރަށް ވަރުގަދަވެ، ދިގު މުއްދަތުގެ އިގުތިސޯދީ ކުރިއެރުމަށް މަގުފަހިވެގެންދާނެ ކަމެކެވެ.