ހިއްސާގެ ބާޒާރު ހިންގަން ސަރުކާރުން ކުންފުންޏެއް އުފައްދައިފި

އިސްމާއިލް ރިޒާ

01 އޮކްޓޫބަރ 2026 - 17:54

0 comments

ކުންފުނީގެ ޤާނޫނުގެ 15 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚުތިޔާރުގެ ދަށުން، "ނޭޝަނަލް އެކްސްޗޭންޖް ލިމިޓެޑް" ގެ ނަމުގައި ސަރުކާރުގެ ކުންފުންޏެއް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މިއަދު އުފައްދަވައިފި އެވެ.

މި ކުންފުނި އުފެއްދެވީ ރައީސުލްޖުމްހޫރިއްޔާގެ ނަންބަރު 2026/16 ޤަރާރުންނެވެ.

ރައީސް އޮފީހުން ބުނީ އެ ކުންފުންޏަކީ ސަރުކާރުގެ މާލީ ބޭނުންތަކާއި އިސްލާމީ މާލީ ދާއިރާ ފުޅާވަމުންދާއިރު، ސަރުކާރުގެ އެހީތެރިކަމާ އެކު ދެވަނަ ހިއްސާގެ ބާޒާރެއް ކުރިޔަށް ގެންދިޔުމަށް އުފެއްދި ކުންފުންޏެއް ކަމަށެވެ.

އެ ކުންފުނީ އުފެއްދުމުގެ މަގުސަދު:

ދިވެހި ސަރުކާރުގެ ފަރާތުން ރާއްޖޭގެ ކެޕިޓަލް މާކެޓް ކުރިއެރުވުން
މާކެޓުގެ އިތުބާރާއި ދެފުށް ފެންނަ މިންވަރު އިތުރުކުރުން
ޒަމާނީ ސެކިއުރިޓީ އެކްސްޗޭންޖުތަކާއި ޓްރޭޑިން ފެސިލިޓީތައް ގާއިމުކޮށް ހިންގުން
ދައުލަތުގެ ސެކިއުރިޓީޒް އާއި އިސްލާމީ ޝަރީއާގެ ހަމަތަކަށް ފެތޭ ސުކޫކާއި އެހެނިހެން މާލީ ވަސީލަތްތައް ނެރުމާއި ލިސްޓުކުރުން
މުއާމަލާތުކުރުމުގެ މަގުފަހިކޮށްދިނުމާއި ސެންޓްރަލް ސެކިއުރިޓީޒް ޑިޕޮސިޓަރީ އާއި ކްލިއަރިން އަދި ސެޓްލްމަންޓުގެ ޒަމާނީ ޕޯސްޓް ޓްރޭޑް ހިދުމަތްތައް ފޯރުކޮށްދިނުން

އޭގެ އިތުރުން ރާއްޖެ އާއި ރާއްޖެއިން ބޭރުގެ މާލީ މުއައްސަސާތަކާ ގުޅިގެން ރާއްޖޭގައި ހަރުދަނާ އަދި ދެމެހެއްޓެނިވި މާލީ ބާޒާރެއް ބިނާކުރާނެ ކަމަށް ވެސް ރައީސް އޮފީހުން ބުންޏެވެ.

ރާއްޖޭގެ ހިއްސާގެ ބާޒާރުގައި ސަރުކާރުގެ ފުރިހަމަ ބާރު ހިނގާ މިފަދަ ކުންފުންޏެއް އުފެއްދިއިރު، މިހާރު ރާއްޖޭގައި ސެކިއުރިޓީސްތަކާއި ހިއްސާ ލިސްޓުކޮށްގެން ހިންގަމުން އަންނަ މޯލްޑިވްސް ސެކިއުރިޓީސް އެކްސްޗޭންޖް (އެމްއެސްއީ) އަކީ އަމިއްލަ ވިޔަފާރިތަކުގެ ހިއްސާ އޮންނަ ކުންފުންޏެކެވެ. ރާއްޖޭގެ މުޅި ހިއްސާގެ ބާޒާރު ރެގިއުލޭޓްކޮށް ބަލަހައްޓާ މައި މުއައްސަސާއަކީ ކެޕިޓަލް މާކެޓް ޑިވެލޮޕްމަންޓް އޮތޯރިޓީ (ސީއެމްޑީއޭ) އެވެ.