މާދަމާއަކީ ފިތުރު އީދު ދުވަސް ކަމަށް ކަނޑައަޅައިފި

މަރިޔަމް އަނާ

29 މާޗް 2025 - 22:01

0 comments

ރާއްޖެއަށް ވެސް، މާދަމާއަކީ ފިތުރު އީދު ދުވަސް ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު މިރޭ އިއުލާންކުރައްވައިފި އެވެ.

ފިތުރު އީދު ދުވަހަކީ މާދަމާ ތޯ ނުވަތަ ހޯމަ ދުވަސް ކަމާ މެދު ހިޔާލު ތަފާތުވުން އުފެދިފައި ވަނިކޮށް އިސްލާމިކް މިނިސްޓްރީގެ ހަނދު ސާބިތުކުރާ ކޮމެޓީން މިރޭ ބޭއްވި ބައްދަލުވުމަށްފަހު ކުރި އިއުލާނުގައިވަނީ އިސްލާމީ ބައެއް ގައުމުތަކަށް މިއަދު އިރުއޮއްސުމަށްފަހު ހަނދު ފެނިފައިވާތީ މާދަމާއަކީ އީދު ދުވަސް ކަމަށެވެ.

ރާއްޖެއިން ހަނދު ސާބިތު ކުރުމުގައި އަމަލުކުރާ އުސޫލަކީ ރާއްޖެއަށް ހަނދު ނުފެނުނު ކަމުގައިވީ ނަމަވެސް އިސްލާމީ ގައުމަކަށް ހަނދު ފެނިއްޖެނަމަ ހަނދު ސާބިތުވީ ކަމަށް ބެލުމެވެ. އެގޮތުން ސައުދީ އަރަބިއާއަށް ހަނދު ފެނިފައިވާތީ އެ ގައުމުން ވެސް ވަނީ މާދަމާއަކީ ފިތުރު އީދު ދުވަސް ކަމަށް ނިންމައިފަ އެވެ.

ރާއްޖެއާ އަވަށްޓެރި ގައުމުތަކަށް ބަލާއިރު، އިންޑިއާ، ޕާކިސްތާން އަދި ބަންގްލަދޭޝްގައި އީދު ދުވަސް ކަމަށް ކަނޑައަޅައިފައިވަނީ އަންނަ ހޯމަ ދުވަހެވެ.

ސައުދީ އަރަބިއްޔާގެ އިތުރުން އިސްލާމީ ގިނަ ގައުމުތަކަށް މާދަމާއަކީ ފިތުރު އީދު ކަމަށްވާއިރު، ރާއްޖޭގައި ރޯދަ މަހުގެ ފުރަތަމަ ދުވަސް ވެސް ކަނޑައެޅީ ހަނދު ނުފެންނަނީސް އިސްލާމީ ގިނަ ގައުމުތަކަށް ހަނދު ފެނުމުންނެވެ.