މެމްބަރުކަމުގެ މުސާރަ އުނިކޮށްދޭން ނަޝީދު އެދިވަޑައިގެންފި

އިސްމާއިލް ރިޒާ

01 އޭޕްރީލް 2024 - 14:39

0 comments

ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީގެ މަގާމު ފުރުއްވަން ގާނާގައި އުޅުއްވަން ޖެހިވަޑައިގެންފައި ވާތީ މި މަހުން ފެށިގެން ރައްޔިތުންގެ މަޖިލީހުގެ މި ދައުރުގެ ބާކީ އޮތް ދުވަސްތަކުގައި މެމްބަރެއްގެ ހައިސިއްޔަތުން ލިބޭ މުސާރަ އުނިކޮށްދެއްވަން މައްޗަންގޮޅި މެދު ދާއިރާގެ މެމްބަރު މުހައްމަދު ނަޝީދު އެދިވަޑައިގެންފި އެވެ.

މިދިޔަ ހަތަރު އަހަރު މަޖިލީހުގެ ރައީސްގެ މަގާމު ފުރުއްވި އަދި ތިން އަހަރެއްހާ ދުވަހު ރާއްޖޭގެ ރައީސްކަން ކުރެއްވި ނަޝީދު މި ވަގުތު ހުންނެވީ ކްލައިމެޓް ވަލްނެރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ މަގާމުގެ ޒިންމާތައް އަދާކުރެއްވުމަށް، ގާނާގަ އެވެ.

މަޖިލީހުގެ ރައީސް މުހައްމަދު އަސްލަމަށް އެޑްރެސް ކުރައްވައި ނަޝީދު ފޮނުއްވި ސިޓީއެއްގައި، އެމަނިކުފާނު ފާހަގަ ކުރެއްވީ ސީވީއެފްގެ މަސައްކަތްތައް ރަސްމީކޮށް ފަށައި ހިންގުމަށް ވަގުތުތަކެއް ނަގާ ކަމަށެވެ. އެކަމަކު ގާނާގެ ޕާލިމެންޓުން ސީވީއެފް ސެކްރެޓޭރިއަޓްގެ ގަރާރު މިހާރު ވަނީ ފާސްކޮށްފަ އެވެ.

އެހެންކަމުން ވީހާވެސް އަވަހަށް އެމަނިކުފާނުގެ އެ މަސައްކަތް ފެއްޓިގެންދާނެ ކަމަށް ސިޓީގައި ފާހަގަ ކުރައްވާފައިވެ އެވެ.

"އެހެންކަމުން އޭޕްރީލް 2024، އިން ފެށިގެން މި ދައުރުގައި ބާކީ އޮތް މުއްދަތަށް އަޅުގަނޑަށް ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން ލިބޭ މުސާރަ އުނިކޮށް ދެއްވުމަށް ދަންނަވަން،" ނަޝީދު ލިޔުއްވާފައިވެ އެވެ.

ނަވާރަވަނަ ރައްޔިތުންގެ މަޖިލީހުގެ ދައުރު ހަމަވާނީ މެއި 28، އަށެވެ. އެހެންކަމުން ދެން ނެގެން އޮންނާނީ މި ފެށުނު އޭޕްރީލް މަހުގެ މުސާރަ އަދި ދެން އޮންނަ މެއި މަހުގެ މުސާރަ އެވެ.

"އެހެންކަމުން، އޭޕްރީލް 2024 އިން ފެށިގެން މިދައުރުގެ ބާކީ އޮތް މުއްދަތަށް އަޅުގަނޑަށް ރައްޔިތުންގެ މަޖިލީސްގެ މެމްބަރެއްގެ ހައިސިއްޔަތުން ލިބޭ މުސާރަ އުނިކޮށް ދެއްވުމަށް ދަންނަވަމެވެ." ނަޝީދުގެ ސިޓީގައި އެދިވަޑައިގެންފައިވެ އެވެ.

ނަޝީދު އެގޮތަށް އެދިވަޑައިގެންނެވިއިރު، މި ދައުރު މި މަހު ނިމޭނެ އެވެ. މިމަހުގެ 21 ވަނަ ދުވަހު މަޖިލީސް އިންތިހާބު އޮންނާނެ އެވެ. އެ އިންތިހާބުގައި ވާދަނުކުރައްވަން ނަޝީދު ވަނީ ނިންމަވާފަ އެވެ.

މި ސަރުކާރު ވެރިކަމަށް ވަޑައިގެންނެވި ހިސާބުން ފެށިގެން ނަޝީދު ވަނީ ސިޔާސީ ކަންކަމާ ދުރަށް ޖެހިވަޑައިގެންފަ އެވެ. ގާނާއަށް ވަޑައިގެންނެވުމުގެ ކުރިން ވެސް އެމަނިކުފާނު އުޅުއްވީ ރާއްޖޭން ބޭރުގަ އެވެ. މަޖިލީސް ޖަލްސާތަކަށް ވަޑައިނުގަންނަވަ އެވެ.