އުފެއްދުންތެރިކަމުގެ މައުރަޒު ފަށައިފި

ހުނައިދާ ޔާސިރު

26 އޮކްޓޫބަރ 2026 - 11:23

0 comments

ދިވެހި އުފެއްދުންތެރިންނާއި މަސައްކަތްތެރިންގެ ފަންނުވެރިކަން އެއް ފުރާޅެއްގެ ދަށުން ދައްކާލުމަށް ބާއްވާ "ދިވެހީންގެ އުފެއްދުންތެރިކަމުގެ މައުރަޒު 2026" ހުޅުމާލޭ ސެންޓްރަލް ޕާކުގައި ރަސްމީކޮށް ރޭ ފަށައިފި އެވެ.

ހުޅުމާލޭގެ ސެންޓްރަލް ޕާކްގައި ކުރިއަށް ގެންދާ މައުރަޒު ރޭ ރަސްމީކޮށް ހުޅުއްވައި ދެއްވީ ރައީސް ޑރ. މުހައްމަދު މުއިއްޒުގެ ދެކަނބަލުންނެވެ.

މިއަހަރުގެ މައުރަޒުގައި 419 ފަރާތަކުން 4,404 އުފެއްދުން ވަނީ ބައިވެރިކޮށްފައެވެ. މިއީ މިދިޔަ އަހަރު 240 ފަރާތަކުން ބައިވެރިކުރި 2,400 އުފެއްދުމާ އަޅާބަލާއިރު %83.5 ގެ ބޮޑު ކުރިއެރުމެކެވެ. މިއަހަރު ބައިވެރިވި ފަރާތްތަކުގެ ތެރޭގައި އެންމެ ބޮޑު ބައެއް ހިއްސާކުރަނީ އަމިއްލަ ފަރުދުންނެވެ. އެގޮތުން 321 އަމިއްލަ ފަރުދަކާއި، 75 ވިޔަފާރިއަކާއި، ނުކުޅެދުންތެރިކަން ހުންނަ 16 ފަރާތެއްގެ އިތުރުން ތަޢުލީމީ ދާއިރާއާއި ޖަމްޢިއްޔާތަކާއި ސަރުކާރު ހިއްސާވާ ކުންފުނިތަކުންވެސް ވަނީ ބައިވެރިވެފައެވެ.

ޖުމްލަ 16 ދާއިރާއަކުން 73 ގިންތިއެއް ހިމެނޭގޮތަށް ކުރިއަށްގެންދާ މި މައުރަޒުގައި އެންމެ ގިނަ އުފެއްދުން ހިމެނެނީ ދިވެހިންގެ ޒަމާންވީ ސަގާފަތާ ގުޅިފައިވާ އަތްތެރި މަސައްކަތުގެ ދާއިރާއިންނެވެ. އެ ދާއިރާއިން 1,695 އުފެއްދުން ބައިވެރިކޮށްފައިވާއިރު، ދެވަނައަށް އެންމެ ގިނަ އުފެއްދުން ހިމެނޭ ކްރިއޭޓިވް އާޓްސް އަދި ޑިޒައިނިންގ ދާއިރާއިން 920 އުފެއްދުން ހިމެނެއެވެ. މީގެ އިތުރުން ކާބޯތަކެތި، ގަހަނާ، ފެޝަން، އަދަބިއްޔާތު، މަސްވެރިކަން، އައިސީޓީ، ދަތުރުފަތުރު އަދި އިޔާދަކުރަނިވި ހަކަތައިގެ ދާއިރާތަކުންވެސް ފާހަގަކޮށްލެވޭ އުފެއްދުންތައް ފެނިގެންދެއެވެ.

މައުރަޒުގައި ތަކެތި ދައްކާލުމަށްޓަކައި މިއަހަރު މި ވަނީ 7 ޑިސްޓްރިކްޓެއް ގާއިމުކޮށްފަ އެވެ. އެއީ މިދިޔަ އަހަރުގެ މައުރަޒުގައި ފެނިގެންދިޔަ 5 ޑިސްޓްރިކްޓާއި، މިއަހަރު އަލަށް ތައާރަފްކުރި އިތުރު 2 ޑިސްޓްރިކްޓެވެ. އަލަށް ތައާރަފްކުރި 2 ޑިސްޓްރިކްޓަކީ ވިޒިޓަ އިކޮނޮމީ ޑިސްޓްރިކްޓް އަދި އިންޓަރނޭޝަނަލް އެގްޒިބިޓާސް ޑިސްޓްރިކްޓެވެ.

މައުރަޒުގެ ޑިސްޓްރިކްޓުތައް:

* މައުރަޒުގެ ވާދަކުރުމުގެ ބައިގައި ބައިވެރިކޮށްފައިވާ ތަކެތި ދައްކާލުމަށް ޚާއްޞަ ޑިސްޓްރިކްޓް
* އުފެއްދުންތެރި އިޤުތިޞާދީ ޙަރަކާތްތަކަށް ޚާއްޞަ، ކްރިއޭޓިވް އިކޮނޮމީ ޑިސްޓްރިކްޓް
* ޓެކްނޮލޮޖީގެ އެކި އުފެއްދުންތަކަށް ޚާއްޞަ، ޑިޖިޓަލް އެންޑް އިނޮވޭޓިވް ޑިސްޓްރިކްޓް
* މުނިފޫހިފިލުމުގެ އެކި ޙަރަކާތްތަކާއި ދިވެހި ސަޤާފީ ޙަރަކާތްތައް ދައްކާލުމަށް ޚާއްޞަ، އެންޓަރޓައިންމަންޓް ޑިސްޓްރިކްޓް
* ކުދި އަދި މެދުފަންތީގެ ވިޔަފާރިތަކުން ފޯރުކޮށްދޭ އެކި ޚިދުމަތްތަކާއި ތަކެތި މާކެޓްކޮށް ވިއްކުމަށް ޚާއްޞަކޮށް ޤާއިމްކުރާ، މާކެޓްޕްލޭސް ޑިސްޓްރިކްޓް
* ފަތުރުވެރިކަމުގެ ދާއިރާގެ އުފެއްދުންތަކާއި ޚިދުމަތްތަކަށް ޚާއްޞަ، ވިޒިޓަރ އިކޮނޮމީ ޑިސްޓްރިކްޓް
* ބައިނަލްއަޤްވާމީ އެކި ފަރާތްތަކުގެ ޚިދުމަތްތައް ދައްކާލުމަށް ޚާއްޞަ، އިންޓަނޭޝަނަލް އެގްޒިބިޓާސް ޑިސްޓްރިކްޓް

މައުރަޒު އަންނަ މަހުގެ 2 އާ ހަމައަށް ކުރިއަށް ގެންދާނެ އެވެ. އަދި މައުރަޒު ކޮންމެ ދުވަހަކުވެސް ހަވީރު 4:00 އިން ރޭގަނޑު 11:00 އާއި ހަމަށް ހުޅުވާފައި ހުންނާނެ އެވެ.