އޭސީސީން އިންތިގާލީ އިންސާފުގެ އޮފީހަށް ވަދެއްޖެ

އަލީ ރާޒީ

15 ނޮވެމްބަރ 2023 - 18:52

0 comments

ދައުލަތުގެ ފަރާތުން އެކިއެކި ބޭއިންސާފުތަކާ ކުރިމަތިވެފައިވާ ފަރާތްތަކަށް އިންސާފު ހޯދައިދިނުމަށް ކަމަށް ބުނެ މި ސަރުކާރުން އުފައްދާފައިވާ އިންތިގާލީ އިންސާފުގެ އޮމްބަޑްސްޕާސަންގެ އޮފީހަށް އެންޓި-ކޮރަޕްޝަން ކޮމިޝަން (އޭސީސީ)ން މިއަދު ވަދެއްޖެ އެވެ. އެއާ އެކު، އޭސީސީގެ ތަހުގީގަށް ބޭނުންވާ ބައެއް ލިޔެކިއުންތައް ދޭން އެ ތަނުގެ މުވައްޒަފުން އިންކާރު ކުރަމުންދާ ކަމަށްވެ އެވެ.

އޭ.ސީ.ސީގެ ޓީމަކުން އިންތިޤާލީ އިންސާފުގެ އޮފީހަށް ވަދެފައިވަނީ މިއަދު މެންދުރުގެ ވަގުތެއްގައެވެ. މަޢުލޫމާތު ލިބިފައިވާގޮތުގައި އޭ.ސީ.ސީއިން ބަލަމުން އަންނަނީ އެ އޮފީހުގެ ބައެއް އޮމްބަޑްސްމަނުން މަޤާމުގެ ނުފޫޒު ބޭނުންކޮށްގެން އެ އޮފީހުންގެ ބައެއް ނިންމުންތައް ބަދަލުކުރާކަމުގެ ތުޙުމަތުގައި އޭސީސީއަށް ހުށަހެޅިފައިވާ ޝަކުވާތަކެކެވެ. ނަމަވެސް އެއީ ސީދާ ކޮން މައްސަލަތަކެއްކަމެއް އޭސީސީއިން އަދި ހާމަކުރައްވާފައެއްނުވެއެވެ.

އިންތިޤާލީ އިންސާފުގެ އޮފީހާއި ގުޅޭގޮތުން ހުށަހެޅުނު ޝަކުވާތަކެއް އޭސީސީއިން ބަލަން ފަށާފައިވާއިރު، އެ އޮފީހުގެ ދައުރު އަންނަ ހުކުރު ދުވަހަށް ހަމަވާނެއެވެ.

މިފަދަ މައްސަލަތެކެއްގެ ތުހުމަތުކޮށް ނޮވެމްބަރު 13، ގައި އިންތިގާލީ އިންސާފުގެ އޮފީހުގެ އޮމްބަޑްސްޕާސަން ޖިހާދާ އަނީސް ވަނީ އެ މަގާމުން އިސްތިއުފާ ވެސް ދެއްވާފަ އެވެ.

އެ އޮފީހަށް ބޮޑެތި ތުހުމަތުތަކެއް ކުރައްވައި އާންމުކުރެއްވި ބަޔާނުގައި ކުރިން ނިންމާފައިވާ މައްސަލަތަކުގެ ނިންމުން ބަދަލުކުރުމާއި، ހާޒިރުނުވާ ބައްދަލުވުންތަކަށް ހާޒިރުވި ކަމަށް ހެދުން ފަދަ ކަންކަންކޮށްފައިވާ ކަމަށް ޖިހާދާ ތުހުމަތުކުރައްވާފައިވެ އެވެ.

އޭނާ ވިދާޅުވީ އިންތިގާލީ އިންސާފުގެ އޮފީހުގައި މަސައްކަތްކުރައްވަން ޖެހިވަޑައިގެންނެވީ ގިނަ ގޮންޖެހުންތަކަކާ އެކު ކަމަށެވެ. އޮމްބަޑްސްޕާސަންގެ މަގާމުގައި ތިއްބެވި އެހެން ބޭފުޅުން މަސައްކަތްކުރައްވަމުން ގެންދަވަނީ މާ ބޮޑެތި ލުއިތަކަކާއެކު ކަމަށެވެ.

ޤާނޫގައި ކަނޑައަޅާފައި އޮތް ގޮތުން މިދިޔަ އަހަރުގެ ނޮވެމްބަރުމަހުގެ 17 ވަނަ ދުވަހަށް އެ އޮފީހަށް ހުށައަޅާފައި ހުރި މައްސަލަތައް ނިންމަންޖެހެއެވެ. އެހެންނަމަވެސް ހުުށައެޅުނު މައްސަލަތައް ގިނަވުމާއި މައްސަލަތައް ބަލާ ނުނިމޭތީ އެ މުއްދަތު މިއަހަރުގެ ނޮވެމްބަރު މަހުގެ 17 ގެ ނިޔަލަށް އިތުރު ކުރެއްވިއެވެ. މި މުއްދަތު އިތުރުކުރެއްވީ ރައީސުލްޖުމްޙޫރިއްޔާއަށް ލިބިދޭ ބާރުގެ ދަށުންނެވެ.