މައްޔިތެއްގެ ހަށިގަނޑު އާއިލާއާ ހަވާލުނުކޮށް ބޭއްވޭނީ ކޯޓު އަމުރެއްގެ ދަށުން: އާޒިމާ

އަލީ ރާޒީ

28 އޮކްޓޫބަރ 2022 - 14:01

0 comments

ކުރީގެ ބަންޑާރަ ނާއިބު: މަޝްހޫރު ގާނޫނީ ވަކީލާ އަލްއުސްތާޛާ އައިޝަތު އާޒިމާ ޝަކުރޫ -

މައްޔިތެއްގެ ހަށިގަނޑު ފަޅައި ސާމްޕަލް ނެގޭނީ އޭނާގެ ބަދަލުވެރިން ނުވަތަ ވާރިސުންގެ ހުއްދަ ލިބިގެން ކަމަށާއި އެ ނޫން ގޮތަކަށް އެކަން ކުރާ ނަމަ ކޯޓު އަމުރެއް ހޯދަން ޖެހޭ ކަމަށް ކުރީގެ ބަންޑާރަ ނާއިބު އަދި މަޝްހޫރު ގާނޫނީ ވަކީލާ އަލްއުސްތާޛާ އައިޝަތު އާޒިމާ ޝަކުރޫ ރޭ ވިދާޅުވެއްޖެ އެވެ.

އާޒިމާ މިހެން ވިދާޅުވެފައި މިވަނީ ގދ. ހޯޑެއްދޫގައި މިދިޔަ އަންގާރަ ދުވަހު ފުލުހުން ކުރިއަށް ގެންދިޔަ މަސްތުވާތަކެތީގެ ހާއްސަ އޮޕަރޭޝަނެއްގައި ހައްޔަރުކުރި ތިން މީހުންގެ ތެރެއިން އެކަކު ކުއްލި ގޮތަކަށް މަރުވުމާ ގުޅިގެން އެ މީހާގެ އާއިލާގެ ނުރުހުމުގައި ފުލުހުން އޮޓޮޕްސީ ހެދުމަށް ތައްޔާރުވަމުންދާ ވަގުތެއްގަ އެވެ.

މިމައްސަލައިގައި އާޒިމާ ދެކެވަޑައިގަންނަވާ ގޮތް ހާމަކުރައްވަމުން އާޒިމާ ވިދާޅުވީ މިމައްސަލައިގައި ކަންކުރަންވީ ގޮތް ގާނޫނުއަސާސީގައި ވަރަށް ސާފުކޮށް ބަޔާންކޮށްފައިވާ ކަމަށެވެ.

"އެއްވެސް މީހަކު ހިފާ ހައްޔަރުކޮށް 24 ގަޑިއިރަށް ވުރެ ގިނައިރު ހިފެހެއްޓޭނީ ފަނޑިޔާރެއްގެ ކުރިމައްޗަށް އެ މީހަކު ހާޒިރުކުރުމަށްފަހު އެކަމަށް ކޯޓުގެ އަމުރެއް ހޯދައިގެންނެވެ. މި މާއްދާ އަކުން މަރުވެފައި އޮތް މީހެއް އިސްތިސްނާއެއް ނުކުރެވެ އެވެ،" ފޭސްބުކް ޕޯސްޓެއްގައި އާޒިމާ ލިޔުއްވި އެވެ.

އާޒިމާ ވިދާޅުވީ މިވަގުތު އާއިލާ އިން ހަށިގަނޑު ހޯދަން ބޭނުން ނަމަ، އާއިލާއާ ހަށިގަނޑު ހަވާލުނުކޮށް ބޭއްވޭނީ ހަމައެކަނި ކޯޓު އަމުރެއްގެ ދަށުން ކަމަށެވެ.

އާޒިމާ ވިދާޅުވި ގޮތުގައި މައްޔިތެއްގެ ހަށިގަނޑަކީ ވާރިސުންގެ ހައްގެކެވެ. އާއިލާގެ ނުރުހުމުގައި ހަށިގަނޑު ހިފެހެއްޓުމުގެ ބާރެއް އަދި ރާއްޖެއިން ފުރުވާލުމުގެ ބާރާއި ޕޯސްޓްމޯޓަމް ހެދުމުގެ ބާރެއް ވެސް ދައުލަތަށް ލިބިގެން ނުވެ އެވެ.

