ޖަލުގައި ހިންގި އަނިޔާގެ މައުލޫމާތު ދޭން އިތުރު ފުރުސަތެއް

އަލީ ރާޒީ

30 ނޮވެމްބަރ 2022 - 20:49

0 comments

ޖަލުތަކުގައި ހިނގާފައިވާ އިންސާނީ ހައްގުތަކާ ހިލާފު އަމަލުތަކާއި، ލާއިންސާނީ ދަށުދަރަޖައިގެ އަމަލުތަކާއި އަނިޔާތަކުގެ މައްސަލަތަކާ ގުޅޭ ސިއްރުކޮށްގެން ބާއްވާ އަޑުއެހުންތަކުގައި ބަޔާން ދިނުމަށް އެދި ނަން ނޯޓުކުރުމުގެ މުއްދަތު އިތުރުކޮށްފި އެވެ.

އިންތިގާލީ އިންސާފުގެ އޮމްބަޑްސްޕާސަންގެ އޮފީހުން މިއަދު ނެރުނު އިއުލާނުގައި ވަނީ ސިއްރުކޮށްގެން ބާއްވާ އެ އަޑުއެހުންތަކުގައި ބަޔާން ދޭން ބޭނުންވާ ފަރާތްތަކުން އެމީހެއްގެ ފުރިހަމަ ނަމާއި އައިޑީ ކާޑު ނަންބަރާއި، ގުޅޭނެ ނަންބަރަކާއި، ދާއިމީ އެޑްރެހާއި، މިހާރު ދިރިއުޅޭ އެޑްރެހާއި ކަމާ ގުޅޭ މައުލޫމާތު ދެވިދާނެ ހައިސިއްޔަތު ނުވަތަ މައުލޫމާތު އެނގޭ ގޮތް އެ އޮފީހަށް ހިއްސާކޮށްދިނުމަށް އެދިފައެވެ.

އޮމްބަޑްސްޕާސަންގެ އޮފީހުން ބުނިގޮތުގައި އެފަދަ މައްސަލަތަކުގެ ތެރެއިން ބަޔާން ދެވޭނީ ޖަލުތަކުގައި 1953 ވަނަ އަހަރުން ފެށިގެން 2018 ވަނަ އަހަރުގެ ނޮވެމްބަރު 17އާ ދެމެދު ހިންގާފައިވާ އިންސާނީ ހައްގުތަކާއި އަސާސީ މިނިވަންކަމާ ޚިލާފު އަމަލުތަކާ ގުޅޭ މައްސަލަތުކައެވެ.

ނަން ނޯޓު ކުރުމަށް މުއްދަތު މިހާރު އިތުރުކޮށްފައިވަނީ އަންނަ މަހުގެ އައްވަނަ ދުވަހުގެ މެންދުރުފަހު 2:00ގެ ނިޔަލަށެވެ.

އިންތިގާލީ އިންސާފުގެ އޮފީހުގެ މައިގަނޑު މަސައްކަތަކީ ރައީސް މުހައްމަދު އަމީންގެ ވެރިކަމުން ފެށިގެން ރައީސް އަބްދުﷲ ޔާމީންގެ ވެރިކަމާ ހަމައަށް ނިޒާމީ ގޮތެއްގައި ރޭވިގެން ދައުލަތުގެ އިދާރާއަކުން ނުވަތަ އެތަނުގެ ވެރިޔަކު މީހެއްގެ އިންސާނީ ހައްގަށް އަރައިގެންފައިވާނަމަ، އެ މައްސަލައެއް ބެލުމެވެ.