މިޔަންމާ މައްސަލައަށް ތަދައްޚުލްވުމަށް ރާއްޖެއަށް ފުރުސަތު ދީފި

އައިމިނަތު ޝިޔާޒާ

14 ޖުލައި 2024 - 18:59

0 comments

އެޓާނީ ޖެނެރަލް އުޝާމް - ފޮޓޯ/އޭޖީ އޮފީސް

އިންޓަނޭޝަނަލް ކޯޓް އޮފް ޖަސްޓިސް (އައިސީ.ޖޭ) ގައި ކުރިއަށް ގެންދާ "އެޕްލިކޭޝަން އޮފް ދަ ކޮންވެންޝަން އޮން ދަ ޕްރިވެންޝަން އެންޑް ޕަނިޝްމަންޓް އޮފް ދަ ކްރައިމް އޮފް ޖެނޮސައިޑް (ދަ ގެމްބިއާ ވ. މިޔަންމާ)" މައްސަލައަށް ވަނުމަށް އެދި ރާއްޖެއިން ހުށަހެޅި ޑެކްލަރޭޝަން އޮފް އިންޓަވެންޝަން ބަލައިގަތުމަށް އައިސީޖޭގެ ފަނޑިޔާރުންގެ އިއްތިފާގުން ނިންމަވައިފި އެވެ.

މިކަމާ ގުޅިގެން ބަންޑާރަ ނައިބުގެ އޮފީހުން ނެރުނު ބަޔާނެއްގައި ބުނީ، މި މަހުގެ ތިން ވަނަ ދުވަހު އައިސީޖޭއިން އެ ގޮތަށް ނިންމާފައި ވަނީ ފަނޑިޔާރުންގެ އިއްތިފާގުން ކަމަށެވެ.

އެގޮތުން، ގަތުލު އާންމުންގެ ކުށް ހުއްޓުވުމާއި އަދަބު ދިނުމާ ގުޅޭ މުއާހަދާގެ މާއްދާތައް މާނަ ކުރުމާ ގުޅޭގޮތުން ރާއްޖޭގެ ޑެކްލަރޭޝަން އޮފް އިންޓަވެންޝަންގައި ހުރި ކަންކަަމަކީ އެ ކޯޓަށް ބެލޭނެ ކަންކަން ކަމަށް ނިންމާފައިވާ ކަމަށް އެ ބަޔާނުގައި ބުނެފައިވެއެވެ.

އިތުރަށް އެ އޮފީހުން ބުނީ، އެ ކޯޓުން މި ފަދައިން ނިންމީ ރާއްޖޭގެ އިންޓަވެންޝަން ބަލައިގަތުމާ މެދު މިޔަންމާއިން އިޢުތިރާޟެއް ހުށަހަޅާފައި ވަނިކޮށް ކަމަށެވެ.

އޭޖީ އޮފީހުން ބުނީ ރޮހިންޖާ މުސްލިމުންނަށް އަދުލުއިންސާފު ހޯދައިދިނުމަށާއި ގަތުލުއާންމުގެ ކުށް ހުއްޓުވުމާއި އަދަބުދިނުމާ ގުޅޭ މުއާހަދާ ތަންފީޒުކުރުމަށް ބައިނަލްއަގުވާމީ މައިދާނުގައި ކުރާ މަސައްކަތްތަކަށް ރާއްޖެއިން އަބަދުވެސް އެއްބާރުލުން ދިނުމުގައި ސާބިތުކަމާއެކީ ދެމި އޮންނާނެ ކަމަށެވެ.

"ރޮހިންޖާގެ މުސްލިމުންނަށް އަދުލު އިންސާފު ހޯދައިދިނުމަށާއި ގަތުލު އާންމުގެ ކުށް ހުއްޓުވުމާއި އަދަބު ދިނުމާ ގުޅޭ މުއާހަދާ ތަންފީޒުކުރުމަށް ބައިނަލްއަގުވާމީ މައިދާނުގައި ކުރާ މަސައްކަތްތަކަށް ދިވެހިރާއްޖެއިން އަބަދުވެސް އެއްބާރުލުން ދިނުމުގައި ސާބިތުކަމާ އެކު ދެމިއޮންނާނެ އެވެ،" ބަންޑާރަނައިބުގެ އޮފީހުގެ ބަޔާނުގައި ބުނެފައިވެ އެވެ.