ޕޫޓިންއަށް ރައީސްކަމުގެ ފަސްވަނަ ދައުރެއް ލިބިވަޑައިގެންފި

ހަސަން ހަލީމް

18 މާޗް 2024 - 17:44

0 comments

މާ ބޮޑު ވާދަވެރި ކަމެއް ނެތް އިންތިހާބެއްގައި ރަޝިއާގެ މިހާރުގެ ރައީސް ލަޑީމިއާ ޕުޓިން ވެރިކަމުގެ ފަސް ވަނަ ދައުރެއް ވެސް އިއްޔެ ކަށަވަރު ކުރައްވައިވަ އެވެ.

މިއީ ރަޝިއާގެ ވެރިކަމާ 1999 ވަނަ އަހަރު ހަވާލުވެވަޑައިގެންނެވި ޕުޓިން ރިޔާސީ އިންތިހާބު ޖެހިޖެހިގެން ކާމިޔާބު ކުރެއްވި ފަސް ވަނަ ފަހަރެވެ.

މި ނަތީޖާއާއެކު އުމުރުން 71 އަހަރުގެ ޕުޓިން ވެގެން ގޮސްފައި ވަނީ ރަޝިއާގެ ރިޔާސީ އިންތިހާބު އެންމެ ތަފާތު ބޮޑު ނަތީޖާއަކުން ކާމިޔާބު ކުރެއްވި ފުރަތަމަ ރައީސްއަށެވެ.

ޕުޓިންއާ އެންމެ ގާތުން އިންތިހާބުގައި ވާދަކުރެއްވި ކޮމިއުނިސްޓުގެ ކެންޑިޑޭޓު ނިކޮލައި ހަރިޓޮނޮވްއަށް ލިބުނީ އެންމެ ހަތަރު ޕަސަންޓު ވޯޓެވެ.

އިންތިހާބުގެ ނަތީޖާ ސައްހަ ނޫން ކަމަށް އިދިކޮޅު ކެންޑިޑޭޓުން ބުނެފައި ވާއިރު، އެމެރިކާއިން ބުނީ އިދިކޮޅު ކެންޑިޑޭޓުންނަށް ވާދަކުރައްވަން ފުރުސަތު ނުދެއްވައި އިންތިހާބު ބޭއްވީ އިންސާފުވެރިކޮށް ނޫން ކަމަށެވެ.

ރަޝިއާގެ އިލެކްޝަން ކޮމިޝަނުން ބުނާ ގޮތުން ޕޫޓިން އެއްބުރުން ހޮވިވަޑައިގަތުމުން އިންތިހާބުގެ ދެވަނަ ބުރެއް ނޯންނާނެ އެވެ. ދެން އޮންނާނީ ރަސްމީ ނަތީޖާ އިއުލާންކުރުމާއި ރައީސްކަމަށް ޕޫޓިން ވެރިކުރައްވައި ހުވައިކުރެއްވުން ކަމަށް އިލެކްޝަން ކޮމިޝަނުން ބުންޏެވެ.

ރަޝިއާގެ ރައީސްގެ މަގާމަށް ޕޫޓިން ހޮވިވަޑައިގަތުމާ ގުޅިގެން އޭނާ ވަނީ މި އިންތިހާބާ ބެހޭ ގޮތުން ދެތިން ބަހެއް ވިދާޅުވެފަ އެވެ. އޭނާ ވިދާޅުވި ގޮތުން ޔުކްރޭން ހަނގުރާމަ އަކީ ކޮންމެހެންވެސް ކުރަންޖެހިފައި އޮތް ހަނގުރާމައެއް ކަމަށް ރަޝިއާގެ ރައްޔިތުން ބުނެފި އެވެ.

ޕުޓިން ރަޝިއާގެ އިންތިހާބު ކާމިޔާބުކުރެއްވި އިރު، ބައެއް ގައުމުތަކުން ވަނީ މިއީ އިންސާފުވެރި އަދި ދެފުށް ފެންނަ އިންތިހާބެއް ނޫން ކަމަށް ބުނެފަ އެވެ. އޭގެ ތެރޭގައި އެމެރިކާ، ޖަރުމަން އަދި އިނގިރޭސިވިލާތް ފަދަ ގައުމުތައް ހިކެނެ އެވެ.