ހުސްވެފައިވާ ޅ. ކުރެންދޫ ކައުންސިލްގެ ރައީސްގެ މަގާމަށް ބޭފުޅަކު ހޮވުމަށް ބޭއްވި ބައި އިލެކްޝަންގައި ޕީޕީއެމްގެ ކެންޑިޑޭޓް އިސްމާޢީލް މަދީޙު ހޯއްދެވި ކާމިޔާބީ ފާހަގަކުރުމަށް ކުރީގެ ރައީސް ޢަބްދުﷲ ޔާމީން އަބްދުލް ޤައްޔޫމް އެރަށަށް ވަޑައިގަންނަވަން ނިންމަވައިފިއެވެ.

ޕީޕީއެމްގެ ތަރުޖަމާން ހީނާ ވަލީދު ވިދާޅުވީ ރައީސް ޔާމީން ކުރެންދޫއަށް ވަޑައިގަންނަވާނީ މިއަދު ހަވީރު ކަމަށެވެ. އެމަނިކުފާނުގެ އަރިހުގައި ޕީޕީއެމް އާއި ޕީއެންސީގެ އިސް ބޭފުޅުންވެސް ވަޑައިގަންނަވާނެ އެވެ. އަދި މިވަގުތުވެސް ދެ ޕާޓީގެ އިސް ބައެއް ބޭފުޅުން ތިއްބެވީ ކުރެންދޫގައި ކަމަށް ވިދާޅުވިއެވެ.

ހީނާ ވިދާޅުވީ ކުރެންދޫ ބައި އިލެކްޝަންގައި ލިބުނު ކާމިޔާބީ ފާހަގަ ކުރުމުގެ ގޮތުން މިރޭ އެ ރަށުގައި ބާއްވާ ޖަލްސާގައި ރައީސް ޔާމީން ބައިވެރިވެވަޑައިގެން ރައްޔިތުންނާއި މުހާތަބު ކުރައްވާނެ އެވެ. 

މިދިޔަ ހޮނިހިރު ދުވަހު ބޭއްވި ބައި އިލެކްޝަން މަދީހު ކާމިޔާބު ކުރެއްވީ ވެރިކަންކުރާ އެމްޑީޕީގެ ކެންޑިޑޭޓް ޢަލީ ނަސީމާ ވާދަކޮށް 614 ވޯޓުންނެވެ. ނަސީމަށް ލިބިވަޑައިގެންފައި ވަނީ 564 ވޯޓެވެ.

މަދީހު ފިޔަވައި ކުރެންދޫ ކައުންސިލްގައި ދެން ތިއްބެވީ އެމްޑީޕީއަށް ނިސްބަތްވާ ކައުންސިލަރުންނެވެ.

ކުރެންދޫ ކައުންސިލްގެ ރައީސް ހޮވުމުގެ އިންތިހާބާއި ދިމާކޮށް އެމްޑީޕީ އާއި ޕީޕީއެމުން ވަރުގަދަ ކެމްޕެއިނެއް ހިންގި އެވެ. ކެމްޕެއިނަށް ރައީސް ނަޝީދާއި ސަރުކާރުގެ ވަރަށް ގިނަ މިނިސްޓަރުން ކުރެންދޫއަށް ވަޑަައިގަތެވެ. ބައެއް މަޝްރޫއުތައް އަވަސްކޮށް ބައެއް މަސައްކަތްތަކުގެ އަމަލީ ބައި ފެށިއެވެ.

މި އިންތިހާބާ ދިމާކޮށް ރައީސް ޔާމީނާއި އިދިކޮޅުގެ އިސް ވެރީންވެސް ވަނީ ކުރެންދޫއަށް ވަޑައިގެން ކެމްޕެއިން ހިންގަވާފައެވެ.