ސިވިލް ކޯޓުގެ ގާޒީ ކަމަށް އަށް ބޭފުޅުން ކުރިމަތިލައްވައިފި

އަލީ ރާޒީ

29 އޯގަސްޓް 2022 - 15:58

0 comments

ސިވިލް ކޯޓުގެ ގާޒީއެއްގެ ގޮތުގައި ހުންނެވި ޒުބައިރު މުހައްމަދު އިސްތިއުފާ ދެއްވުމާ ގުޅިގެން އެ މަގާމަށް ކުރިމަތިލެއްވުށް ހުޅުވާލުމުން އަށް ބޭފުޅަކު ކުރިމަތިލައްވައިފި އެވެ.

ސިވިލް ކޯޓަށް ޤާޒީއަކު ހޯދުމަށް އިއުލާނު ކޮށްފައިވަނީ އޮގަސްޓް 15 ވަނަ ދުވަހުއެވެ.

އެ މަގާމަށް ކުރިމަތި ލާފައިވަނީ ޢަލީ ނަޞީރު / ގާޑެނިޔާވިލާ، ބ.ކިހާދޫ، ޢަބްދުﷲ ޒާހިރު / ދަފްތަރު، ނަންބަރު ރސ 9175، ކ.މާލެ، މުޙައްމަދު ވިދާން ޝާކިރު / ހ.ހުދުފިނިފެންމާގެ، ކ.މާލެ، އާދަމް ޛާލިފް / އޯކިޑުމާގެ، ގއ.ގެމަނަފުށި، ޢަލީ ނަދީމް / ހ.ގްލޯރިއޯސާ 2، ކ.މާލެ، ނަފީލު މުޙައްމަދު / ލަކީހޯމް، ގއ.ދާންދޫ، ސިނާން ޢަލީ / ސަންޑަލްވޫޑް، ގދ.ފިޔޯރީ އަދި އަޙްމަދު މަޢުޞޫމް / ހަވީރީމަންޒިލް، ލ.މާބައިދޫއެވެ.

ޖޭއެސްސީން ވަނީ ސިވިލް ކޯޓަށް އިތުރު ގާޒީ އަކު ހޯދުމަށް މިމަހުގެ 24 ވަނަ ދުވަހު ވެސް އިއުލާންކޮށްފަ އެވެ. އެ ދުވަހު ގާޒީއަކު ހޯދުމަށް އިއުލާންކުރެއްވީ ސިވިލް ކޯޓުގެ އިސް ގާޒީގެ ގޮތުގައި ހުންނެވި އަބްދުﷲ އަލީ ފަނޑިޔާރުކަމުން ރިޓަޔާކުރެއްވުމާ ގުޅިގެން އޭނާގެ ބަދަލުގަ އެވެ.

ގާޒީ އަބްދުﷲ އަލީގެ ބަދަލުގައި ގާޒީ އަކު ހޯދުމަށް ކުރި އިއުލާންގެ މުއްދަތު ހަމަވާނީ އަންނަ މަހުގެ 11 ވަނަ ދުވަހުގެ ނިޔަލަށެވެ.

ސިވިލް ކޯޓުގެ ގާޒީ އަކަށް އަސާސީ މުސާރައިގެ ގޮތުގައި މަހަކު 30،000 ރުފިޔާއާއި، ލިވިން އެލަވަންސްގެ ގޮތުގައި މަހަކު 15،000 ރުފިޔާއާއި، ރިސްކް އެލަވަންސްގެ ގޮތުގައި މަހަކު 1,650 ރުފިޔާއާ އެކު ޖުމްލަ 46،650 ރުފިޔާ ލިބެ އެވެ.

މީގެ އިތުރުން ރައްޔިތުންގެ މަޖިލީހުން ކަނޑައަޅާ ގޮތެއްގެ މަތިން މެޑިކަލް އިންޝުއަރެންސާއި ފޯނު އެލަވަންސް ލިބޭނެ އެވެ.