އަސްކަރީ ބަޢާވާތެއްގައި މަގާމުން ދުރު ކޮށްފައިވާ މިޔަންމާގެ އިދިކޮޅު ލީޑަރު އަންސަންގ ސޫކީގެ މައްޗަށް ކޮށްފައިވާ 4 އަހަރުގެ ޖަލުހުކުމް 2 އަހަރަށް އެގައުމުގެ އަސްކަރިއްޔާއިން ކުޑަ ކޮށްފިއެވެ.

އަދި މީގެ އިތުރުން ހަމަ އެއް ދައުވާއެއްގައި ހުކުމް ކޮށްފައިވާ، މިޔަންމާގެ ކުރީގެ ރައީސް ވިން މިންޓްގެ މައްޗަށް އިއްވާފައިވާ 4 އަހަރުގެ ޖަލުހުމުމްވެސް ވަނީ 2 އަހަރަށް ކުޑަ ކޮށްފައެވެ.

ސޫކީގެ މައްޗަށް ސާބިތުވެފައިވަނީ މިޔަންމާގެ އަސްކަރީ ސަރުކާރާ ދެކޮޅަށް ރައްޔިތުން ތެދުވުމަށް ގޮވާލައި ގައުމުގައި ބައިބައިވުން އުފެދޭގޮތަށް ބަޔާނެއް ނެރުމާއި ކޮވިޑް-19 ކޮންޓްރޯލް ކުރުމަށް މިޔަންމާގެ ސިއްހަތާބެހޭ އިދާރާތަކުން އަމަލުކުރަމުން ގެންދިޔަ ގަވައިދުތަކާ ޚިލާފުވެވަޑައިގަތުންކަމަށް ކޯޓުން ހޯމަ ދުވަހު އިއްވި ހުކުމްގައި ބުނެފައިވެއެވެ.

ކޯޓުގައި ސޫކީގެ ޝަރީއަތް ކުރިއަށް ދިޔަ ގޮތުގެ މާބޮޑު ތަފްސީލެއް ނުލިބެ އެވެ. އެކަމަނާގެ ވަކީލުންނަށް ވެސް ވަނީ މައުލޫމާތު ހާމަކުރުން މަނާކޮށްފަ އެވެ.

ސިފައިން ނުކުމެ ބަޣާވާތްކޮށް ވެރިކަން ވައްޓާލީ މިދިޔަ އަހަރުގެ އާއްމު އިންތިޚާބުގައި މަކަރު ހަދައި އޮޅުވާލާފައިވާ ކަމަށް ބުނެ އެވެ. އެ އިންތިޚާބު ވަނީ ބޮޑު ތަފާތަކުން ސޫކީގެ އެންއެލްޑީން ކާމިޔާބު ކޮށްފަ އެވެ.

މިޔަންމާގެ ކުރީގެ އިސްވެރިންނަށް ޙުކުމުކުރުމަށް ބާއްވައި ޝަރީޢަތުގެ މަޖިލިސްތަކަށް ނޫސްވެރިންނެއް ނުވައްދައެވެ. ބަދަލުގައި ކޯޓުގެ ޙުކުމުތައް ޢާއްމުކުރަނީ މިޔަންމާގެ އަސްކަރިއްޔާއިންނެވެ. ބައިނަލްއަޤްވާމީ އިންސާނީ ޙައްޤުތަކާބެހޭ ޖަމުޢިއްޔާތަކުން ބުނެފައިވަނީ ސޫ ކީއާއި އޭނާގެ ސިޔާސީ ބައިވެރިންނާ ދެކޮޅަށް ކުރަމުންދާ ޝަރީޢަތްތައް ބަލައިނުގަންނަކަމަށާއި ޙުކުމުތައް ކުރަނީ އިންޞާފުވެރިކަމާއެކު ނޫންކަމަށެވެ.

ބަޣާވާތާ ދެކޮޅަށް ނުކުތް އާއްމު ރައްޔިތުންނާ ދެކޮޅަށް ސިފައިން ވަނީ ވަރަށް އަނިޔާވެރިވެފަ އެވެ. ފެބްރުއަރީގެ ފަހުން މިހާތަނަށް ވަނީ 10،600 މީހުން ހައްޔަރުކޮށްފަ އެވެ. މޮނިޓާރިން ގްރޫޕެއް ކަމަށްވާ އެސިސްޓެންސް އެސޯސިއޭޝަން ފޯ ޕޮލިޓިކަލް ޕްރިޒަނާސް އިން ބުނި ގޮތުގައި ބަޣާވާތަށް ފަހު ހިންގި ހަމަނުޖެހުންތަކުގައި ވަނީ 1،303 މީހުން މަރުވެފަ އެވެ.

ސޫކީ މަޝްހޫރުވެފައިވަނީ މިޔަންމާގެ ޑިމޮކްރެޓިކް ލީޑަރުގެ ގޮތުގައެވެ. އިންސާނީ ހައްގުތަކަށް މަސައްކަތް ކުރެއްވި ލީޑަރެއްގެ ގޮތުގައެވެ. މިޔަންމާއަށް ޑިމޮކްރަސީ ގެނައުމަށްޓަކައި ބޮޑެތި ގުރުބާންތަކެއް ވެވަޑައިގެންނެވި ބޭފުޅެއްގެ ގޮތުގައެވެ. މި މަސައްކަތްތަކާ ގުޅިގެން އޭނާގެ ނަން މަޝްހޫރުވެ އޭނާއަށް ބައިނަލްއަގްވާމީ ފެންވަރުގެ ބޮޑެތި އިނާމުތައްވެސް ލިބިވަޑައިގެންނެވިއެވެ.

ނަމަވެސް ޑިމޮކްރަސީއަށް ކުރެއްވި މަސައްކަތްތައް ކާމިޔާބުވެ 2016 ގައި މިޔަންމާގެ ވެރިކަމާ ހަވާލުވެވަޑައިގަތުމަށްފަހު ސޫކީގެ ފަރާތުން ފެނިގެން ދިޔައީ މިއާ މުޅިން ޚިލާފު އަމަލުތަކެކެވެ. ހަރުކަށިކަމާއި އަނިޔާވެރިކަމެވެ. މިޔަންމާގެ ރޮހިންގްޔާ މުސްލިމުންގެ އިންސާނީ ހައްގުތަކާއި ރައްޔިތުކަމުގެ ހައްގުތަކަށް އިހްތިރާމް ނުކުރެއްވުމާއި އެކަމާ އަޅާނުލެއްވުމުގެ ހަރުކަށި އަމަލުތަކެވެ.

މިޔަންމާގެ ސިފައިންނާއި ހަރުކަށި ބުޑިސްޓުން ރޮހިންގްޔާ ދަރިކޮޅުގެ މުސްލިމުންނާ ދެކޮޅަށް 2017 ވަނައަހަރު ހިންގި ގަތްލުއާންމުތައް ހިންގީ ސޫކީގެ ވެރިކަމުގައެވެ. ސޫކީ އެކަމާ އަޅާނުލެއްވުމުގެ އިތުރުން އެޖަރީމާތައް ހުއްޓުވުމަށްވެސް މަސައްކަތް ކުރައްވާފައެއް ނުވެއެވެ.