"މައްޔިތާގެ ހަށިގަނޑަކީ ވާރިސުންގެ ހައްގެކެވެ. އާއިލާގެ ނުރުހުމުގައި ހަށިގަނޑުގެ ބާރެއް، ރާއްޖެއިން ފުރުވާލުގެ ބާރެއް އަދި ޕޯސްޓް މޯޓަމް ހެދުމުގެ ބާރެއް އެއްވެސް ގާނޫނަކުން ލިބިއެއް ނުދެއެވެ".

އަބްދުﷲ ގެ ހަށިގަނޑު އާއިލާއާ ހަވާލުކޮށްދޭން އޭނާގެ އާއިލާއިން އިއްޔެ އެދިފައި ވަނިކޮށް އެންއައިސީން ރޭ ނެރުނު ނޫސްބަޔާނެއްގައި ބުނީ އަބްދުﷲ ގެ މަރު ތަހުގީގު ކުރަނީ އެކޮމިޝަން އުފެއްދި ގާނޫނުގެ (30) ވަނަ މާއްދާގެ ހ.ގެ ހަތަރު ވަނަ ނަމްބަރުގައިވާ ގޮތުގެ މަތިން އެންއައިސީން އިސްނަގައިގެން ކަމަށެވެ.

އެންއަސީން އިސްނަގައިގެން ކުރާ މި ތަހުގީގުގައި ފުލުހުންގެ ދައުރަކީ އެހީތެރިކަން ދިނުން ކަމަށް ވެސް އެ ބަޔާނުގައި ބުންޏެވެ.

"...މި މައްސަލާގައި އިންސާފަށް ވާސިލުވުމަށް މުހިއްމުކަމަށް ވާތީ ތަހުގީގުގެ ބޭނުމަށް ޕޯސްޓްމޯޓަމް ހެދުމަށް ނިމްމާފައިވާ ކަމަށް ދެންނެވީމެވެ،" އެންއައިސީގެ ބަޔާނުގައި ބުންޏެވެ.

އެ މައްސަލާގައި މިއަދު ޕޮލިސް ކޮމިޝަނާ މުހައްމަދު ހަމީދު ވިދާޅުވީ އަބްދުﷲ މަރުވުމަކީ "ބޮޑު ހިތާމައެއް" ކަމަށާއި އެ މައްސަލައިގައި ޕޮލިސް އިންޓެގްރިޓީ ކޮމިޝަނުން ހިންގާ ތަހުގީގަށް ފުރިހަމައަށް ފުލުހުން އެއްބާރުލުން ދޭނެ ކަމަށެވެ.

"މަސްތުވާތަކެތި ރާއްޖެ އެތެރެކުރިކަމުގެ ތުހުމަތަށް ހައްޔަރުކުރެވުނު ގދ. ހޯޑެއްދޫ، ސްވެން ޢަބްދުﷲ ރަޝީދު ފުލުހުންގެ ހައްޔަރަށް ގެނެވިފައިހުއްޓާ ނިޔާވުން އެއީ ވަރަށް ހިތާމަވެރިކަމެއް. ފުލުހުންގެ އިހުމާލެއް އޮތްތޯބެލުމަށް ހިންގާ ތަހުގީގަށް ފުރިހަމަ އެއްބާރުލުން ދެވޭނެ،" ހަމީދު ވިދާޅުވެފައިވެ އެވެ.

އާއިލާގެ ފަރާތުން މައުލޫމާތު ދިން ގޮތުގައި އަބްދުﷲ މަރުވީ ފުލުހުންގެ ބެލުމުގެ ދަށުގައި ހުއްޓާ އޭނާއަށް ސިއްހީ ފަރުވާ ބޭނުންވާ ކަމަށް ފުލުހުންނަށް އެންގުމުން "ފެކް" ޖައްސަނީ ކަމަށް ބުނެ ފަރުވާ ދިނުން ލަސްކުރުމުންނެވެ. ފުލުހުން އަބްދުﷲ އަށް ފަރުވާ ދިނުމަށް އޭނާގެ ހަށިގަނޑު އެންމެ ފުރަތަމަ ގެންދިޔައީ ގދ. މަޑަވެއްޔަށެވެ. އެރަށު ސިއްހީ މަރުކަޒަށް އޭނާ ގެންދިޔައިރުވެސް މަރުވެފައިވާ ކަމަށް އެތަނުގެ ޑޮކްޓަރުން ފުލުހުންނަށް އަންގާފައިވެ އެވެ.

އަބްދުﷲ މަރުވި މައްސަލަ ތަހުގީގުކުރުމަށް އޭނާގެ ހަށިގަނޑު މާލެ ގެނެސް މިހާރު ބާއްވާފައިވަނީ ގ. ސަހަރާގައި ހުންނަ މޯޗަރީގަ އެވެ.