ވަތަނީ ހިދުމަތުގެ ކުރިމަގު ވަރަށް އުޖާލާ: ރައީސް

އިސްމާއިލް ރިޒާ

01 އޮކްޓޫބަރ 2026 - 10:32

0 comments

ދިވެހި ވަތަނީ ހިދުމަތުގެ ބައިވެރިންތަކެއްގެ ތަމްރީން ހެދުމަށް ގިރިފުށި ޓްރެއިނިން ސެންޓަރުގައި

ދިވެހި ޒުވާނުން ހެޔޮގޮތުގައި ބައްޓަން ކުރުމުގެ މަގުސަދުގައި ސަރުކާރުން މީގެ އެއް އަހަރު ކުރިން ތައާތަފުކުރި ދިވެހި ވަތަނީ ހިދުމަތުގެ ކުރިމަގު ފެންނަނީ ވަރަށް އުޖާލާކޮށް ކަމަށާއި އިތުރު ދާއިރާތައް ވެސް ތައާރަފު ކުރައްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ސިފައިންގެ ބެލުމުގެ ދަށުން ކުރިއަށް ގެންދާ ވަތަނީ ހިދުމަތުގެ ޕްރޮގްރާމްގެ އަަސާސީ ތަމްރީނުގެ ތިން ބެޗް މިހާތަނަށް ހިންގާފައިވާ އިރު، މި މަހުގެ މެދުތެރޭގައި ހަތަރު ވަނަ ބެޗް ފަށަން ވެސް އަންނަނީ ތައްޔާރުވަމުންނެވެ.

ވަތަނީ ހިދުމަތުގެ ޕްރޮގްރާމަކީ ސީދާ އެ މަނިކުފާނުގެ އިސްނެންގެވުމަކަށް އެއް އަހަރު ކުރިން ރާއްޖެ އަށް ތައާރަފުކުރި ޕްރޮގްރާމެކެވެ. އޭގެ މަގުސަދަކީ ސަރުކާރުން ބުނެފައިވާ ގޮތުގައި ދިވެހި ގައުމިއްޔަތަށް ލޯބިކުރާ، އިސްލާމްދީނަށް ފަރުވާތެރި، ޒިންމާދާރު، ޖިސްމާނީ ގޮތުންނާއި ރޫހާނީ އަދި ނަފުސާނީ ގޮތުން ދުޅަހެޔޮ ބަޔަކު ތަމްރީން ކުރުމެވެ.

މި ޕްރޮގްރާމް އަހަރެއްވުމާ ގުޅިގެން ރައީސް މިއަދު ސޯޝަލް މީޑިއާ ޕޯސްޓެއްގައި ވަނީ ދިވެހި ޒުވާނުންގެ ކުރިމަގު ބައްޓަންކޮށް އުޖާލާކޮށް ދިނުމުގެ މުޅިން އާ ރާސްތާއެއް ފަހިކޮށް ދިނުމުގެ ނިޔަތާއި އުންމީދުން ފުރިގެންވި އަޒުމާއެކު 1 އޮކްޓޯބަރު 2025 ގައި ސަރުކާރުން ފެށި ދިވެހި ވަތަނީ ހިދުމަތަށް މިއަދަށް އެއް އަހަރު ފުރިފައިފައިވާތީ މިހާތަނަށް ތަމްރީނުތައް ފުރިހަމަކުރި ޒުވާނުންނަށާއި ޢާއިލާތަކަށް ތަހުނިޔާ ވެސް ދަންނަވައިފަ އެވެ.

ރައީސް ވިދާޅުިވީ ވަތަނީ ހިދުމަތުގެ ތެރެއިން ކޮންމެ އަހަރަކު އެއްހާސް ޒުވާނުން ތަމްރީނު ކުރުމަށް ސަރުކާރުން ކަނޑައެޅި ލަނޑުދަނޑި ފުރަތަމަ އަހަރު ވެސް ހާސިލް ކުރެވިފައިވާ ކަމަށެވެ އަދި ފާއިތުވި އެއް އަހަރުގެ ތެރޭގައި ޒުވާނުންނަށްޓަކައި، ދިވެހި ވަތަނީ ހިދުމަތުގެ ތެރެއިން ކާމިޔާބު އަދި އުފެއްދުންތެރި މަސައްކަތްތަކެއް ކުރެވިފައިވާ ކަމަށް ވިދާޅުވި އެވެ.

އެ ޕްރޮފްރާމްގެ ދަށުން މިހާތަނަށް 1،028 ދިވެހި ޒުވާނުން ތަމްރީނުކޮށްފައިވެ އެވެ. އަދި އެ ތަމްރީނަށް ފަހު ނޭޝަނަލް ސާވިސް ސްކިލް ޓްރޭނިން ޕްރޮގްރާމުން 136 ޒުވާނުން ތަމްރީނުވެފައިވެ އެވެ.