ނިލަންދު އާއި ބިލެތްދޫގެ ބަނދަރު ތަރައްޤީކުރުން އެމްޓީސީސީއަށް

ހުސެން ރަޝީދު

25 މެއި 2023 - 09:14

0 comments

ފ. ނިލަންދު އާއި އެއަތޮޅު ބިލެތްދޫ ބަނދަރު ތަރައްޤީކުރުމުގެ މަޝްރޫޢު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީއާ ޙަވާލުކޮށްފިއެވެ. މި ދެ މަޝްރޫޢަކީ 138 މިލިއަނަށްވުރެ ގިނަ ރުފިޔާ ޚަރަދުކޮށްގެން ހިންގުމަށް ހަމަޖެހިފައިވާ ދެ މަޝްރޫޢެވެ.

އެކަމަށްޓަކައި ޕްލޭނިން މިނިސްޓްރީގައި ބޭއްވި ރަސްމިއްޔާތެއްގައި އެމްޓީސީސީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ ސީއީއޯ އާދަމް އާޒިމެވެ. މިނިސްޓްރީގެ ފަރާތުން ސޮއިކުރެއްވީ ޕާމަނަންޓް ސެކްރެޓަރީ ޒީނިޔާ އަހުމަދު ހަމީދެވެ.

ބިލެއްދޫގެ ބަނދަރު ހަދަން ދައުލަތުގެ ބަޖެޓުން 72.3 މިލިއަން ރުފިޔާ ހޭދަކުރާނެ އެވެ. ބަނދަރު ބޭނުން ކުރުމުގައި މިހާރު ދިމާވާ ދަތިތަކާއި ރަށް ގިރުމުގެ މައްސަލަ ވެސް އެ މަޝްރޫއުގެ ދަށުން ހައްލު ކުރާނެ ކަމަށް ޕްލޭނިން މިނިސްޓްރީން ބުންޏެވެ. އެ މަސައްކަތް ނިންމަން ދިނީ އެއް އަހަރާއި ތިން މަސް ދުވަހެވެ.

ނިލަންދޫގެ ބަނދަރު ހެދުމަށް ދައުލަތުގެ ބަޖެޓުން 66.7 މިލިއަން ރުފިޔާ ހޭދަކުރާނެ އެވެ. އެ މަޝްރޫއުގެ ދަށުން އެ ރަށުގެ ގޮނޑުދޮށް ހިމާޔަތްކުރުމުގެ މަސައްކަތް ކުރަން ނިންމާފައިވެ އެވެ. އެ މަސައްކަތް ނިންމަން ދިނީ އެއް އަހަރާއި ހަތަރު މަސްދުވަހެވެ.

އެމްޓީސީސީން މިހާރު ވެސް އަންނަނީ ވަރަށް ގިނަ ރަށްރަށުގެ ބަނދަރު ހެދުމުގެ މަސައްކަތް ކުރަމުންނެވެ.

ޕްލޭނިންގ މިނިސްޓްރީއިން ވިދާޅުވީ، ނިލަންދޫ އަދި ބިލެތްދޫ ބަނދަރު ތަރައްޤީކުރުމުގެ މަޝްރޫޢުގެ ދަށުން، ރަށް ގިރުމުގެ މައްސަލަ ޙައްލުކުރުމަށްޓަކައި މި ދެރަށުގެ ގޮނޑުދޮށް ޚިމާޔަތްކުރުމުގެ މަސައްކަތް ވެސް މި ދެ މަޝްރޫޢުގެ ތެރެއިން ކުރުމަށް ހަމަޖެހިފައިވާ ކަމަށެވެ.