ދައުލަތުގެ އިސް ވަކީލު ޝަފީއު އެއްޖިންސުން ގުޅުން ހިންގާ ކަމުގެ ތުހުމަތު..!

އިސްމާއިލް ރިޒާ

13 ޑިސެމްބަރ 2023 - 22:29

0 comments

ޕީޖީ އޮފީހުގެ ޕަބްލިކް ޕްރޮސެކިއުޓާ އަހުމަދު ޝަފީއު

ޕްރޮސެކިއުޓާ ޖެނަރަލް އޮފީހުގެ ޕަބްލިކް ޕްރޮސެކިއުޓާ އަހުމަދު ޝަފީއު އެއްޖިންސުން ގުޅުން ހިންގި ކަމަށް ތުހުމަތުކުރާ މައްސަލައެއް ފުލުހުން ތަހުގީގު ކުރަން ފަށައިފި އެވެ.

ސޯޝަލް މީޑިއާގައި ދައުރުވަމުންދަނީ ޕީޖީ އޮފީހުގެ ޕަބްލިކް ޕްރޮސެކިއުޓާ ޝަފީއު ކަމަށް ބަޔަކު މީހުން ތުހުމަތުކުރެއެވެ.

ޝަފީއަކީ ދައުލަތުގެ ފަރާތުން ބޮޑެތި މައްސަލަތަކުގައި ވަކާލާތު ކުރައްވާ ވަކީލެވެ. އޭނާ އެއްޖިންސުން ގުޅުން ހިންގާ ކަމަށް ބުނާ ވީޑިއޯތަކާއި އޭނާގެ ބަރަހަނާ ފޮޓޯތަކާއި އޭނާ ދައްކާފައިވާ ދީނާ ހިލާފު ވާހަކަތަކެއް މިފަހުން ވަނީ ދައުރުވެފައެވެ.

ޝަފީއަކީ ކުރީގެ ރައީސް އަބްދުﷲ ޔާމީންގެ މައްސަލައާއި ޔޯގާ ހަރަކާތުގެ ތެރެއިން ހައްޔަރުކުރި ޝެއިހުންގެ މައްސަލަތަކުގައި ދައުލަތުގެ ފަރާތުން ވަކާލާތު ކުރައްވާ އިސް ވަކީލެވެ.

ފުލުހުންގެ މީޑިއާ އޮފިޝަލަކު މިރޭ ވިދާޅުވީ، ޕީޖީ އޮފީހުގެ ވަކީލަކު އެއްޖިންސުން ގުޅުން ހިންގި ކަމަށް ތުހުމަތުކޮށް، ސޯޝަލް މީޑިއާގައި ދައުރުވަމުންދާ މައުލޫމާތެއް ފުލުހުންގެ ސަމާލުކަމަށް އައިސްފައިވާ ކަމަށެވެ.

އެކަމާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ބުންޏެވެ.

އެ ކަމާ ގުޅިގެން ޝަފީއު މިހާތަނަށް އެ ތުހުމަތުތައް ދޮގުކުރައްވައިފައެއް ނުވެއެވެ. މީގެ ކުރިން ވެސް އޭނާއަށް އެފަދަ ތުހުމަތުތަކެއް ކޮށްފައިވެއެވެ. ނަމަވެސް އެއިރު އޭނާ ވިދާޅުވީ، އެއީ ދޮގު ވާހަކަތަކެއްކަމަށެވެ.