ޕާކިސްތާންގެ ޝެފަށް ދައުވާ ކޮށްފި

އިސްމާއިލް ރިޒާ

16 ޖޫން 2022 - 13:15

0 comments

ޚާންޖީ ރެސްޓޯރެންޓްގެ ވެއިޓަރަކަށް ހަމަލާދީ މަރާލި މައްސަލައިގައި ހައްޔަރުކުރި މުހައްމަދު އާބިދު

ހުޅުމާާލޭގެ ޚާންޖީ ރެސްޓޯރަންޓުގައި ވެއިޓަރަކަށް ހަމަލާދީ މަރާލި މައްސަލައިގައި ހައްޔަރުކުރި އެތަނުގައި މަސައްކަތްކުރި ޕާކިސްތާނުގެ ކައްކާ އާބިދުގެ މައްޗަށް ދައުވާކޮށްފި އެވެ.

ނިރޮޅު މަގު 19 ގޯޅީގައި ހުންނަ ހާންޖީ ރެސްޓޯރެންޓްގައި މަސައްކަތްކުރާ ބަންގްލަދޭޝް މީހާ މަރައިލީ މިދިޔަ އޭޕްރިލް 16 ވަނަ ދުވަހު އެވެ. އެ ޖަރީމާ ހިންގީ ރޯދަ ވީއްލަން އެއްޗެހި ތައްޔާރުކުރި ވަގުތު ބަންގްލަދޭޝްގެ މީހާ އާއި އެ ރެސްޓޯރަންޓުގެ ޝެފް އަބީދާ ދެމެދު ހިނގި ނުތަނަވަސްކަމެއްގެ ތެރެއިންނެވެ.

ބަންގްލަދޭޝް މީހާގެ ގަޔަށް ވަޅި ހެރުމަށް ފަހު، އަބީދު ވަނީ އެ ތަނުން ފިލައިފަ އެވެ. ފުލުހުން އޭނާ ހޯދީ އެ ރޭ މެންދަމު 2:00 ހާއިރު ހުޅުމާލޭގެ ދެވަނަ ފިޔަވަހީގެ ބީޗް ސަރަހައްދުންނެވެ.

ޕްރޮސެކިއުޓާ ޖެނެރަލްގެ އޮފީހުން ބުނެފައިވަނީ ޕާކިސްތާނު ރައްޔިތެއް ކަމަށްވާ މުހައްމަދު އާބިދު، 16 އެޕްރީލް 2022 ދުވަހުގެ ހަވީރުގެ ވަގުތެއްގައި ހުޅުމާލެ ނިރޮޅުމަގު 19 ނަންބަރު ގޯޅިގައި ހުންނަ ޚާންޖީ ރެސްޓޯރެންޓްގެ ބަދިގެ ތެރޭގައި ބަންގްލަދޭޝްގެ ރައްޔިތަކަށް ތޫނު އެއްޗަކުން ހަމަލާދީ މަރާލިކަމަށް ތުހުމަތުކުރެވުނު މައްސަލައިގައި މުޙައްމަދު އާބިދުގެ މައްޗަށް ދައުވާ ކޮށްފައިވާކަމަށެވެ.

އޭނާގެ މައްޗަށް ދައުވާ ކޮށްފައިވަނީ، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ތޫނުއެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ކުށުގެ ދައުވާއެވެ.

އާބިދަކީ އެ ރެސްޓޯރެންޓްގެ ޝެފެވެ. އޭނާ ހަމަލާދީ މަރާލާފައިވަނީ އެ ރެސްޓޯރެންޓްގެ ވެއިޓަރެކެވެ.

މިމައްސަލައާ ގުޅިގެން އާބިދު މިވަގުތު ހުރީ ޝަރީއަތް ނިމެންދެން ބަންދުކޮށްފައެވެ.

ޚާންޖީ ރެސްޓޯރެންޓްގައި މަސައްކަތްކުރާ ބަންގްލަދޭޝް ވެއިޓަރު އެމްޑީ ޝާހިން މަރާލީ ރެސްޓޯރެންޓް ބަދިގެ ތެރޭގައި އާބިދުއާ އެ ވެއިޓަރާ ދެމެދު ހިނގި ދެބަސްވުމަކަށްފަހު އެވެ. އާބިދު އޭނާ މަރާލިކަމަށް ތުހުމަތުކުރެވެނީ ވަޅިއަކުން ކަރަށާއި މެޔަށް ހަމަލާދީގެންނެވެ.

ޝާހިންގެ ހަށިގަނޑު މިހާރު ވަނީ އެ ގައުމަށް ފޮނުވާލައިފަ އެވެ. ފުލުހުން ބުނި ގޮތުގައި އެމްޑީ ޝާހިންގެ ހަށިގަނޑު ފޮނުވާލީ އާއިލާއިން އެ ކަމަށް އެދުމުންނާއި ކުރަން ޖެހޭ ތަހުލީލުތައް ކުރުމަށް ފަހު އެވެ.