ރައްޔިތުންގެ މަޖިލިހުގެ މައްޗަންގޯޅި ދެކުނު ދާއިރާގެ މެމްބަރު އަހުމަދު ހައިތަމް އެމްޑީޕީން ވަކިވެވަޑައިގެންފިއެވެ.

އެމްޑީޕީގެ ޗެއާޕާސަން ފައްޔާޒު އިސްމާއީލަށް ފޮނުއްވި ސިޓީއެއްގައި ހައިތަމް ވިދާޅުވީ އޭނާ އެމްޑީޕީން ވަކިވެވަޑައިގަތުމަށް ނިންމެވީ ރައްޔިތުންނަށްޓަކައި ކުރައްވަން ބޭނުންވި ބައެއް ކަންކަން ކުރެއްވުމަށް ޕާޓީގެ ތެރެއިން އެއްބާރުލުން ލިބިވަޑައިނުގަތުމުން ކަމަށެވެ. އެހެންކަމުން އޭނާ ގަބޫލުކުރައްވާ އުސޫލުތަކައިގެން ކުރިއަށް ވަޑައިގަނެވެން ނެތް ޕާޓީއެއްގައި ހުންނެވުމުގެ ބޭނުމެއް ނެތް ކަމުގައިވެސް ވިދާޅުވެފައިވެ އެވެ.

ހައިތަމް ވިދާޅުވި ގޮތުގައި ސިޔާސީ އެހެން ޕާޓީއަކާ ގުޅުމުގެ ވިސްނުމެއް މިވަގުތު އޭނާގެ ނެތެވެ.

އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގެ ދެވަނަ ބުރާ ދިމާކޮށް ފޮނަދޫ ދާއިރާގެ މެމްބަރު މޫސާ ސިރާޖު ވެސް ވަނީ އެމްޑީޕީން ވަކިވެ އިދިކޮޅު ޕީޕީއެމްއާ ގުޅިވަޑައިގެންފަ އެވެ.

މީގެކުރިން އެމްޑީޕީގެ އެހެން 12 މެމްބަރަކު އެ ޕާޓީން ވަކިވެ، ދަ ޑިމޮކްރެޓްސްގެ ނަމުގައި އާ ޕާޓީއެއް ވެސް އުފެއްދި އެވެ. ނަމަވެސް އޭގެ ތެރެއިން ދެ މެމްބަރަކު ވަނީ ފަހުން އެމްޑީޕީއާ އަލުން ގުޅިވަޑައިގެންފަ އެވެ.