ރަސްމާލެ މަޝްރޫއުގެ ކޮންޓްރެކްޓް މަޖިލީހަށް ފޮނުވަން އެދިއްޖެ

އަބްދުﷲ މައުރޫފް

29 ސެޕްޓެމްބަރ 2026 - 19:51

0 comments

މަހުޖަނުން ދިރިއުޅުމަށް ބޮޑު ސިޓީއެއް ތަރައްގީކުރުމަށް ރަސްމާލެއިން 500 ހެކްޓަރުގެ ބިން ޔޫއޭއީގެ އީގަލް ހިލްސްއަށް ދޭ މަޝްރޫއުގެ ކޮންޓްރެކްޓް ވީހާވެސް އަވަހަކަށް ރައްޔިތުންގެ މަޖިލީހަށް ފޮނުވުމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ރަސްމާލޭގައި ވޯޓަފްރަންޓް މެރީނާއެއް ތަރައްގީކޮށް، އެ އެއްބަސްވުމުގެ ދަށުން 5،000 ހައުސިން ޔުނިޓް އެޅުމަށް އީގަލް ހިލްސްއާ އެކު ދިވެހި ސަރުކާރުން 20 ބިލިއަން ޑޮލަރު (309 ބިލިއަން ރުފިޔާ)ގެ އެއްބަސްވުމެއްގައި މިދިޔަ ހޯމަ ދުވަހު ވަނީ ސޮއިކޮށްފަ އެވެ.

ހައުސިން ޔުނިޓުގެ މަސައްކަތް އަންނަ އަހަރުގެ ކުރީކޮޅު ފެށޭނެ ކަމަށް ސަރުކާރުން ވަނީ ބުނެފަ އެވެ.

ނަޝީދު އެކްސް ގައި ވިދާޅުވީ އެމަނިކުފާނަށް ފެންނަ ގޮތުގައި ސަރުކާރަށް އެންމެ ރަނގަޅު ގޮތަކަ ށްވާނީ ކޮންޓްރެކްޓް އަވަހަށް މަޖިލީހަށް ފޮނުވުން ކަމަށާ މި ސަރުކާރުގެ އަގުލަބިއްޔަތުން މި މަޝްރޫއުއަށް ބޭނުންވާ ގާނޫނީ އޮނިގަނޑު ފާސްކުރުން ކަމުގައި ވިދާޅުވެފަ އެވެ.

ރައީސް ނަޝީދު ވިދާޅުވީ އުސޫލެއްގެ ގޮތުން ރެސިޑެންސީ ޕްރަގްރާމްއަކަށް ރާއްޖެ ހުޅުވާލުމަކީ ރަނގަޅު ކަމެއް ކަމަށެވެ. ނަމަވެސް މި ސަރުކާރުން އީގަލް ހިލްސްއާއެކު ވެފައިވާ އެއްބަސްވުން އަދި އާންމު ނުކުރައްވާ ކަމަށާ މިހާތަނަށް އިވިފައިވާ ވާހަކަތަކުން އޮތީ ދެ މައްސަލައެއް ކަމަށެވެ.

އިދިކޮޅު މައި ޕާޓީގެ އެންމެ އިސް ލީޑަރުގެ ހައިސިއްޔަތުން އެ މަޝްރޫއަށް ތާއީދުކުރައްވަންތޯ ނޫސްވެރިއާ ސުވާލުކުރުމުން ނަޝީދު މިފަހުން ވިދާޅުވީ އެމްޑީޕީއަކީ ސެންޓާ ރައިޓް ޕާޓީއެއް ކަމަށާއި ޕްރައިވެޓައިޒޭޝަނާއި ބޭރުގެ އިންވެސްޓްމެންޓް ގެނައުމަށް އެ ޕާޓީން ތާއީދުކުރާ ކަމަށެވެ.

އެކަމަކު ޕާޓީއެއްގެ ހައިސިއްޔަތުން އެމްޑީޕީގެ ސިޔާސަތު އެ މަނިކުފާނަށް ކަނޑަނޭޅުއްވޭނެ ކަމަށް ވެސް ނަޝީދު ވިދާޅުވި އެވެ. އެމްޑީޕީގެ ސަރުކާރެއްގައި އެ މަޝްރޫއާ މެދު އަމަލު ކުރާނެ ގޮތް ކަނޑައަޅާނީ ރިޔާސީ އިންތިހާބުގެ މެނިފެސްޓޯގައި ކަމަށް ވެސް ނަޝީދު ވިދާޅުވި އެވެ.