ހެދުނީ ގޯހެއް، އެކަން ދެން ތަކުރާރެއް ނުވާނެ: އިންފަންޓީނޯ

ހުނައިދާ ޔާސިރު

06 އޯގަސްޓް 2026 - 16:36

0 comments

ގޯސްތަކެއް ހެދިފައިވާ ކަމަށް އިއުތިރާފުވެ، ފީފާގެ ރައީސް ޖިއާނީ އިންފަންޓީނޯ ދުނިޔޭގެ ފުޓްބޯޅަ ކޮމިޔުނިޓީގެ ކިބައިން މައާފަށް އެދިއްޖެ އެވެ.

މޮރޮކޯގެ ރަބާޓްގައި ހުންނަ ފީފާގެ އެފްރިކާ އޮފީހުގައި ބޭއްވި ކުއްލި ސީނިއާ އެގްޒެކެޓިވް ބައްދަލުވުމެއްގައި، ފީފާގެ މެނޭޖްމަންޓް ބޯޑުން ވަނީ އިންފަންޓީނޯއަށް ފުރިހަމަ ތާއިދު އޮތްކަން ހާމަކުރައްވާފަ އެވެ.

ފުރިހަމަ ތާއީދު އޮތްކަން ހާމަކުރުމާ ގުޅިގެން، އިންފަންޓީނޯ ފީފާގެ ރައީސްކަމުގެ މަގާމުގައި ދެމިހުންނަވާނެކަން ވަނީ ކަށަވަރުވެފަ އެވެ. ނެތް ނަމަ އެ މަގާމުގައި އިންފަންޓީނޯއަށް ދެމިހުރުމަށް ދަތިވާނެ އެވެ.

"ހިތުގެ އަޑިން މައާފަށް އެދެމެވެ. އެކަހަލަ ކަމެއް ދެން ތަކުރާރެއް ނުވާނެ އެވެ،" ފީފާގެ ޖެނެރަލް ސެކްރެޓަރީ މަޓިއަސް ގްރާފްސްޓްރޮމްއާ ދެ ބޭފުޅުން އެކުގައި ނެރުއްވި ބަޔާނުގައި އިންފަންޓީނޯ ވިދާޅުވި އެވެ.

މޮރޮކޯގެ ރަބާޓްގައި ބޭއްވުނު 4 ގަޑިއިރުގެ ކުއްލި ބައްދަލުވުމަށްފަހު، އިންފަންޓީނޯ އާއި ގްރާފްސްޓްރޯމް ވަނީ ފީފާގެ 211 މެމްބަރު އެސޯސިއޭޝަނަށް ސިޓީއެއް ފޮނުއްވައި، ކަންކަން ނިންމުމުގައި މެމްބަރުން ބައިވެރިނުކުރެވުނު ކަމަށްޓަކައި މައާފަށް އެދިވަޑައިގެންފަ އެވެ.

އެފްއެފްއީ ޕްރޮޕޯޒަލް މިހާރު މުޅިން އުވާލެވިފައިވާކަން ފީފާއިން ވަނީ ކަށަވަރުކޮށްދީފަ އެވެ. ނަމަވެސް، ޔުއެފާއިން ވަނީ މައްސަލައާ ގުޅޭ އެއްވެސް ލިޔެކިޔުމެއް ނައްތާނުލުމަށާއި، ގާނޫނީ ފިޔަވަޅު އަޅަން ތައްޔާރުވަމުންދާކަމުގެ ރަސްމީ ނޯޓިސް ފީފާއަށް ފޮނުވާފަ އެވެ.

ޔޫރަޕުގެ އިދާރާތަކާއި އިނގިރޭސިވިލާތް އަދި ވޭލްސް ފަދަ ގައުމުތަކުން އިންފަންޓީނޯއާ ދެކޮޅަށް ތެދުވި ނަމަވެސް، އެފްރިކާ އާއި އޭޝިއާގެ ގިނަ ގައުމުތަކެއްގެ ފުރިހަމަ ތާއީދު އަދިވެސް އޮތީ އިންފަންޓީނޯއަށެވެ. އެ ގައުމުތަކުގެ ތެރޭގައި މިސްރު، މޮރޮކޯ، ކޮންގޯ، ފިލިޕީންސް ހިމެނެ އެވެ.

ފީފާގެ އާ އިންތިހާބު އަންނަ އަހަރުގެ މާޗު މަހު އޮންނާނެ އެވެ. ފީފާގެ މެޖޯރިޓީ މެމްބަރު ގައުމުތަކުގެ ތާއީދު އިންފަންޓީނޯއަށް އޮތް ކަަމަށް ބެލެވެ އެވެ. ނަމަވެސް މިހާރު މި ދިމާވި މައްސަލައާ ގުޅިގެން ކުރިއަށް ވުރެ އޭނާއަށް އޮތް ގޮންޖެހުން ބޮޑުވުން ކައިރި އެވެ.

ބައެއް އެސޯސިއޭޝަންތަކުން މިހާރު ވެސް ބުނެފައި ވަނީ އިންފަންޓީނޯއަށް އިތުބާރު ނެތް ކަމަށެވެ.