އަސްކަރީ ބަޣާވާތަށްފަހު ގޭބަންދުގައި ހުރި މިޔަންމާގެ ކުރީގެ ލީޑަރު އަން ސަން ސޫކީގެ މައްޗަށް ހަތަރު އަހަރުގެ ޖަލު ހުކުމެއް އިއްވައިފިއެވެ.

މިއަންމާގެ މަދަނީ ސަރުކާރު، ސިފައިން ނުކުމެ މިދިޔަ ފެބްރުއަރީ މަހު ވައްޓާލި ފަހުން ސޫކީ ހުންނެވީ ގޭ ބަންދުގަ އެވެ. ސިފައިންގެ ބަޣާވާތަށް ފަހު ކުރީގެ ސަރުކާރުގެ އިސް ވެރިން ވެސް ތިބީ ބަންދުގަ އެވެ. ސޫކީ ޖަލަށް ގެންދާނެ އިރެއް އަދި ނޭނގެ އެވެ.

ސޫކީގެ ނޭޝަނަލް ލީގު ފޯ ޑިމޮކްރެސީގެ ބައިވެރިޔާ އަދި ކުރީގެ ރައީސް ވިން މިންޓް ވެސް ވަނީ ހަތަރު އަހަރަށް ޖަލަށްލާން ހުކުމްކޮށްފަ އެވެ.

މިޔަންމާގެ އަސްކަރިއްޔާއިން ކުރި ބަޣާވާތާ ދެކޮޅަށް އެގައުމުގައި ބޮޑެތި މުޒާހަރާތަކެއްވެސް ކޮށްފައިވެއެވެ. އަދި އެމުޒާހަރާގެ ބައިވެރިންނާ ދެކޮޅަށް އަސްކަރިއްޔާއިން ދިން ބަޑީގެ ހަމަލާތަކުގައި އެތައްބަޔަކު މަރުވެސް ވިއެވެ.

ގާތްގަނޑަކަށް 50 އަހަރުވަންދެން މިޔަންމާގައި ވެރިކަން ކުރަމުން އައިސްފައިވަނީ އެގައުމުގެ އަސްކަރިއްޔާ އިންނެވެ. ނަމަވެސް 2010 ވަނަ އަހަރު އެކަން ބަދަލުވިއިރު، މިޔަންމާގެ ގާނޫނު އަސާސީ މިހާރު ބުނާގޮތުން އެގައުމުގެ އަސްކަރިއްޔާ އަށް ގާނޫނު ހަދާ މަޖިލީހުން ވަކި މިންވަރަކަށް ގޮނޑިތަކެއް ދޭން ލާޒިމު ކުރެއެވެ. އަދި ބާރުގަދަ ބައެއް ވުޒާރާތައް ވެސް އަސްކަރިއްޔާ އަށް ދޭން އޮންނަނީ ލާޒިމުކޮށްފައެވެ.