ބުދެއް ލ. ގަމުން ފެނިއްޖެ

މަރިޔަމް އަނާ

05 ފެބުރުއަރީ 2023 - 19:12

0 comments

ލ. ގަމުގައި ފްލެޓް އަޅާ ސަރަހައްދު ކޮންނަނިކޮށް ފެނުނު ބުދު -- ފޮޓޯ: މޯލްޑިވްސް ހެރިޓޭޖް ސޮސައިޓީ

ރާއްޖެ އިސްލާމް ވުމުގެ ކުރިން ދިވެހިން އަޅުކަންކޮށް އުޅުނު ބުދެއް ލ. ގަމުން ފެނިއްޖެއެވެ.

ރާއްޖޭގެ ތާރީހާއި ސަގާފަތް ހިމާޔަތްކޮށް މީހުން ހޭލުންތެރިކުރުމަށް މަސައްކަތްކުރާ އަމިއްލަ ޖަމިއްޔާއެއް ކަމަށްވާ މޯލްޑިވްސް ހެރިޓޭޖް ސޮސައިޓީން ބުނި ގޮތުގައި، ހިރިގަލުން ހަދާފައިވާ އެ ބުދު ފެނުނީ މުކުރިމަގު އަވަށުގައި މިހާރު ފްލެޓް އަޅަމުން އަންނަ ސަރަހައްދުން ނެގި ވެލިތަކުގެ ތެރެއިންނެވެ.

އެތަނުން ނެގި ވެލި ހުރީ އެތަނާ ކައިރި ހިސާބެއްގައި ފުންޏަކަށް ޖަހައިފަ އެވެ. ބުދު ފެނުނީ އެ ވެލިފުނި ފަތުރާލިތަނާ އެވެ.

ރާއްޖެ އިސްލާމްވީއިރު ވެސް ލ. ގަމަކީ ބުދު ދީނުގެ މައި މަރުކަޒެކެވެ. މިގޮތުން ގަމުގައި ހުންނަ ހަތްތެއްޔަކީ ބުދު ދީނުގެ އަޅުކަންތަކަށް އެ ޒަމާނުގައި ބޭނުންކޮށް އުޅުނު މައި އެއްތަނެވެ. އުސްމިނުގައި 24 ފޫޓު ހުންނަ މި ހަތްތެލިން ވެސް މީގެ ކުރިން ވަނީ ބުދުތަކާއި އާސާރީ އެތައް ތަކެއްޗެއް ފެނިފަ އެވެ. ނަމަވެސް ކުރިން ހުރި އުސްމިނާއި އަޅާ ބަލާއިރު ހަތްތެލި މިހާރު ކުޑަކަން ފާހަގަކުރެވެ އެވެ.

މީގެ އިތުރުން ގަމު ކުރުހިންނަ ސަރަހައްދުގައި ހުރި ބުދު ފައްޅިއަކުންނާއި ބުންބެރަ ސަރަހައްދުގައި ހުރި ފައްޅިއަކުން ވެސް ވަނީ ބުދު ފެނިފަ އެވެ.