ރެހެންދި އެވޯޑަށް ކުރިމަތިލުމުގެ ފުރުސަތު ހުޅުވާލައިފި

އަލީ ރާޒީ

16 ޖެނުއަރީ 2023 - 09:04

0 comments

ޤައުމީ ޚިދުމަތުގައި އެކި ދާއިރާތަކުން އަންހެނުން ކުރަމުންދާ މަސައްކަތްތައް ފާހަގަކުރުމަށް ދެމުން އަންނަ "ރެހެންދި އެވޯޑް" އަށް ކުރިމަތިލުމަށް މިނިސްޓްރީން އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ހުޅުވާލައިފިއެވެ.

މިއަހަރުގެ ރެހެންދި އެވޯޑަށް ކުރިމަތިލުމަށް ޖެންޑަރ މިނިސްޓްރީން ފުރުޞަތު ހުޅުވާލާފައިވަނީ އަންނަމަހުގެ 13 ވަނަ ދުވަހުގެ ނިޔަލަށެވެ.

ގައުމީ ހިދުމަތުގައި އެކިއެކި ދާއިރާއިން އަންހެނުން ކުރާ މަސައްކަތްތަކާއި ދިވެހިރާއްޖޭގެ ގައުމީ ތަރައްގީ އާއި މުޖުތަމައު ބިނާ ކުރުމަށް އަންހެނުން އަދާކުރާ ދައުރާއި މުޖުތަމައުގައި އަންހެނުންގެ ހައްގުތައް ރައްކާތެރި ކުރުމާއި އަންހެނުންގެ ކުރިއެރުމަށް ވަކި ފަރުދުންނާއި މުއައްސަސާތަކާއި ޖަމިއްޔާތަކާއި ޖަމާއަތްތަކުން ކުރަމުންދާ މަސައްކަތްތަކުގެ އަގު ގައުމީ ފެންވަރެއްގައި ވަޒަން ކުރުމަށް "ރެހެންދި އެވޯޑް" ދޭން ފެށީ 2014 ވަނަ އަހަރުން ފެށިގެންނެވެ.

މިނިސްޓްރީ އޮފް ޖެންޑާ ފެމިލީ އެންޑް ސޯޝަލް ސާވިސަސް އިން ބުނީ މިއަހަރުގެ ރެހެންދި އެވޯޑަށް މިހާރު ހުޅުވާލާފައިވާ ކަމަށާ ހަތް ދާއިރާއިން މި އަހަރުވެސް އެވޯޑަށް ހުށައަޅޭނެ އެވެ.

މި އެވޯޑަށް މި އަހަރު ކުރިމަތިލެވޭނެ ދާއިރާތަކަކީ؛

1.ވަކި ވަކި އަންހެނުންނަށާއި ޖަމިއްޔާ / ޖަމާއަތްތައް
2.ލީޑަޝިޕް / ގަވާނަންސް
3.އިގްތިސާދީ ގޮތުން ބާރުވެރި ކުރުން
4.އިޖުތިމާއީ ގޮތުން ބާރުވެރި ކުރުން
5.އަންހެނުން އާންމުކޮށް ކޮށްނޫޅޭ މަސައްކަތްތައް ނުވަތަ "ނޮން-ޓްރެޑިޝަނަލް ރޯލްސް"
6.އިންސްޓިޓިއުޝަނަލް ޖެންޑާ މެއިންސްޓްރީމިން – ވަޒީފާ ދޭ ފަރާތްތައް / މުއައްސަސާތަކުން އެވޯޑަށް ހުށަހެޅޭ ދާއިރާ
7.އަންހެނުންގެ ތަރައްގީއަށް މަސައްކަތް ކުރާ ކޮމިޓީތައް

މި އެވޯޑަށް ކުރިމަތިލާނެ ގޮތުގެ އިތުރު މައުލޫމާތާއި އެވޯޑަށް ކުރިމަތިލުމަށް ހުށަހަޅާ ފޯމު / އުސޫލު ޖެންޑާ މިނިސްޓްރީގެ ވެބްސައިޓުން ލިބެން ހުންނާނެ އެވެ.