ތިންވަނަ ފަރާތެއްގެ ނުފޫޒު އިންޑިއާގެ ފުޓްބޯޅައަށް ވަދެފައިވާކަމަށް ބުނެ ފީފާއިން އިންޑިއާ ސަސްޕެންޑް ކޮށްފިއެވެ.

އިންޑިއާގެ ސުޕްރީމް ކޯޓުން ވަނީ މޭ މަހު، އޯލް އިންޑިއާ ފުޓްބޯޅަ ފެޑެރޭޝަން (އޭއައިއެފްއެފް) ގެ ރައީސް ކަމުގައި ހުންނެވި ޕްރަފުލް ޕަޓޭލް އާއި އޭނާގެ އެކްސްކޯގެ ބާރު ކަނޑުވާލައި، އެފްއޭއެ ހިންގުމަށް ސުޕްރީމް ކޯޓުން ކަނޑައެޅި ކޮމިޓީއަކާ ހަވާލުކޮށްފަ އެވެ.

ރޭ އިންޑިއާ ސަސްޕެންޑް ކުރުމަށް ފަހު ފީފާއިން ނެރުނު ބަޔާނުގައި ބުނެފައި ވަނީ އޭއައިއެފްގެ އެގްޒެކެޓިވް ކޮމިޓީ އާ މުޅި ފެޑެރޭޝަންގެ ކޮންޓްރޯލް އަލުން ހަވާލު ކުރުމަށް ދާންދެން އިންޑިއާގެ ފުޓްބޯޅަ ސަސްޕެންޑް ކުރުމަށް ނިންމާފައިވާ ކަމަށެވެ.

އިންޑިއާގެ ގައުމީ ކުޅިވަރު ކޯޑްގައި ބުނެފައިވާ ގޮތުގައި އެގައުމުގެ އެއްވެސް ކުޅިވަރު ފެޑެރޭޝަނެއް ނުވަތަ އެސޯސިއޭޝަނެއްގެ ރައީސް ކަމުގައި އެކަކަށް އެންމެ ގިނަ ދުވަހު ހުރެވޭނީ 12 އަހަރު ވަންދެނެވެ. އެކޯޑަށް އިންޑިއާއިން އަމަލުކުރަން ފަށާފައިވަނީ 2011 ވަނަ އަހަރުން ފެށިގެންނެވެ.

އޭއައިއެފްއެފްގެ ރައީސްކަމަށް ޕްރަފުލް އެންމެ ފުރަތަމަ ވަޑައިގަތީ 2009 ވަނަ އަހަރުގެ ޑިސެމްބަރު މަހުގައެވެ. އެގޮތުން އޭނާގެ ތިންވަނަ ދައުރު 2020 ވަނަ އަހަރުގެ ޑިސެމްބަރު މަހަށް ހަމަވެފައިވާއިރު އޭނާގެ ދައުރު ހަމަވުމުގެ ކުރިން އޭއައިއެފްއެފްއިން ވަނީ އިންޑިއާގެ ސުޕްރީމް ކޯޓަށް މައްސަލައެއް ވައްދައިފައެވެ.

ކޯޓަށް މައްސަލަ ހުށަހެޅީ އޭއައިއެފްއެފްގެ އަސާސީ ގަވާއިދު މުރާޖާކުރުމުގެ މައްސަލަ 2017 އިން ފެށިގެން ސުޕްރީމް ކޯޓްގައި އޮތުމުން ދެން އަމަލު ކުރާނެ ގޮތެއް ކަނޑައަޅައި ދިނުމަށެވެ.

ފީފާގެ ސަސްޕެންޝަންގެ ސަބަބުން އިންޑިއާގެ ގައުމީ ޓީމަކަށް ވެސް އަދި ކްލަބަކަށް ވެސް އިންޓަނޭޝަނަލް އެއްވެސް މުބާރާތެއްގައި ނުކުޅެވޭނެ އެވެ. އަދި ފުޓްބޯޅައިގެ އިންޓަނޭޝަނަލް އެއްވެސް ހަރަކާތެއް ވެސް އިންޑިއާގައި ކުރިއަށް ނުގެންދެވޭނެ އެވެ.

މީގެ އަސަރު ކުރާނީ އޮކްޓޯބަރު މަހު އިންޑިއާގައި ބާއްވަން ތައްޔާރުވާ 17 އަހަރުން ދަށުގެ އަންހެން ވޯލްޑް ކަޕަށެވެ.

އިންޑިއާގެ ގޮކުލަމް ކެރަލާ އެފްސީގެ އަންހެން ޓީމުން އިއްޔެ ވަނީ އޭއެފްސީ އަންހެން ކްލަބް ޗެމްޕިއަންޝިޕްގައި ވާދަކުރަން އުޒްބެކިސްތާނަށް ގޮސްފަ އެވެ. ސަސްޕެންޝަންގެ ސަބަބުން އެ ޓީމު ވެސް ޖެހޭނީ މުބާރާތް ނުކުޅެ އެނބުރި ގައުމަށް ދާށެވެ.