އޯގަސްޓު މަހު ދެ ކޮމަންޑޫ ގުޅައިލުމުގެ މަސައްކަތް ފަށަނީ

މަރިޔަމް އަނާ

08 ޖުލައި 2023 - 15:24

0 comments

މަތިކޮމަންޑޫ ހިއްކުމުގެ މަޝްރޫޢު މިމަހު ފަހުކޮޅު ފެށުމަށް ތައްޔާރުވެއްޖެއެވެ. އެމް.ޓީ.ސީ.ސީއިން ބުނީ މަތިކޮމަންޑޫ ހިއްކުމުގެ މަސައްކަތް އޯގަސްޓް މަހުގެ ތެރޭގައި ނިންމާލެވޭނެކަމަށެވެ.

އެމްޓީސީސީން މި މަހު ފަހުކޮޅު މަތިކޮމަންޑޫ ހިއްކަން ފެށުމަށް ތައްޔާރުވަމުން އަންނައިރު އަންނަ އޮގަސްޓް މަހުގެ ތެރޭގައި ބިން ހިއްކާ ނިމޭނެ ކަމަށް އެކުންފުނިން ވަނީ ބުނެފައެވެ. ކޮމަންޑޫ އާއި މަތި ކޮމަންޑޫ ގުޅާލުމަކީ ރައީސް އިބްރާހިމް މުހައްމަދު ސޯލިހްގެ ރިޔާސީ ވައުދެކެވެ.

ކޮމަންޑޫގެ ފަޅުތެރޭގައި އޮންނަ މަތިކޮމަންޑޫ ހިއްކާ ދެރަށް ގުޅާލުމުގެ މަސައްކަތް ސަރުކާރުން ހަވާލުކޮށްފައިވަނީ އެމްޓީސީސީއާއެވެ.

މަތި ކޮމަންޑޫ ހިއްކުމުގެ މަސައްކަތް ކުރިއަށްދާއިރު، ދެކޮމަންޑޫ ގުޅާލުމަށް ހަދާ ބްރިޖްގެ މަސައްކަތްވެސް އޯގަސްޓް މަހު ފެށުމަށް އެމް.ޓީ.ސީ.ސީން ދަނީ ތައްޔާރުވަމުންނެވެ. ދެކޮމަންޑޫ ގުޅާލުމަށް 200 މީޓަރުގެ ބްރިޖެއް ތަރައްޤީކުރުމަށްވަނީ ނިންމާފައެވެ. އަދި މަސައްކަތް 6 މަސްތެރޭގައި ނިންމުމަށް އެމް.ޓީ.ސީ.ސީން ވަނީ ކަނޑައަޅާފައެވެ.

މި މަސައްކަތުގެ އީއައިއޭއަށްވެސް ވަގުތު ހޭދަވާކަން އެމްޓީސީސީން ފާހަގަކުރެއެވެ. އެގޮތުން ތިން ހަތަރު މަސް އެކަމަށް ހޭދަވާކަމަށް އެމްޓީސީސީން ބުނެއެވެ. މަތިކޮމަންޑޫ ހިއްކާ ދެރަށް ގުޅާލުމުގެ މަޝްރޫޢަކީ 240 މިލިއަނަށްވުރެ ގިނަ ރުފިޔާ ޚަރަދުކޮށްގެން ސަރުކާރުން ކުރިއަށްގެންދަވާ މަޝްރޫޢުއެކެވެ.

ކޮމަންޑޫގެ ރައްޔިތުންގެ އޮތް އެންމެ ބޮޑު އެދުމަކީ، އެރަށަށް ކުރިމަތިވެފައިވާ ބިމުގެ މައްސަލައަށް ޙައްލެއް ހޯދައިދިނުމެވެ. އެތައް ޢާއިލާއެއް އެއްގެއެއްގެ ތެރޭގައި ދިރިއުޅެން ޖެހުމުގެ ސަބަބުން އިޖުތިމާޢީ އެތައް މައްސަލަތަކަކާއި ކޮމަންޑޫ ރައްޔިތުން ވަނީ ކުރިމަތިލާންޖެހިފައެވެ. އެހެންކަމުން ބިން ހިއްކާ ނިމުމާއެކު ރަށުގެ ލޭންޑް ޔޫސްޕްލޭން އެކުލަވާލާ، ބިން ދޫކުރުމަށް ކައުންސިލުން ވަނީ ނިންމަވާފައެވެ.

ދެ ކޮމަންޑޫ ގުޅާލުމުގެ މަޝްރޫއު ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް އިއުލާން ކުރެއްވީ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަންގެ ތެރޭގަ އެވެ.