ފިނި ހަނގުރާމައަށްފަހު ބާއްވާ ނޭޓޯގެ އެންމެ ބޮޑު އަސްކަރީ ތަމްރީން ފަށަނީ

އަބޫ ފުރުޤާން ޢޖ

19 ޖެނުއަރީ 2024 - 18:19

0 comments

ފިނި ހަނގުރާމައަށްފަހު ނޭޓޯ އިން ބާއްވާ އެންމެ ބޮޑު އަސްކަރީ ތަމްރީނު އަންނަ ހަފްތާގައި އޮންނާނެ ކަމަށް އެ އިއްތިހާދުގެ އެންމެ އިސް ކޮމާންޑަރ ޖެނެރަލް ކްރިސް ކެވޯލީ އިއްޔެ ބުނެފި އެވެ.

ކެވޯލީ ބުނީ 90000 އަސްކަރީ މީހުން ބައިވެރިވާ މި ތަމްރީނު ޕްރޮގްރާމްގައި ނޭޓޯގެ އިތުރުން މިހާރު ރަޝިއާއި ދެކޮޅު ސްވިޑްން އިންވެސް ބައިވެރިވާނެ ކަމަށެވެ. މި ޑްރިލްތަކުގައި ނޭޓޯގެ ސަރަހައްދީ ޕްލޭންތައް ތަންފީޒު ކުރުމާއި ރަޝިޔާގެ ހަމަލާއަކަށް ރައްދުދޭނެ ގޮތްތައް ރާވާނެއެވެ. ނަމަވެސް ސީދާ ރަޝިއާގެ ނަން މިކަމުގައި ފާހަގަ ނުކުރިޔަސް، ނޭޓޯގެ އެންމެ މަތީ ސްޓްރެޓެޖިކް ޑޮކިއުމަންޓުގައި މޮސްކޯއަކީ މެމްބަރު ގައުމުތަކަށް އެންމެ ބޮޑު އަދި ސީދާ ނުރައްކަލެއް ކަމަށް ފާހަގަކޮށްފައިވެ އެވެ.

1988 ވަނަ އަހަރަށް ފަހު ބާއްވާ އެންމެ ބޮޑު ޑްރިލް އަށް މިޑްރިލް ވެގެންދާއިރު، މަތިންދާބޯޓު އުފުލާ އުޅަނދުތަކުން ފެށިގެން ޑިސްޓްރޯޔަރާއި ހަމައަށް 50 އަށް ވުރެ ގިނަ ބޯޓު ބައިވެރިވާނެކަމަށް ވެސް އެއިއްތިހާދުން ބުނެފައިވެ އެވެ. 80 އަށް ވުރެ ގިނަ ބޮންއަޅާ ޖެޓާއި ހެލިކޮޕްޓަރު އަދި ޑްރޯންގެ އިތުރުން މަދުވެގެން 1،100 ހަނގުރާމަވެރި އުޅަނދު ހިމެނޭއިރު، އޭގެ ތެރޭގައި 133 ޓޭންކާއި 533 އިންފެންޓްރީ ހަނގުރާމަވެރި އުޅަނދު ހިމެނޭކަމަށްވެސް ނޭޓޯއިން ބުންޏެވެ.

މި ޑްރިލްތައް ބާއްވާ ސަރަހައްދުތަކުގެ ތެރޭގައި ރަޝިއާގެ ނުރައްކާ އޮންނަ ބަލްޓިކް ސަރަހައްދު ހިމެނޭނީ މިއީ ރަޝިއާއަށް ދައްކާލާ ބިރެއް ކަމަށް ދިރާސާކުރާ މީހުން ބުނެއެވެ.

އިސްކަރީ ރިޕޯޓްތައް ބުނާ ގޮތުގައި ނޭޓޯގެ މިފަހަރުގެ "އަސްކަރީ ޑްރިލް" މި ބާއްވަނީ، އެ ޖަމާއަތުގެ ތާރީހުގައި ކުރިމަތިވި އެންމެ ހައްސާސީ ދަނޑިވަޅުގަ އެވެ. ރަޝިޔާ އިން ފެބްރުއަރީ 24، 2022 ގައި ޔޫކްރޭނާ ދެކޮޅަށް ފަށައިގެން އުޅޭ ހަނގުރާމައިގެ ސަބަބުން، ނޭޓޯ އަށް ކުރިމަތިވާ ނުރައްކާތައް އިތުރުވެފައިވާތީ އެވެ.

ނޭޓޯގެ މެމްބަރު 31 ގައުމުގެ އޮންނައިރު، ނޭޓޯއާ ގާތް ގުޅުމެއް ބާއްވާ، ލިސްޓްގައި އޮތީ ނިއު ޒީލޭންޑާއި އޮސްޓްރޭލިޔާ އަދި ޖަޕާނާއި ދެކުނު ކޮރެއާ އެވެ. ނޭޓޯ މެމްބަރަކަށް ވުމަށް ބައެއް ގައުމުތަކުން ޝައުގުވެރިކަން ދޭތެރެ ދޭތެރެއިން ފާޅުކުރެ އެވެ. ނޭޓޯ މެމްބަރަކަށް ވުމަށް އެދި އެދި މޮޔަ ގޮވާ އެއް ގައުމަކީ "ޔޫކްރޭން" އެވެ. ޔޫކްރެއިން އަށް ނޭޓޯ އިން ފުރުސަތު ނުދެނީ ރަޝިޔާދެކެ ނޭޓޯގެ މެންބަރު ގައުމުތަކުގެ ވެރިން ގަންނަ ބިރަށެވެ.