ޗިލްރަންސް އޮމްބަޑްސްޕަރސަން އޮފީހަށް މައްސަލަ ހުށަހަޅަން ނަމްބަރެއް

އަލީ ރާޒީ

24 ޖުލައި 2022 - 00:25

0 comments

ޗިލްޑްރަންސް އޮމްބަޑްސްޕަރސަންގެ އޮފީހަށް މައްސަލަތައް ހުށަހެޅުމަށް ހިލޭ ގުޅޭނެ ނަންބަރެއް ތަޢާރަފުކޮށްފިއެވެ.

ޗިލްޑްރަންސް އޮމްބަޑްސްޕަރސަންގެ އޮފީހަށް 2 އަހަރު ފުރުމާއި ގުޅުވައިގެން، އޮފީހުގެ ރަސްމީ ޓޯލް ފްރީ ނަންބަރު ނުވަތަ ހިލޭ ގުޅޭނެ ނަންބަރެއްގެ ގޮތުގައި އިފްތިތާޙްކޮށްފައިވަނީ 1656 އެކެވެ. މި ހޮޓްލައިން ނަންބަރުގެ ބޭނުމަކީ އާއްމުންނަށް ވީހާވެސް ފަސޭހަކަމާއެކު މައްސަލަތައް ހުށަހެޅޭނެ އިންތިޒާމް ހަމަޖެއްސުންކަމަށް އޮމަބްޑްސްޕަރސަންގެ އޮފީހުން ވިދާޅުވެއެވެ.

އެ އޮފީހުން ބުނީ، އެ ނަންބަރުގެ ސަބަބުން އާންމުންނަށް ވީހާ ވެސް ފަސޭހަކަމާއި އެކު ހުށަހަޅަން ބޭނުންވާ މައްސަލަތައް ހުށަހެޅޭނެ ކަމަށެވެ.

ޗިލްޑްރަންސް އޮމްބަޑްސްޕަރސަންގެ އޮފީހުން ހިލޭ ގުޅޭނެ ހޮޓްލައިން ނަންބަރެއް ތަޢާރަފުކޮށްފައިވާއިރު، އީމެއިލް މެދުވެރިކޮށްގެންނާއި، ސިޓީ މެދުވެރިކޮށްގެންނާއި، އަދި އޮފީހަށް ހާޒިރުވެގެންވެސް މައްސަލަ ހުށަހެޅިދާނެކަމަށް އެ އޮފީހުން ވިދާޅުވެއެވެ.

ޗިލްޑްރަންސް އޮމްބަޑްސްޕަރސަންގެ މަސްއޫލިއްޔަތުތަކުގެ ތެރޭގައި ހިމެނެނީ ދައުލަތުގެ އިދާރާތަކުން ޤާނޫނު ނަންބަރު 2019/19 (ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނު) އަށް ޢަމަލުކުރާ މިންވަރު ދެނެގަނެ، މި ޤާނޫނު ތަންފީޒުކުރުމަށް ކުރަންޖެހޭ ކަންކަން ކުރުމަށް ބާރުއެޅުމާއި، ކުޑަކުދިންގެ ހައްޤުތައް ރައްކާތެރިކުރުމާބެހޭ މުޢާހަދާއާއި އެއްގޮތަށް ދައުލަތުގެ އިދާރާތަކުން އަމަލުކުރާ މިންވަރު ދެނެގަނެ، އެ މުޢާހަދާއާއި އެއްގޮތަށް ޢަމަލުކުރާކަން ކަށަވަރުކުރުމުގެ ގޮތުން ކުރަންޖެހޭ އެންމެހައި ކަންކަން ކުރުމެވެ.

މީގެ އިތުރުން ކުޑަކުދިންގެ ޙައްޤުތައް ރައްކާތެރިކޮށްދިނުމުގައި ހަރަކާތްތެރިވާ އިދާރާތަކާއި މުވައްޒަފުން މޮނިޓަރކޮށް އިވެލުއޭޓްކުރުމުގެ އިތުރުން ކުޑަކުދިންގެ ހައްޤުތައް ރައްކާތެރިކޮށްދިނުމުގައި ހަރަކާތްތެރިވާ އިދާރާތަކާއި މުވައްޒަފުންގެ ޢަމަލުތައް ތަޙުޤީޤުކޮށް މުޠާލިޢާކުރުމަކީ ވެސް އެ އޮފީހުގެ މަސްއޫލިއްޔަތެކެވެ.