ކުޑަކުދިންގެ ހަވީރު ވެސް މޫސުން ގޯސްވުމުން ކެންސަލް ކޮށްފި

މަރިޔަމް އަނާ

31 ޑިސެމްބަރ 2023 - 12:39

0 comments

އާ އަހަރު ފެށުން ފާހަގަކުރަން މިއަދު ހަވީރު ހުޅުމާލޭގައި ބާއްވަން ސަރުކާރުން ނިންމި ކުޑަކުދިންގެ ފެސްޓިވަލް މިހާރު ކުރަމުންދާ ގަދަ ވިއްސާރައާ ގުޅިގެން ކެންސަލްކޮށްފި އެވެ،

ކުޑަކުދީންގެ ހަވީރު އޮތީ ހަވީރު ހަތަރަކުން ހަޔަަކަށް ސެންޓްރަލް ޕާކު ގައެވެ. ނަމަވެސް ޔޫތު މިނިސްޓްރީން ބުނީ ގޯސް ވުމުގެ ސަބަބުން "ދިވެހީންގެ ރާއްޖެ ފެސްޓިވަލް 2024" ކުޑަކުދިންގެ ހަވީރު މިއަދު ނޯންނާނެ ކަމަށެވެ.

އާ އަހަރު ފެށުމުގެ މުނާސަބަތުގައި ދިވެހީންނަށް ހާއްސަ ކޮށް "ދިވެހީންގެ ރާއްޖެ ފެސްޓިވަލް" ގެ ނަމުގައި މިއަދު ފެސްޓިވަލެއް ބާއްވަން ނިންމާ ސަރުކާރުން އެކަން އިއުލާނު ކުރީ މިދިޔަ ބުރާސްފަތި ދުވަހު އެވެ.

އެގޮތުން ހަވީރު ކުޑަކުދީންގެ ހަވީރަކާއި ރޭގަނޑު މިއުޒިކް ޝޯ އަކާއި ލޭޒާ ޝޯ އެއް ކުރިއަށް ގެންދަން އޮތީ ނިންމާފައެވެ. ނަމަވެސް މިރޭ ބާއްވަން އުޅުނު ހަރަކާތްތައް ވެސް ވަނީ މޫސުން ގޯސްވުމުން ފަސްކޮށްފަ އެވެ. އެއީ މިއުޒިކް ޝޯ އާއި ލޭޒާ ޝޯ އަދި ހަވާއެރުވުމުގެ ހަރަކާތްތަކެވެ. އެ ހަރަކާތްތައް ބާއްވާނެ ދުވަހެއް ފަހުން އަންގާނެ ކަމަށް ޔޫތު މިނިސްޓްރީން ވަނީ ބުނެފަ އެވެ.

ރާއްޖެ އަށް އިރުވައި މޫސުން ފެށުމާ ގުޅިގެން މިހާރު ކުރަން ފަށާފައިވާ ވިއްސާރައާ ގުޅިގެން މިއަދުގެ މެންދުރު 1:30 އާ ހަމައަށް މޫސުމާ ބެހޭ އިދާރާ އިން ވަނީ މުޅި ރާއްޖެ އަށް ވައިޓް އެލާޓެއް ނެރެފަ އެވެ. މާލެ އާއި ބައެއް ރަށްރަށުގައި ފެން ބޮޑުވެ، ގެތަކަށް ފެން ވަދެ ގެއްލުންތަކެއް ވެފައިވާ ކަމަށް ވެ އެވެ. މާލޭގެ ގިނަ މަގުތަކުގައި ފެން ބޮޑުވެ، ބައެއް ގޭގެ އަށް ވަދެފައި ވެ އެވެ.