މި މަހު ސްޓެލްކޯގެ ކަރަންޓު ބިލުތައް އާދަޔާއި ހިލާފަށް ބޮޑުވިކަމަށް ބުނާ މައްސަލަ ބަލަން ޔުޓިލިޓީ ރެގިއުލޭޓަރީ އޮތޯރިޓީން ނިންމައިފިއެވެ.

ޔުޓިލިޓީ ރެގިއުލޭޓަރީ އޮތޯރިޓީން މިއަދު ނެރުނު އިއުލާންއެއްގައި ބުނީ ސްޓެލްކޯގެ ކަސްޓަމަރުންނަށް މިދިޔަ މަހު ލިބުނު ބިލު އާދަޔާ ހިލާފަށް ބޮޑުކަމުގެ ޝަކުވާ މީސްމީޑިއާއާއި އެހެނިހެން ވަސީލަތްތައް މެދުވެރިކޮށް އެ އޮތޯރިޓީގެ ސަމާލުކަމަށް އައިސްފައިވާ ކަމަށެވެ. އަދި އެ މައްސަލަ ރަސްމީކޮށް ހުށަހަޅާފައި ނެތް ނަމަވެސް އެކަން ބަލަމުންދާ ކަމަށެވެ.

"ރަސްމީކޮށް މި މައްސަލަ އެއްވެސް ފަރާތަކުން މި އޮތޯރިޓީއަށް ހުށަހަޅާފައި ނުވިޔަސް، މި މައްސަލަ މި އޮތޯރިޓީން ބަލަމުންދާކަމުގައި ދަންނަވަން،" އެ އޮތޯރިޓީން ބުނެ އެވެ.

މި މަހު ލިބުނު ކަރަންޓް ބިލް އާދަޔާ ހިލާފަށް ބޮޑުވެފައިވާތީ އާންމުން ގެންދަނީ ވަރަށް ބޮޑަށް ޝަކުވާ ކުރަމުންނެވެ. ގިނަ ގޭގެއިން 2،000 ރުފިޔާގެ އިތުރުވުމެއް ކަރަންޓް ބިލްގައި ވެއެވެ. ރައްޔިތުންގެ ރުޅިވެރިކަމާއި ޝަކުވާތަކަށް ސްޓެލްކޯއިން ބުނީ ބިލް ބޮޑު ކަމަށް ފެންނަނީ ކުރީން ދެމުން އައި ސަބްސިޑީ ކަނޑާލުމުން ކަމަށެވެ. 

ޖުލައި މަހުގެ ބިލު ބޮޑުކަމަށް ދައްކަނީ އޭގެ ކުރީ މަހު ސަރުކާރުން އެދިގެން 40 ޕަސެންޓުގެ ޑިސްކައުންޓެއް ދިނުމަށްފަހު މި މަހު އެ ޑިސްކައުންޓް ނުދޭތީ ކަމަށް ސްޓެލްކޯއިން މީގެ ކުރިން ވަނީ ބުނެފަ އެވެ.

އަދި ބައެއް ބިލްތައް އިތުރަށް ބޮޑު ކަމަށް ދައްކަނީ މިދިޔަ ދުވަސްތަކުގައި ކަރަންޓް ބިލް ނުދެއްކި ހުރި މީހުން ކުރިއަށް ހުރި މަސްތަކަށް ބަހާލައިގެން ބިލް ދެއްކުމުގެ ފުރުސަތު ދިނުމުން އެ ބައިވެސް މިމަހުގެ ބިލަށް އިތުރުކޮށްފައި އޮތުމުން ކަމަށް ސްޓެލްކޯއިން ވިދާޅުވެއެވެ.