އޮމަދޫ ސްކޫލް އަޕްގްރޭޑްކުރުމަށް ޖަޕާނުން 1.2 މިލިއަން ރުފިޔާގެ ހިލޭ އެހީއެއް

އަލީ ރާޒީ

23 އޮކްޓޫބަރ 2022 - 23:13

0 comments

އެހީ ދިނުމުގެ އެއްބަސްވުމުގައި ސޮއިކުރުން. ފޮޓޯ: އެޑިއުކޭޝަން މިނިސްޓްރީ

އދ. އޮމަދޫ ސްކޫލު ތަރައްޤީކުރުމުގެ މަޝްރޫޢުއަށް ޖަޕާނު ސަރުކާރުން 80,000 އަށްވުރެ ގިނަ ޑޮލަރު ނުވަތަ 1.2 މިލިއަން ރުފިޔާގެ ހިލޭ އެހީ ދީފިއެވެ.

ޖަޕާނުން މި ހިލޭ އެހީ ފޯރުކޮށްދީފައިވަނީ އެ ޤައުމުން ކުރިއަށްގެންދާ ގްރާސް ރޫޓްސް ހިއުމަން ސެކިއުރިޓީ ޕްރޮޖެކްޓްސް، ޖީ.ޖީ.ޕީ ސްކީމުގެ ދަށުންނެވެ. މި އެހީ އޮމަދޫ ސްކޫލާއި ޙަވާލުކުރުމަށް އެޑިއުކޭޝަން މިނިސްޓްރީގައި ވަނީ ޚާއްސަ ރަސްމިއްޔާތެއް ބާއްވާފައެވެ.

މި އެހީ ދިނުމުގެ އެއްބަސްވުމުގައި ޖަޕާނު ސަރުކާރުން މިއަދު ވަނީ އޮމަދޫ ސްކޫލާއެކު އެއްބަސްވުމުގައި ސޮއިކޮށްފައެވެ.

ޖަޕާނު ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ އެ ޤައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗި މިދޮރި އެވެ. އޮމަދޫ ސްކޫލުގެ ފަރާތުން ސޮއިކުރެއްވީ އެ ސްކޫލުގެ ޕްރިންސިޕަލް ޙަސަން އާމިރެވެ.

ރާއްޖެއާއި ޖަޕާނާއި ދެ ޤައުމުގެ ދެމެދު ސިޔާސީ ގުޅުން ޤާއިމުކުރިތާ 55 އަހަރު ފުރިފައިވާއިރު, ޖަޕާނަކީ އެކި ދާއިރާތަކުން ރާއްޖެއަށް ބޮޑެތި އެހީތަކެއްވާ ޤައުމެއްކަން ފާހަގަކޮށްލެވެއެވެ.

ޖަޕާނުގެ ޖީ.ޖީ.ޕީ ސްކީމުގެ ދަށުން 1996 ވަނަ އަހަރުން ފެށިގެން ރާއްޖޭގެ ތަޢުލީމީ، ތިމާވެށި، ޞިއްޙީ، ދަތުރުފަތުރު އަދި ހަކަތައިގެ ދާއިރާއަށް އެކި ގޮތްގޮތުން ޖަޕާނުން އަންނަނީ އެހީތެރިކަން ފޯރުކޮށްދެމުންނެވެ.