އެމްޓީސީސީގެ އަހަރީ އާންމު ޖަލްސާ މި މަހުގެ 29 ގައި

ޔޫނުސް އިބްރާހިމް

18 އޮކްޓޫބަރ 2026 - 10:19

0 comments

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީ، އެމްޓީސީސީގެ 2025ވަނަ އަހަރުގެ އަހަރީ އާންމު ޖަލްސާ މިމަހުގެ 29ވަނަ ދުވަހު ބޭއްވުމަށް ނިންމައިފި އެވެ.

އެމްޓީސީސީން ބުނީ އެ ޖަލްސާ ފެށުމަށް ހަމަޖެހިފައި ވަނީ މި މަހުގެ 29 ވާ ދުވަހުގެ ރޭގަނޑު 20:30 ގައި ކަމަށެވެ. ބައްދަލުވުން ކުރިއަށްދާނީ މޯލްޑިވްސް ސެކިއުރިޓީޒް ޑިޕޮސިޓަރީގެ "ފަހިވޯޓް" ޕޯޓަލް މެދުވެރިކޮށް އޮންލައިންކޮށްކަމަށް އެމްޓީސީސީން ބުންޏެވެ.

މި ޖަލްސާގައި ބައިވެރިވުމަށް ރަޖިސްޓްރީކުރުމުގެ ފުރުސަތު ހިއްޞާދާރުންނަށް މިހާރު ވަނީ ހުޅުވާލާފަ އެވެ. އަހަރީ އާންމު ޖަލްސާގައި މޯލްޑިވްސް ސެކިއުރިޓީ ޑިޕޮސިޓަރީގެ އޮންލައިން ވެބް އެޕްލިކޭޝަން "ފަހިވޯޓް" މެދުވެރިކޮށް އޮންލައިންކޮށް ބައިވެރިވެވޭނެކަމަށެވެ.

މި އަހަރުގެ ޖަލްސާގެ އެޖެންޑާގައި ހިމެނޭ ކަންތައްތައް:

2025 ވަނަ އަހަރުގެ ފައިދާއިން ހިއްސާދާރުންނަށް ބަހަން ޑިރެކްޓަރުންގެ ބޯޑުން ހުށަހަޅާފައިވާ ޑިވިޑެންޑް ފާސްކުރުން.
2026 ވަނަ އަހަރަށް ކުންފުނީގެ އެކްސްޓާނަލް އޮޑިޓަރަކު އައްޔަންކުރުމާއި، އެ ފަރާތުގެ އުޖޫރަ ކަނޑައެޅުން.
ކުރިއަށް އޮތް ދައުރަށް އާންމު ހިއްސާދާރުން ތަމްސީލުކުރާނެ ޑިރެކްޓަރުން އިންތިހާބުކުރުން.

އެމްޓީސީސީން މަސައްކަތް ކުރަމުން ދަނީ އޮންލައިން ޕްލެޓްފޯމް މެދުވެރިކޮށް ވީހާވެސް ގިނަ ހިއްސާދާރުންނަށް ފަސޭހަކަމާއެކު މި ޖަލްސާގައި ބައިވެރިވެވޭނެ އިންތިޒާމުތައް ހަމަޖެއްސުމަށް ކަމަށް އެ ކުންފުނިން ބުންޏެވެ.