މިޔަންމާގެ ލީޑަރު ސޫކީ އަށް އިތުރު ޖަލު ހުކުމެއް!

ހަސަން ހަލީމް

10 ޖެނުއަރީ 2022 - 14:49

0 comments

މިޔަންމާގެ ކުރީގެ ލީޑަރު އަން ސަން ސޫކީ

އަސްކަރިއްޔާ އިން މަގާމުން ދުރުކޮށް ޖަލަށްލާފައިވާ މިޔަންމާގެ ލީޑަރު އަންސަން ސޫކީ، ލައިސަންސް ނެތި ވޯކީ ޓޯކީއެއް ގެންގުޅުނު މައްސަލައެއްގައި ހަތަރު އަހަރަށް ޖަލަށް ލުމަށް އެ ގައުމުގެ މިލިޓަރީ ކޯޓުން މިއަދު ހުކުމްކޮށްފި އެވެ.

މިލިޓަރީ ކޯޓުން މިއަދު ސޫކީ މައްޗަށް ދެ އަހަރުގެ ޖަލު ހުކުމެއް ކުރީ، އިމްޕޯޓް އެކްސްޕޯޓްގެ ގާނޫނާ ހިލާފަށް ރޭޑިއޯއެއް ގެންގުޅެގެން އެއް އަހަރު އަދި އަނެއް އަހަރުގެ ހުކުމެއް އައީ ސިގްނަލް ޖޭމް ކުރާ ސިސްޓަމެއް ގެންގުޅެގެންނެވެ.

ގަވައިދާ ހިލާފަށް ވޯކީޓޯކީ ގެންގުޅުނު މައްސަލައިގައި ދެ އަހަރުގެ ޖަލު ހުކުމެއް އިއްވިއިރު، ކޮވިޑާ ގުޅިގެން އަޅާފައިވާ ފިޔަވަޅުތަކާ ހިލާފުވިކަމަށްބުނެ އިތުރު ދެ އަހަރުގެ ޖަލު ހުކުމެއްވެސް އިއްވާފައިވެއެވެ.

އަން ސަން ސޫކީގެ މައްޗަށް އިތުރު ހަތް ދައުވާއެއް އުފުލިއިރު، އޭގެ ތެރޭގައި ކޮރަޕްޝަންގެ ފަސް ދައުވާއެއް ހިމެނެއެވެ. އަދި ދައުވާތައް ސާބިތުވެއްޖެނަމަ 89 އަހަރުގެ ޖަލު ހުކުމެއް އަންނާނެއެވެ.

މިދިޔަ އަހަރުގެ ކުރީކޮޅު މިޔަންމާގެ އަސްކަރިއްޔާއިން މިޔަންމާގެ ވެރިކަން ކުރާ ޕާޓީގެ އިސްވެރިންތަކެއް ހައްޔަރުކޮށްފައިވަނީ 2020 ވަނަ އަހަރުގެ ނޮވެމްބަރު މަހު އެގައުމުގައި ބޭއްވި ގާނޫނު ހަދާ މަޖިލީހުގެ އިންތިހާބު އޮޅުވާލާފައިވާ ކަމުގެ ތުހުމަތު ކުރުމަށްފަހުއެވެ.

މިދިޔަ އަހަރުގެ ފެބްރުއަރީ މަހު މިޔަންމާގެ އަސްކަރިއްޔާއިން ބަޣާވާތެއްކޮށް، ސޫކީގެ އިންތިޚާބީ ސަރުކާރު ވައްޓާލައި، ލީޑަރުން ހައްޔަރުކުރި އިރު، ސޫކީ މިހާރު ހުރީ ގޭ ބަންދުގައެވެ.

ނޯބަލް އިނާމުވެސް ލިބިވަޑައިގެންފާ ސޫކީގެ މައްޗަށް ދަނީ އެކި ދައުވާތަކާއި ގުޅިގެން ޝަރީއަތް ހިންގަމުންނެވެ. 76 އަހަރުގެ ސޫޗީ ވަނީ އެ ހުރިހާ ދައުވާތަކަށްވެސް އިންކާރު ކުރައްވަމުންނެވެ.

ސޫކީގެ ސަޕޯޓަރުން ގަބޫލުކުރާ ގޮތުގައި، އެ ހުކުމްތަކަކީ އޭނާގެ ސިޔާސީ ހަޔާތް ދުއްވާލުމުގެ ނިޔަތުގައި ކޮށްފައިވާ ހުކުމްތަކެކެވެ. އަދި އޭގެ އަނެއް ބޭނުމަކީ ސިފައިން ބާރުގައި ދެމިތިބުމެވެ.

މިޔަންމާގެ މިލިޓަރީ ސަރުކާރުން ބުނަނީ ސޫކީ މައްޗަށް ކުރި ހުކުމަކީ މިނިވަން ކޯޓަކުން ކުރި ހުކުމެއް ކަމަށާ އަދި އެ ފަނޑިޔާރަކީ ވެސް ސޫކީގެ ވެރިކަމުގައި އައްޔަން ކުރި ފަނޑިޔާރެއް ކަމަށެވެ.

ބަޣާވާތައް ފަހު ސޫކީ އަށް އަދި ނޫސްވެރިންނާއި ބައްދަލު ކުރެއްވިފައެއް ނުވެއެވެ. ރިޕޯޓުތައް ބުނާގޮތުގައި ނޫސްވެރިންނަށް ކޯޓަށް ވަނުން ވެސް ވަނީ މަނާކޮށްފައެވެ.

މިޔަންމާ އަށް ގެނައި ބަޣާވާތާ ދެކޮޅު ހެދުމުގެ ގޮތުން އެގައުމުގައި އަދިވެސް މުޒާހަރާތައް ކުރިއަށް އެބަގެންދެއެވެ. މުޒާހަރާގެ ބައިވެރިންނާއި އެގައުމުގެ އަސްކަރިއްޔާއާ ދެމެދު ވަނީ ހަމަލާތައް ވެސް ބަދަލު ކޮށްފައެވެ. މި މުޒާހަރާތަކުގެ ސަބަބުން ގިނަ އަދަދެއްގެ މީހުން މަރުވެފައިވާ ކަމަށް މީޑިއާތަކުން ރިޕޯޓު ކޮށްފައިވެއެވެ.